Krótkopowěsće (20.09.22)
Rěčny kurs w Bukecach zahajili
Bukecy. Serbski rěčny kurs ze 14 wobdźělnikami su wčera na farje w Bukecach zahajili. Jón nawjeduje Julian Nyča z Rěčneho centruma WITAJ. Bukečanska Bjesada jako iniciatorka chce z kursom mjez druhim serbske korjenje w tej něhdy ryzy serbskej wosadźe skrućić a zajim zbudźić. Kursisća su z Bukec a wokolnych wsow Mješic, Wuježka, Špikałow, Kubšic, Wadec, Trjebjeńcy a Wujězda.
Dale bjez motorskeje łódźe
Zhorjelc. Přećiwo postajenju Sakskeje krajneje direkcije, zo je Bartonjanski jězor (Berzdorf) dotwarjeny, su znapřećiwjenja zapodali. Tak njemóža wot 12. septembra pasažěrske łódźe, njemotorske a motorske sportowe łódźe na jězorje južnje Zhorjelca jězdźić. Hač do zakónčenja skóržbneho jednanja je za wužiwanje motorskeje łódźe na Bartonjanskim jězorje dale wosebita dowolnosć trěbna.
Rólu spisowaćelow sylnić
Nowi wohnjowi wobornicy
Ralbicy-Rožant. Wohnjowa wobora gmejny Ralbicy-Róžant chce wot jutřišeho 14 nowych kameradow za swójsku woboru wukubłać, zdźěli nawoda wobory Michael Maywald. Telko dorosta njejsu wot časa měrliweje rewolucije wjace měli. Wuspěch žada sej tójšto podpěry swójskeje wobory kaž tež wukubłarjow pódlanskich gmejnow, kotrež projekt přesadźa. Přichodni wohnjowi wobornicy so prěni króć jutře we 18 hodź. w Ralbičanskej Starej šuli zetkaja.
Na koncert
Budyšin. W Budyskim Kamjentnym domje wotměje so jutře, wutoru, wječor w 20 hodź. koncert ze skupinu Big Trunk. Trio ze sprjewineho města, kotrež z lěta 2009 a nětko jako kwartet hudźi, orientuje so na hudźbne směry wot Black Sabbath do Melvins a twori sam progresiwno-psychedeliski Stoner Rock. Při dobrym wjedrje wotměje so koncert na dworje Kamjentneho domu, pod hołym njebjom.
Pytaja hodowny štom
Policija (19.09.22)
BMW pokradnyli
Šěrachow-Korzym. Běły BMW 535 xdrive su dotal njeznaći zašły kónc tydźenja w času mjez pjatkom připołdnju w 12 hodź. a sobotu wječor w 19 hodź. z ležownosće hotela w Korzymje kradnyli. Jězdźidło z lěta 2013 ma hamtske šwicarske znamjo AG495344 a płaći tuchwilu něhdźe 20 000 eurow. Po informaciji wobsedźerja měješe wón w awće wosobinske dokumenty a dwě kolesy.
Na dobro dźěći kedźbu dać
Wojerecy (SN). Na iniciatiwu kliniki za dźěćacu a młodźinsku medicinu při Wojerowskim klinikumje Łužiska jězorina su dźěćacy lěkarjo, dźěćace sotry a baby wuradźowali pod hesłom „Zažna podpěra a prewentiwny škit dźěći wokrjesa Budyšin“. Wobdźělili su so mnozy partnerojo z kliniki a zwonka njeje.
Wšitko po planje
Přetwar Chróšćanskeje nawsy derje postupuje, ale zawinuje wyše wudawki
Chrósćicy (JK/SN). Posedźenje Chróšćanskeje gmejnskeje rady minjenu srjedu je zastupowacy wjesnjanosta Jan Wjesela zahajił, dokelž měješe w druhim dypku dnjoweho porjada spřisahać znowa wuzwoleneho wjesnjanostu Marka Klimana (CDU). Tón po złoženju hamtskeho sluba dalši nawod posedźenja přewza.
Dnjowy porjad ničo wusahowaceho njepředwidźeše, ale bě trěbne, zo k dwěmaj dypkomaj předsyda zarjadniskeho zwjazka „Při Klóšterskej wodźe“, Stefan Anders, radźićelam nadrobniše informacije poda. W tutymaj dźěše wo wotličenje kónclětnych wotzamknjenjow gmejny wot lěta 2014 hač do lěta 2024. Tute chce sakske krajne knježerstwo gmejnam wolóžić a je k tomu wosebite rjadowanja wudało, kotrež móhli při wotdźěłanju njelubych, ale trěbnych wotličenjow pomhać. Hač do lěta 2024 maja gmejny zarjadniskeho zwjazka wšitke kónclětne wotzamknjenja hač do 2020 wotličić. Tučasnje je wjetšina komunow pola lěta 2015.
Miłoraz w přichodźe bjez busa
Zhorjelski wokrjes swoje busowe linije znowa rjaduje. Po wulkich protestach staršich a komunow maja so plany znowa wobhladować a potom hakle ke kóncej lěta přesadźić.
Trjebin (CK/SN). W Miłorazu nima wot januara 2023 bus hižo zastać. Swójby su wotpowědne pismo ze Zhorjelskeho krajnoradneho zarjada dóstali. Z nim chce zarjadnistwo potrjebu zwěsćić, zo móhła za druhim rozrisanjom pytać. To je tež zaměr Trjebinskeho wjesnjanosty Waldemara Locke (CDU). Pozadk je, zo wokrjes taktowy system busow w zjawnym dalokowobchadźe znowa rjaduje a z tym tež zwjazane přestajenje na nowe časy a wodźenje linijow. Změny mějachu hižo z tymle šulskim lětom płaćić. Masiwne protesty staršich a komunow pak su tomu zadźěwali a zawjedźenje noweho jězbneho plana na 1. januar 2023 přesunyli. Nětko bu pola krajneho zarjada za twar dróhow a wobchad dalše słyšenje postajene.
Zerzawy hozdźik nětko wobswěćeny
Krótkopowěsće (19.09.22)
Wićaz: Stat dyrbi zapřimnyć
Budyšin. Jako konsekwencu krizy za ludnosć a předewzaća dla razantnje stupacych płaćiznow za płun a milinu žada sej Budyski krajny rada Udo Wićaz (CDU), zo „stat nětko zapřimnje, hewak so tak wjele skóncuje“. Swobodny stat ma wokrjesam nětko pomhać pola Zwjazka interweněrować, rjekny komunalny politikar w dźensnišim Budyskim wudaću nowiny Sächsische Zeitung.
Čitarjo „taz“ w Serbach
Budyšin. Jědnaće abonentow němskeje nowiny „taz“ wopyta minjeny dny Łužicu, zo bychu so tež ze Serbami zeznali. W Njebjelčicach bě minjenu srjedu zetkanje ze zastupjerjemi gmejny, po tym pokaza Benedikt Dyrlich hosćom Budyšin a po kwasnym wobjedźe we Wjelbiku čitaše spisowaćel ze swojich literarnych dźěłow a wotmołwješe na prašenja k byću serbskeho ludu něhdy a dźensa.
QuizSerb z nowej kategoriju
Wuprawa po slědach Kocora
Policija (16.09.22)
Praskotaki na awta mjetali
Mały Wjelkow. W nocy wot srjedy na štwórtk, w času mjez 1.15 a 8.15 hodź. su dotal njeznaći w Małym Wjelkowje dwě wosobowej awće wobškodźili. Po wšěm zdaću su wone praskotaki mjez awće samsneje marki, Ford Mondeo a Ford Focus, mjetali. Wěcna škoda wučinja něhdźe 8 500 eurow. Zastojnicy policije su na městnje njeskutka slědy zawěsćili.
