Čiłe žiwjenje na wikach
Druhe wiki regionalnych wudźěłkow wokoło Stareje cyhelnicy w Małym Kólsku (Klein Kölzig) běchu wulki wuspěch. Předewzaće EVTZ tzwr „UNESCO Global geoparka Mužakowski zahork“ nadźija so po zahajenju nětko na mnoho turistow a wopytowarjow.
Policija (26.09.22)
Z 2,14 promile z awtom jěła
Wojerecy. Na Grodkowskej šoseji we Wojerecach chcyše 38lětny pjatk wječor ze swojim awtom marki Renault na Halštrowsku wotbočić. Za nim jěduca 62lětna šoferka awta marki VW je, bjez toho zo by spinała, do njeho zrazyła. Jako policija dojědźe, su zastojnicy zwěsćili, zo ma žona 2,14 promilow alkohola w kreji. Muž bu zlochka zranjeny. Wěcna škoda wučinja něhdźe 10 000 eurow.
Stólcy prózdne wostali
Bjedrichecy (AK/SN). Za wobydlersku rěčnu hodźinu w Bjedrichecach (Friedersdorf) njeje so nichtó přizjewił, kiž by chcył z Łazowskim wjesnjanostu rěčeć. Thomas Leberecht (CDU) bě njedawno wobydlerjow přeprosył, z nim wo temach rěčeć, kotrež jednotliwcow, cyłe swójby kaž tež towarstwa a dalšich jimaja. Při tym je na saněrowanje južneho pobrjoha při Slěbornym jězoru, problemy z wodu při busowym zastanišću po sylnych zliwkach abo přichod wjesneho domu, to rěka zetkanišća za wobydlerjow myslił. Tola Leberecht steješe před njewobsadźenymi stólcami, byrnjež přeprošenje na rěčnu hodźinu w medijach sčasom wozjewił. Tež tři štwórć hodźiny po zahajenju poskitka, popołdnju w 15 hodź., njebě hišće nichtó do gmejnskeho zarjada dóšoł, ani wjesny předstejićel ani wjesny radźićel a tež žadyn wobydler. Wjesnjanosta ma to za skomdźenu a njewužiwanu šansu.
Runowahu dodźeržeć
Inwesticije su předewšěm wot eksternych faktorow wotwisne
Rakecy (JK/SN). Złožujo so na dobre wuslědki konsolidacije a spokojacy staw likwidnych srědkow planuje Rakečanska gmejna w přichodnymaj lětomaj wjetše inwesticije. Wosebje tak mjenowane klučowe produkty maja při tym prioritu. To je dopóznaće ze septemberskeho posedźenja gmejnskeje rady.
Při planowanju wobkedźbuje gmejna hižo tučasnje stupace kóšty za energiju a material. Wona liči ze spěchowanskimi srědkami z boka kraja Sakskeje kaž tež ze srědkow za strukturnu změnu.
Zo je gmejna zlutniwje hospodariła pokazuje fakt, zo je so jeje dołh wot 2,3 miliony eurow w lěće 2013 na 780 000 eurow w lěće 2024 pomjeńšił. Tute eficientne hospodarjenje a wobkedźbowanje datych poměrow a so wuwiwacych kóštow su wuchadźišćo za naročne nadawki gmejny, kaž to wjesnjanosta Swen Nowotny (CDU) zwurazni. Tuž ma gmejna na to dźiwać, zo wostanje runowaha mjez dochodami a wudawkami gmejny zawěsćena, jeli chce, kaž plan předwidźi, kónc 2024 měć wurunany etat.
Wopon za Krabatowe wiki
Dźewjeć metrow wysoki a ze wšelakimi woponami wuhotowany prezentuje so wot štwórtka woponowy štom na Staroměšćanskim torhošću mjez Serbskej studnju a radnicu we Wojerecach.
Wojerecy (SiR/SN). Krabatowe towarstwo, kotrež wěnuje so regionalnemu wuwiću w dwurěčnej Łužicy, je ideju za „Woponowy-pućowanski štom“ wuwiło. „Woponowy štom znazornja identitu městow a gmejnow z Krabatowym regionom a z aktualnymi podawkami, kotrež so přichodne dny wotměwaja“, wuswětla městopředsyda towarstwa Steffen Mühl.
Woponowc (Wappenbaum) budźe na Krabatowych wikach a na torhošću w starym měsće widźeć. Potom chcedźa jón hač do přichodneho zarjadowanja składować.
Požohnowanje konjacych zapřahow w Chrósćicach je kóžde lěto ...
Krótkopowěsće (26.09.22)
Za wosebity Oscar nominowany
Budyšin. Šěrokopasmowy projekt Budyskeho wokrjesa je so do kónčneho koła European Broadband Award Komisije EU dóstał, kaž krajnoradny zarjad zdźěli. Budyšin je w kategoriji „Kwalita a přistupnosć posłužbow“ hromadźe z projektomaj z Awstriskeje a Letiskeje nominowany. Hač wokrjesej renoměrowane myto „Šěrokopasmowy Oscar“ spožča, wo tym jutře w Brüsselu rozsudźa.
Termin w kanclerskim zarjedźe
Berlin/Budyšin. Skupina hornjołužiskich firmownikow je hromadźe ze zapósłancom Sakskeho krajneho sejma Markom Šimanom (CDU) dźensa w zarjedźe zwjazkoweho kanclera w Berlinje na eksistencielne temy wuwića w Hornjej Łužicy pokazała. Popołdnju bě rozmołwa ze społnomócnjenym zwjazkoweho knježerstwa za wuchodnu Němsku Carstenom Schneiderom (SPD) předwidźana.
Kabinet jutře w Serbskim domje
Lěpše wuměnjenja docpěć
Nowotwar Kulowskeho depota wohnjoweje wobory postupuje
Sulšecy (AK/SN). Nawoda Kulowskeho twarskeho zarjada Stephen Rachel je na schadźowanju měšćanskeje rady w Sulšecach potwjerdźił, zo nowotwar Kulowskeho wohnjowoborneho depota na Třělnišću derje postupuje. „Wonkowny twar je dozhotowjeny, a bórze ma so fasada barbić.“ Za dwě njedźeli zahaja wuhotowanje wonkownych připrawow z plestrowanjom přijězda a parkowanišćow. Wjace dźěłać maja rjemjeslnicy hišće nutřka. Klětu w měrcu ma nowy depot hotowy być. Předewzaće je tuchwilu najwažniša twarska naprawa w měsće. Něhdźe połdra miliona eurow nałoža za planowanja a twar, nic pak wuhotowanje a wonkowne připrawy. Město Kulow wobdźěli so na cyłkownych kóštach z 500 000 eurami, po dalšich 500 000 eurow Swobodny stat Sakska a Zwjazk ze spěchowanskeho programa Socialne město (SSP). Z nowym depotom chcedźa wuměnjenja za wohnjowych wobornikow bytostnje polěpšić. W twarjenju su rumnosć za kubłanske zarjadowanja, kuchnja, běrowowe rumnosće a moderne předrasćernje zaměstnjene. Maja tam tež moderne sanitarne připrawy.
Policija (23.09.22)
Muža při wotbočenju přewidźała
Serbske Pazlicy. 37lětna wodźerka awta marki Dacia je srjedu dopołdnja w Serbskich Pazlicach do 18lětneho muža zrazyła. Při wotbočenju k sportnišću je wona muža na mopedźe marki Simson přewidźała, kiž do směra Njebjelčic jědźeše. Muža dowjezechu do chorownje. Wěcna škoda wučinja něhdźe 5 000 eurow.
