Kandidatow tónraz nimaja
Wosebita situacija do wudospołnjacych wólbow wjesneje rady
Trjebin (CK/SN). Poprawom by gmejnski wólbny wuběrk Trjebina njedawno dyrbjał wo přizwolenju kandidatow za wudospołnjace wólby wjesneje rady Miłoraza 23. oktobra rozsudźić. Z toho pak ničo njebu.
Z lěta 2017 změnjenymi hłownymi wustawkami Trjebinskeje gmejny bu wjesna rada Miłoraza na třoch čłonow pomjeńšena. Po komunalnych wólbach 2019 přisłušachu jej Ernst-Gerd Paufler, Detlef Rölke a Bernd Heinz. Paufler a Rölke so kaž mnozy druzy Miłoraženjo spočatk lěta přesydlištaj a njemóžetaj tuž w Miłorazu hižo k wólbam nastupić. Wudospołnjace wólby su po Sakskim gmejnskim porjedźe trěbne, dokelž sej někotre rozsudy dwutřećinowu wjetšinu žadaja. W juniju bě Trjebinska gmejnska rada termin wólbow na 23. oktober 2022 postajiła. Při tym bě wšitkim wobdźělenym hižo jasne, zo budźe hladajo na pokročowace přesydlenje wužadanje, scyła kandidatow namakać. To je so nětko wobkrućiło.
Sportownju bórze njetepja
Pančicy-Kukow (SN/MWj). Zakładna Šula Ćišinskeho w Pančicach-Kukowje budźe swoju sportownju w zymskim času jenož we wobmjezowanej měrje wužiwać móc, dokelž gmejna halu tepić njebudźe. Z tym reaguja na rozrosćace wudawki za energiju a płun a na žadanje, hdźežkuli móžno, energiju lutować, rozłoži wjesnjanosta Markus Kreuz (CDU) na posedźenju gmejnskeje rady minjeny štwórtk w Kašecach.
Na Krabatowe wiki do Wojerec
We Wojerecach so mjeztym 2. Krabatowe wiki přewjedu. Loni su prěnje tam přewšo wuspěšne byli. Nowe na lětušich wikach budźe, zo wotměja so we wobłuku lětušeho prěnjeho Krabatoweho tydźenja w Krabatowym regionje.
Wojerecy (KD/SN). Marketingowe towarstwo Swójbny region Wojerecy tele lěto 2. Krabatowe wiki organizuje, zo bychu w Starym měsće we Wojerecach na dušneho łužiskeho kuzłarja spominali. Powěsćowa figura Krabata kaž tež historsce dopokazana, Chorwat Jan Šajatović, staj po cyłym Krabatowym regionje znataj. Wiki zahaja njecyłej njedźeli so wotměwaceju Krabatoweho tydźenja. Organizaciju w horšći změje Krabatowe towarstwo, kotrež dźěła zhromadnje z marketingowym towarstwom Swójbny region Wojerecy. Wjeršk Krabatoweho tydźenja su mjez druhim 1. a 2. oktobra dźakny swjedźeń w Krabatowym młynje w Čornym Chołmcu a 3. oktobra dworowy swjedźeń na Krabatowym statoku w Jitku.
Projekt z ludnosću rozjimowali
We Wuskidźi je planowane kolije přepołožić rozšěrjenja wuhloweje jamy dla. Wjesnjenjo, tak je wobydlerski dialog nětko pokazał, zwuraznjeja swoje wobmyslenja. W Rěčicach su wjeseli, zo ćahi dale wosrjedź wsy zastawaja.
Wuskidź (CK/SN). Z Rychwałdskeje jamy nima so wuhlo dospołnje wudobywać. Tola je planowane, ju na wuchod rozšěrić. Za to je trjeba, železnisku čaru z Choćebuza do Zhorjelca po 13 kilometrach mjez Běłej Wodu a Rěčicami přepołožić. Planowanja běchu hižo 2018 z wobydlerjemi rozjimowali, z čehož su prěnjotnu wariantu wuwili. Wolóženi běchu wobdźělnicy njedawneho wobydlerskeho dialog ze zastupjerjemi předewzaćow Němska železnica (DB) a LEAG w Rěčicach, zo maja ćahi tež dale wosrjedź wsy zastać. Dźeń na to we Wuskidźi so někotři so starosćichu, zo powjedźe železniska čara přeblisko nimo jich ležownosćow a boja so wulkich poćeženjow hary, procha a střasenjow dla a z tym pomjeńšenja hódnoty jich imobilijow. Čujachu so zludani, zo njebuchu jich namjety k přepołoženju trasy wobkedźbowane.
Krótkopowěsće (13.09.22)
Myto młynej w Swinjarni
Nowe Jěžercy. Załožba Tykowany dom spožči lětsa 13. raz Myto tykowaneho domu za „pomnikoškitej wotpowědowace wobnowjenje“ twarjenjow w Němskej, Pólskej a Čěskej. Mjez cyłkownje pjeć wuznamjenjenymi imobilijemi je bywši Swinjarčanski wódny młyn. W lěće 1660 natwarjeny dom płaći jako „unikat“, kotrež bu runja „přisłušacym baroknym mólbam přikładnje saněrowany“.
Poměrnje niska incidenca
Budyšin. Z aktualnej incidencu 166 je tuta we wokrjesu Zhorjelc po Roberta Kochowym instituće sobu najniša w Sakskej. W minjenych 24 hodźinach registrowachu tam 112 nowych natyknjenjow z koronawirusom. Incidenca we wokrjesu Budyšin je dźensa 219,1 při 188 dalšich infekcijach. Wo dalšich smjertnych padach w Hornjej Łužicy rěč njeje.
Dźak wobornikam a pomocnikam
Zubnolěkarska praksa 30 lět
Městnosć skutkowanja wopytać
W lěće 1997 bu awtodróhowa mištrownja z Budyšina do Wósporka, hdźež bě nowotwar nastał, přepołožena. Zašłu sobotu swjećachu sobudźěłaćerjo a wopytowarjo 25. jubilej wobstaća.
Policija (12.09.22)
Njezbožo njewjedra dla
Nowe Bóšicy. Na statnej dróze S11 je pjatk popołdnju njedaloko Nowych Bóšic šoferka wosoboweho awta marki Opel na prawy bok z jězdneje jěła. Na to so jězdźidło přewali a awto wosta na třěše ležo. Čłonojo wohnjoweje wobory su žonu wuswobodźili. Na to dyrbjachu ju do chorownje dowjezć. Dróha běše něhdźe hodźinu za wobchad zawrjena.
W Bóšicach swjeća lětsa jubilej
Bóšicy (SN/MiR). W Bóšicach woswjeća lětsa cyle wosebite lěto. Wjesnjanosta Stanij Ryćer (Rjemjesło Bóšicy) rjekny: „Je tomu dokładnje 777 lět, zo bu wjes prěni króć naspomnjena. Z tejele přičiny chcemy 8. oktobra swjećić.“ Tak witaja wot dopołdnja w jědnaćich při gratowni wohnjoweje wobory na rańše piwko. Na zažnym popołdnju přepoda-dźa wobornikam nowe wohnjowoborne awto. Tež požohnowanje awta ma so wotměć. Wětrowčan a wěcywustojny znajer wsy a cyłeje Njeswačanskeje gmejny, serbski žurnalist Manfred Laduš, přednošuje wo stawiznach Bóšic. Cyły dźeń móža so dźěći na wšelke wašnje zabawjeć a wječor budu reje.
Wobydlerjam bliže a wjace prezency w přestrjeni
Wokrjes Zhorjelc chce z efektiwnym, wobydlerjam bliskim zarjadnistwom w přestrjeni sylnišo zastupjeny być. To je nowy krajny rada Stephan Meyer (CDU) při wotewrjenju wobydlerskeho běrowa w Běłej Wodźe podšmórnył.
Běła Woda (AK/SN). Nowy wobydlerski běrow je wot minjeneje wutory bjezbarjernje w pódlanskim wobłuku w přizemi tamnišeje radnicy přistupny. Dotal tam zaměstnjeny archiwowy wobłuk su do prěnjeho poschoda přepołožili. Po Lubiju, hdźež su tajke zarjadnišćo w septembrje 2020 wotewrěli, je Běłowodźanske druhe wot dohromady pjeć planowanych stejnišćow wokrjesa a wobstatk modernizowanskeho programa „wokrjes 4.0“. „To je naprawa we wobłuku strukturneje změny“, rozłoži Thomas Gampe, komornik a 1. přirjadnik krajneho rady. Za twarsku naprawu su 1,1 milion eurow nałožili, z čehož bě 90 procentow ze zakonja wo skrućenju strukturow Zwjazka, wokrjes je dźesać procentow přinošował.
