Krótkopowěsće (02.09.22)
Zwjazkowy kancler we Łužicy
Sprjewiny Doł. Na přeprošenje zwjazkoweho kanclera Olafa Scholza (SPD) chcychu so ministerscy prezidenća wuchodoněmskich brunicowych krajow dźensa k rozmołwje wo strukturnej změnje w Sprjewinym Dole schadźować. Tak měli so prěnje naprawy w zwisku ze strukturnej změnu bilancować. Wuchodoněmske kraje přeja sej za strukturnu změnu wjace dynamiki a zawjazliwosće.
Čoło zarjada zaso dospołne
Budyšin. Nowy Budyski krajny rada Udo Wićaz (CDU) a nowa přirjadnica dr. Romy Reinisch staj wčera swoje zastojnstwo nastupiłoj. Wićaz witaše na swojim prěnim terminje 22 nowych wučomnikow a na dalšim dr. Reinisch, kotraž měješe na to termin w Kamjencu. Udo Wićaz naslěduje Michaela Hariga (CDU) a Romy Reinisch Birgit Weber.
„Covidowy stołp“ z prašakami
Myto němsko- serbskej komunje
Dešno (HA/SN). W lětomaj 2021/2022 su 11. krajne wurisanje „Naša wjes ma přichod“ w Braniborskej přewjedli. Na nim je so 63 wsow a měšćanskich dźělow wobdźěliło, kotrež běchu te z najlěpšimi wuslědkami w 16 braniborskich wokrjesach. Wosebita wubědźowanska komisija je z nich w juniju 14 najlěpšich zwěsćiła.
Jich zastupjerjo běchu minjeny tydźeń do Dešna přeprošeni, zo bychu dobyćerjow počesćili. Znatu wjes w Bórkowskim zarjedźe běchu za to wuzwolili, dokelž bě před třomi lětami 10. krajne wubědźowanje dobyła. Wot lěta 1997 bě Dešno štyri króć wokrjesny dobyćer, 2020 dósta samo złotu medalju jako jedna z najlěpšich wsow 26. zwjazkoweho wubědźowanja. We wobłuku mytowanskeho zarjadowanja su wozjewili, zo zastupuje Dešno Němsku sobu na podobnym europskim wurisanju.
Policija (01.09.22)
Při płoće wisajo wostała
Dźěwin. Njekedźbliwosće dla bu předwčerawšim kolesowarka w Dźěwinje snadnje zranjena. 37lětna bě na chódniku Wjesneje dróhi do směra na Brězowku po puću, jako při płoće ležownosće wisajo wosta. Na to žona padny a so zrani. Jeje koleso suny so na jězdnju, hdźež runje w tym wokomiku traktor přijědźe a přez koleso zajědźe. Škoda wučinja něhdźe 600 eurow.
Łastojčku pokradnyli
Bambruch. Mopedy z časa NDR su po wšěm zdaću dale jara požadane, bohužel tež mjez paduchami. Tak je něchtó w rańšich hodźinach minjeneje wutory Łastojčku w Bambruchu pokradnył. Antracitowy Simson bě po informacijach policije něhdźe 3 000 eurow hódny. Policija nětko za paduchom pyta.
Podłu Klóšterskeje wody pućowali
Z historiskimi twaršćiznami
Pjeć prózdninskich domčkow blisko Krabatoweho młyna nastanje
Čorny Chołmc (AK/SN). Wuchodnje dožiwjenskeho dwora Krabatowy młyn w Čornym Chołmcu nastanje pjeć prózdninskich chěžow za swójby, kotrež hodźa so cyłe lěto wužiwać. 1,3 milion eurow ma projekt płaćić. Inwestor je Wojerowska bydlenska towaršnosć. W jeje nadawku Wobau Kulowska twarska towaršnosć připrawu z bjezbarjernym přistupom twari. Krabatowy młyn Čorny Chołmc ptzwr budźe jeje najenk a wobhospodar. Towaršnosć je z 85 000 eurami na projekće wobdźělena. Nowy domicil wotewrić chcedźa klětu 4. decembra, na dnju swjateje Borbory. „To je zhromadny projekt. Z nim reagujemy na stupace wopytowarske ličby. Prózdninske domčki njebudu jenož we hłownej, ale runje tak w pódlanskej sezonje wobohaćenje“, podšmórny Tobias Ćižik, jednaćel Krabatoweho młyna Čorny Chołmc ptzwr tydźenja při předstajenju projekta we Wojerecach.
Připad jemu wunošny radźićel był
Nimo dalšich insektow su předewšěm tež pčołki za přirodu nimoměry wažne. Často sej małe stworjenčka prawje wažić njewěmy. Tohodla so w lětnjej seriji na lokalnej stronje lětsa pilnym pčołkam a pčołarjam wěnujemy. (18)
W Nuknicy, wjesce z něhdźe 50 wobydlerjemi, narodźi so 1972 agilny Radworski pčołar Frank Wowčer. Za čas dźěćatstwa w dźensa nimale hišće ryzy serbskej wsy zboka rěčki Satkule je so jemu zašćěpiła kruta zwjazanosć z přirodu a k wšemu, štož je škita hódne, zo by so Boža stwórba we wšej swojej rjanosći a bohatosći zachowała. W staršiskim domje a w šuli w Chrósćicach, kotruž je 1989 z 10. lětnikom wuspěšnje zakónčił, bu kubłany k wědomemu serbskemu nastajenju. Husto přebywaše jako šuler pola swojeho dźěda Jurja Weclicha, kiž bě swój čas hižo nazhonity pčołar.
Za wotewrjenosć demonstrowali
Dobry srědk přećiwo emocionalnym diskusijam
Budyšin (CS/SN). Posedźenje Budyskeje měšćanskeje rady je wčera prěni raz nowowuzwoleny wyši měšćanosta Karsten Vogt (CDU) nawjedował. Jako so wón na swoje městno w prezidiju na žurli měšćanskeje rady posydny, wón rjekny: „Na stólcu sedźeć je to jedne, jón wupjelnić něšto druhe.“ Kak so wjelelětny šulski nawoda swojim nadawkam wěnuje, lubi nadźiju, zo so jemu to poradźi.
Prjedy pak hač so wón dnjowemu porjadej wěnowaše, su noweho wyšeho měšćanostu spřisahali a jemu 750 gramow ćežki hamtski rjećaz přepodali. Tónle nadawk přewza po słužbnych lětach najstarši měšćanski radźićel Heinrich Schleppers (CDU). Zo z Karstenom Vogtom w radnicy nowy wětřik zaćehnje, je hižo ryzy wonkownje na tym spóznać, zo bu parkowanska taflička za wyšeho měšćanostu při radnicy wotstronjena.
Krótkopowěsće (01.09.22)
Inowaciske myto dóstali
Choćebuz. Za wuwiće a konstrukciju wosebiteho 3D-ćišćaka je předewzaće MCR Engineering Łužyca, kotrež přisłuša koncernej Łužiska energija a milinarnje (LEAG), inowaciske myto wobłuka metal Braniborskeje dóstało. Wčera su wuznamjenjenje na Hrodźe Neuhardenberg přepodali. Z inowaciskim mytom hódnoći Braniborska kreatiwne ideje a produkty.
Graffiti sej wotnjesć móc
Praha. Festiwal twórcow graffiti „Off the Wall“ zarjadowachu minjeny kónc tydźenja w čěskej stolicy. 160 metrow dołha barokowa murja w historiskej štwórći Malá Strana bu wot sprayerow pomolowana. Tež pasanća móžachu ideje přidać. Škoda pak žana njenasta, dokelž bě murja do toho z wosebitymi zejmowacymi platami nakładźena. Tute chcedźa w septembrje přesadźować.
Serbowka w Americe
Policija (31.08.22)
Diesel wotklumpali
Słona Boršć. Prjedy hač so ćěriwa wot jutřišeho při tankownjach drje zaso podróša, su so njeznaći minjeny kónc tydźenja w Słonej Boršći na cyle hinaše wašnje z nimi zastarali. Woni podachu so na teren firmy při Słonoboršćanskej dróze a wotklumpachu z bagra, nakładowaka a dumpera dohromady něhdźe tysac litrow diesela. Kaž Zhorjelska policajska direkcija zdźěli, nasta potrjechenej firmje škoda něhdźe 2 100 eurow.
Padustwo zwrěšćiło
Wojerecy. Ze zadnjeho dwora na Wojerowskej Liebknechtowej chcychu njeznaći minjene dny elektroroler pokradnyć, štož pak so poradźiło njeje. Kaž dyrbješe wobsedźer předwčerawšim zwěsćić, bě zamk jězdźidła manipulowany, tak zo njehodźeše so wone hižo z klučom zaswěćić. Škoda wučinja 300 eurow.
