Halštrow. W nadawku Budyskeho wokrjesa twarja tuchwilu podłu wokrjesneje dróhi K 9239 mjez Halštrowom a Rušicu (Rauschwitz) kolesowansku šćežku. W tym zwisku je na kromje Halštrowa do směra na Rušicu wobchadna kupa za kolesowarjow předwidźana, zo dóstanu so woni z jednoho boka dróhi na tamny. Za trěbne twarske dźěła je dróha wot dźensnišeho hač do 19. awgusta za nadróžny wobchad dospołnje zawrjena. Wokołopuć přez statnu dróhu S 94 je wulkomyslnje wupisany. Z tym zwjazana je změna busowych čarow, štož měli wobydlerjo wobkedźbować.

Malešecy (SN). Wopyt muzeja, šiće měškow za pjelnjenje z lěwanćikom kaž tež wopyt dźiwadła – wšo to běchu temy minjeny tydźeń nahrawaneho podcasta rěčneho motiwatora Luciana Kaulfürsta w Přiwćicach. W ramiku prózdninskeho poskitka dojědźe sej dźesać holcow 1. do 4. lětnika Malešanskeho horta pod nawodom kubłarki Heleny Kralec z kolesom k radijowej staciji, kotruž je Lucian Kaulfürst loni zarjadował. Projekt lokalneho rozhłosa słuži spěchowanju serbskeje rěče w Malešanskej wokolinje a informuje wo zajimawych serbskich temach.

Jemu po boku bě rěčna motiwatorka Juliana Kaulfürstowa. Zhromadnje wuhotowaštaj wonaj jako hobby-rozhłosownikaj rjane dopołdnjo za holcy. Dźěći dožiwichu pisanu wotměnu mjez rolomaj moderatorki a technikarki. W serbskej a němskej rěči rozprawjachu wone wo swojich dotalnych prózdninskich dožiwjenjach a nazhonjenjach.

„Nóc tysac swěčkow“ syły wopytowarjow do klóšterskeje zahrody wabiła

Pančicy-Kukow (SN/MWj). Wot lěta 2006 přewjeduje Křesćansko-socialny kubłanski skutk (CSB) na zahrodźe klóštra Marijineje hwězdy „Nóc tysac swěčkow“. Ale telko wopytowarjow kaž předwčerawšim drje tam hišće dožiwili njejsu. Dźesatki metrow dyrbjachu so ludźo nastupić, prjedy hač móžachu zastup zapłaćić. Wotpowědnje dołhe běchu tež rynki při předawanskich wozach Wawrikec cateringa a Cyžec rěznistwa. Podobny bě wobraz pozdźišo před nuznikami, samo před mužacym.

Kónc wubědźowanja idejow

Budyšin. Wubědźowanje „Rěč zwjazuje – Rěc zwězujo – Sorbisch verbindet“ so nachila. Jenož hišće hač do jutřišeho móža zajimcy swoje ideje Załožbje za serbski lud posrědkować. Wobdźělnicy, kotřiž su hižo namjety zapodali, ale „techniskeho problema dla“ wobkrućenje njedóstali, měli so „wospjet pola załožby přizjewić, zo njeby so žana ideja zhubiła“.

Nowu klasu słóncow dopokazali

Heidelberg. Slědźerjam Centruma za astronomiju uniwersity Heidelberg je so z pomocu instrumentow Europskeje južneje hwězdarnje w Chile poradźiło, prěni raz „wuzutu hwězdu“ identifikować. Dotal ryzy hypotetisce klasifikowane objekty toho razu su „hwězdy, kotrychž hornje woršty su so nimale dospołnje pozhubili, tak zo hodźi so žro wobkedźbować“. Fachowcy nadźijeja so z wotkryćom „dopóznaćow nastupajo supernowy“.

Čěska chcyła němske tanki