Dobra powěsć za Helmec dwór
Hišće lětsa planuje Rakečanska gmejna dróhotwarske dźěła w Jitku
Rakecy (JK/SN). Z dobrej naladu je Jitkowčan Swen Helm njedawne posedźenje Rakečanskeje gmejnskeje rady wopušćił, hdyž je wot wjesnjanosty Swena Nowotneho (CDU) zhonił, zo so puć k Helmec Krabatowemu dworej w Jitku lětsa wobnowi. Tute předewzaće wšak steješe dlěši čas na hračkach a bě přičina zdźěla njelubych rozestajenjow mjez gmejnu a Helmec swójbu. Nětko pak namakachu prawy puć a tež móžnosć financowanja. To sobu zaruči, zo wostanje Krabatowy dwór dale magnet za turistow a předewšěm za zajimcow konjaceho sporta a ratarskeho žiwjenja. Helmec sami su hižo atraktiwnu a derje widźomnu taflu při puću k swojemu dworej nastajili.
Rakečanske sportowe towarstwo je wažny faktor gmejny za towaršnostne žiwjenje w gmejnje a regionje. Nimo kopańcy su w sportowym towarstwje aktiwni mjetarjo, kehelowarjo a blidotenisća. Zo móhli swój sport dale wukonjeć, ma gmejna wažne nadawki spjelnić a nimo pjenježneje podpěry tež zarjadnisku pomoc poskićuje.
Policija (24.03.23)
Na pohrjebnišću kradnył
Budyšin. Najprjedy njeznaty muž je předwčerawšim rano na pohrjebnišću Při měšćanskim nasypje w Budyšinje narownu platu a wobhrodźenje rowa pokradnył. Po pokiwje swědka lepi policija 41lětneho w jeho awće. W bagažniku namakachu zastojnicy něhdźe 60 króć 70 centimetrow wulku platu z bronzy a wobhrodźenje rowa z kopora. Při drogowym tesće so wukopa, zo steješe pólski staćan pod wliwom amfetaminow. Tuž dyrbješe wón krej wotedać, nimo toho jeho policajsce registrowachu. Kriminalny technikar při namakanych wěcach slědy zawěsći. Po dorěčenju ze statnym rěčnistwom skućićela z policajskeho rewěra pušćichu. Kelko škody je wón načinił, dotal znate njeje. Kriminalna słužba pad dale přepytuje.
Serbski muzej pyta fota
Budyšin. Za wustajeńcu „Čej’ da sy?“ pyta Serbski muzej hišće fota. Witane su motiwy serbskeje zhromadnosće, nałožkow, romantiskich blečkow abo dopomnjenkow na wosebity podawk. Zapósłać měło so foto (4 MB) z mjenom, titulom a krótkim komentarom hač do 31. měrca na . Kóždy ma šansu na překwapjenku. Rady móžeja so młodźi Serbja hišće wobdźělić na naprašowanju „Přichod serbskeje Łužicy“ pod .
Poskićuja dźěćacu drastu
Wukrančicy. Wulki bazar dźěćaceje drasty wotměje so jutře, sobotu, wot 9 do 12 hodź. we Wukrančicach (Weigersdorf), a to w gmejnskim domje bjezposrědnje pódla cyrkwje. 120 předawarjow je kamory swojich dźěći přehladało a drastu wupytało. Wopytowarjo maja składnosć dźěćacu drastu hač do wulkosće 176 kaž tež wuhotowanje za ćěšenki, črije, knihi a zabawne hry kupić. Wšitko je po wulkosćach a temach rjadowane. Z wunoškom drastoweho bazara zarunaja wudawki zarjadowanja a podpěruja projekty dźěćaceho a młodźinskeho dźěła.
Sprjewine město hotuje so na jutry
Budyšin (CS/SN). Dźakowano rjanemu wjedru je loni něhdźe 40 000 ludźi jutry do Budyšina přijěło. Tajkeje rekordneje ličby nadźijeja so akterojo z nutřkoměšćanskeho a turistiskeho towarstwa tež lětsa. Wězo přićahuja wosebje křižerjo a jejkakulenje na Hrodźišku turistow do sprjewineho města. Wobě towarstwje pak so wo to prócujetej, zo njebychu turisća hnydom zaso domoj jěli, ale dlěje wostali, kaž zamołwići wčera na nowinarskej rozmołwje zdźělichu.
Tohodla organizuja wjacore jutrowne wiki na Hłownym torhošću, w rozwalinje Mnišeje cyrkwje, při Hamorskim młynje a za čas jejkakulenja na Hrodźišku. Tam Heiko Harig jako Jejkacy Handrij dźěći k jejkakulenju přeprošuje. Hnydom pódla na jewišću předstajitej Serbski ludowy ansambl a Němsko-Serbske ludowe dźiwadło kulturny program. Na jewišću pokazaja nimo toho krótke filmy, w kotrychž turistam rjanosće města předstaja.
W twarjenju zarjadniskeho zwjazka Při Klóšterskej wodźe w ...
Kónčne dźěła do noweje sezony
Wjerćimy zaso na časniku
Krótkopowěsće (24.03.23)
Slepjanki a křižerjo pódla
Drježdźany. Přehladku „Kak domizna klinči? Dokumentariska instalacija“ je statna ministerka za kulturu a turizm Barbara Klepsch (CDU) dźensa w Muzeju za sakske ludowe wuměłstwo wotewriła. W slědźe 3 „Wěra“ zhoni wopytowar wo spěwanju křižerjow a wo jutrownym spěwanju w Slepjanskej wosadźe. Tež slěd 2 „Změna“ bu we Łužicy natočeny.
Kandidatow wuzwolili
Drježdźany/Waršawa. Njewotwisna jury je kandidatow za lětuše wuznamjenjenje z Němsko-pólskim žurnalistiskim Mytom Tadeusza Mazowieckeho wuzwoliła. Z dohromady 150 zapodatych namjetow nominowachu cyłkownje 29 w kategorijach print, rozhłós, telewizija, nowe medije a lokalny žurnalizm. Serbski abo Serbow tematizowacy přinošk tónraz finale docpěł njeje.
Wjelči nadpad jenož łža?
Krótkopowěsće (23.03.23)
105 padow tuberkulozy
Drježdźany. Ličba na tuberkulozy schorjenych w Němskej a Sakskej po koronje zaso přiběra. Składnostnje jutřišeho swětoweho dnja tuberkulozy sakska socialna ministerka Petra Köpping (SPD) rjekny, zo jewi so chorosć tež we wysoko wuwitych krajach. W Sakskej bě loni 105 přizjewjenych padow tuberkulozy płucow.
Za přichod Korzymskeje termy
Budyšin. Wokrjes Budyšin je Zaměrowemu zwjazkej Korzymska terma přistupił. To je wokrjesny sejmik ze schwalenjom nowych zwjazkowych wustawkow na posedźenju minjenu póndźelu wobzamknył. To je wažne wuchadźišćo za to, zo móža saněrowanje tuchwilu zawrjeneje kupjele zeskutkownjeć. Najprjedy pak dyrbja požadanje wo trěbne spěchowanske srědki přiměrić. Saněrowanje płaći 27 milionow eurow.
Kelko ludźi je w Praze žiwych?
