Swjedźenski ćah budźe wjeršk
Dźakowano zapiskej w knize swjeća w Klětnom kulowaty jubilej
Klětno (AK/SN). Ze swjedźenskim tydźenjom swjeći Klětno tele dny swoje 800lětne wobstaće. Wjeršk budźe 8. oktobra w 14 hodź. swjedźenski ćah wot sportnišća hač k parkej. Na nim wobdźěla so wobydlerjo, domjace firmy, zastupjerjo cyrkwjow a towarstwa. Hižo předwčerawšim přewjedźechu forum wo zašłosći a přichodźe Łužicy. Dale na programje steja swójbne popołdnjo, młodźinska diskoteka a zakónčaca ekumeniska nutrnosć 9. oktobra. Ju wuhotujetej ewangelska a samostatna ewangelska wosada. Cyłkowny swjedźenski tydźeń organizuje Klětnjanske wobydlerske towarstwo, kotrež móže so při tym na spěchowanje kulturneje załožby Swobodneho stata Sakskeje złožować.
Zajimawe popołdnjo při domje kata
Łuh (ML/SN). Mjez Łuhom a Chasowom bě so minjenu njedźelu popołdnju na 800 wćipnych ludźi zhromadźiło. Njeswačanske towarstwo přećelow kultury a domizny bě na dźeń wotewrjenych duri nowo natwarjeneho a restawrowaneho domu kata a wětrnika na kózłach ze spočatka 18. lětstotka přeprosyło. Handrij Wirth a Arnd Matthes po dozhotowjenym domje kata a po wětrniku wodźeštaj. Chróšćanscy hercy starachu so ze serbskimi, němskimi a čěskimi melodijemi wo dobru naladu.
Dom kata su před dwěmaj lětomaj z Lišeje Hory na nowu městnosć přesadźili. Fachowcy z Rudnych horinow jón restawrowachu. W Lišej Horje bydleše w twarjenju hač do spočatka 19. wěka swójba kata. Katownja bě jenička na kraju w Sakskej. Njeswačanske knjejstwo měješe sudnistwo na starosći a k smjerći zasudźenych dyrbješe kat wotprawić. Nimo toho dyrbješe wón juchowe jamy na knježim dworje wurjedźić a bě tohorunja drač. W lěće 1658 so prěni króć kat w Lišej Horje naspomni. W ludowej powěsći wo dobrym kuzłarju Krabaće jewi so tež kat Bundermann, kotryž dyrbješe zapřisahancow přećiwo Awgustej Sylnemu w Drježdźanach wotprawić.
We Wojerowskej bydlenskej štwórći VI je nětko zaso metalowa ...
Krótkopowěsće (06.10.22)
Festiwal z „Dnjom Ukrainy“
Choćebuz. Z 13 filmami z Ukrainy a třomi wo njej je wot Ruskeje nadpadnjeny kraj lětsa we wšěch sekcijach Choćebuskeho filmoweho festiwala sylnje zastupjeny. Mjez nimi wobdźěla so tři přinoški na wubědźowanjach. We wobłuku lětušeho 32. festiwala steji 11. nowember pod hesłom „Dźeń Ukrainy“. Na nim přizamknjetej so dwěmaj filmomaj rozmołwje režiserow z publikumom, dale stej podijowej rozmołwje planowanej.
Pječat EU za Picnjanskeho karpa
Brüssel. Picnjanski karp je w přichodźe z pochadowym pječatom EU škitany. Wón smě so podobnje kaž Champagner abo Błótowske kórki jenož we wěstym geografiskim regionje plahować. W konkretnym padźe je to Braniborska. Wo tym je Europska komisija wčera w Brüsselu informowała. Kaž dale rěkaše, wuznamjenja so mjaso Picnjanskeho karpa přez swój charakteristiski słód a aromatisku wóń.
AWO z wobhospodarku
Łužiski Stonehenge rozłožił
Bio-běrny w srjedźišću stali
Čestnohamtskich bóle zapřijeć
Wojerecy (AK/SN). Prezentuja so jednotliwe Wojerowske towarstwa přichodnje w měšćanskej radźe? Wo tym diskutowachu radźićeljo na swojim zašłym posedźenju. Wuchadźišćo bě namjet frakcije CDU, zo měło so wot přichodneho lěta na kóždym posedźenju parlamenta jedne towarstwo předstajić. Za to měł so kruty dypk dnjoweho porjada zawjesć, kiž njeměł dlěje hač dźesać mjeńšin trać. „Tak móhli čestnohamtske dźěło sylnišo hódnoćić“, měnješe předsyda frakcije Frank Hirche.
„Zaměr je prawy, puć pak mamy za wopačny“, znapřećiwi předsyda frakcije Lěwicy Ralf Haenel. Wažniše hač termin w měšćanskej radźe je, towarstwa cyłe lěto přewodźeć a je spěchować. Haenel namołwješe porno tomu wožiwjenje wikow móžnosćow. Wyši měšćanosta Torsten Ruban-Zeh (SPD) so prašeše, hač njeměli so radźićeljo skerje na zarjadowanjach towarstwow wobdźělić a tam kontakty wudźeržować? Dalši radźićeljo zwuraznichu wobmyslenja hladajo na wulku ličbu towarstwow w měsće. Skónčnje wjetšina čłonow parlamenta namjet frakcije CDU wotpokaza.
Předstaja Serbsku protyku
Budyšin. Ludowe nakładnistwo Domowina přeproša štwórtk, 6. oktobra, na knižnu premjeru „Serbskeje protyki 2023“. W Budyskej Smolerjec kniharni předstaja redaktor Pětr Šołta a awtorojo jednotliwych přinoškow nowostku, kotrejež tematiske ćežišćo tworja „stawiznički a powěsće, zajimawostki a překwapjenki kołowokoło Budyskich horow“. Zarjadowanje započnje so w 19 hodź.
Jutře rěčna hodźina
Kamjenc. Zapósłanc Sakskeho krajneho sejma Alojs Mikławšk (CDU) změje jutře, štwórtk, dalšu wobydlersku rěčnu hodźinu. Wot 13 do 16 hodź. změja wobydlerjo we wólbnym běrowje na Kamjenskej Zapadnej čo. 4 składnosć swoje naležnosće přednjesć. Termin dojednać móža sej woni pod telefonowym čisłom 03578 305383 abo pod . Za wobydlerske naležnosće je běrow wot póndźele do pjatka stajnje wot 8 do 14 hodź. docpějomny.
Wódny muž na pućowanju
Policija (05.10.22)
Padustwu zadźěwał
Jaseńca. Kedźbliwy sobudźěłaćer firmy je wčera rano w Jaseńcy padustwu diesela zadźěwał. Něhdźe w 5 hodź. wuhlada wón na terenje zawoda njeznatu wosobu, kotraž chcyše z twarskich mašinow diesel wotklumpać. Sobudźěłaćer pozdatneho skućićela narěča, na to njeznaty ćekny. Po prěnim přepytowanju policije žana wěcna škoda nastała njeje, w mašinach tež žadyn diesel njepobrachuje.
Serbska literatura zapřijata
Nowa měšćanska biblioteka ze swjedźenskim kóncom tydźenja přepodata
Kamjenc (SN/MWj). Z tři dny trajacym swjedźenjom su wot minjeneho pjatka hač do njedźele nowu Kamjensku měšćansku biblioteku „Gottholda Ephraima Lessinga“ swojemu zaměrej přepodali. Zaměstnjena je wona w nowym twarjenju Lessingoweho gymnazija. Zo su měšćanscy a wokrjesni radźićeljo před wjace hač štyrjomi lětami tole zmužiće rozsudźili, mjenowaše wyši měšćanosta Roland Dantz „krok lětstotka“. Na te wašnje zaručichu cyłkowny projekt nutřkoměšćanskeho gymnazialneho městna. Do njeho inwestowachu dohromady něhdźe 27 milionow eurow, z čehož dóstachu něhdźe 19 milionow eurow z europskeho fondsa za regionalne wuwiće spěchowane. Wudawki za biblioteku wučinjachu nimale tři miliony eurow, spěchowane z něhdźe 870 000 eurami.
