Něhdźe 300 wobydlerjow Wojerec a wokolnych wsow je so dotal na wothłosowanju wo lětušim wobydlerskim etaće wobdźěliło. Zajutřišim změja ludźo přidatnu móžnosć, swój hłós wotedać.

Wojerecy (SN/MWj). Mjeztym dwaj tydźenjej traje we Wojerecach doba wothłosowanja wo wobydlerskim etaće 2023. Wobydlerjo města a pjeć wjesnych dźělow móža so mjez cyłkownje 37 wšelakimi namjetami rozsudźić. Z třomi hłosami móža so woni za swojeho faworita wuprajić abo swoje hłosy na wjacore projekty rozdźělić. Hišće hač do 25. meje maja wobydlerjo tak składnosć, sobu postajić, što ma w měsće a na wsach noweho nastać, rěka w nowinskim wozjewjenju měšćanskeho zarjadnistwa. Něhdźe 300 ludźi je dotal wothłosowało. Hłosowanske lisćiki maja na zarjadnistwach města a wsow, w centrali mobility, w bibliotece a we wobydlerskim centrumje. Online móža zajimcy na stronach města tohorunja wothłosować. Přidatna móžnosć budźe zajutřišim, njedźelu, wot 15 do 18 hodź. na Łužiskim naměsće, hdźež wotměje so zarjadowanje „Wojerecy su pisane“.

Budyšin (SN). Dohromady 312 000 eurow ze spěchowanskeho programa kraja Sakskeje „Najlubše městno za kóždeho“ je krajnoradny zarjad Budyskeho wokrjesa wčera rozdźělił. „Pjenjezy maja so wosebje za inwesticije za bjezbarjerny wobswět we wokrjesu nałožować“, pisa zarjad we wotpowědnej zdźělence. Tež wokrjesna społnomócnjena za zbrašenych Franziska Pohling běše na pose­dźenju přitomna.

Na kóncu móžeše krajny rada Udo Wićaz (CDU) dohromady 16 projektam, kotrež běchu so wo spěchowanje požadali, powěsć wo přiražce zdźělić. Mjez druhim je to Kamjenske měšćanske zarjadnistwo, za přetwar na bjezbarjerne zachodne durje k tamnišej turistiskej informaciji. Tež Kulowske měšćanske zarjadnistwo dóstanje pjenjezy za natwar bjezbarjerneho nuznika w Sulšećanskim kulturnym domje. „Krabatowy dwór“ w Jitku móže z přiražku bjezbarjerowe přistupy k zjawnym dźělam ležomnosće wutwarić a hosćenc „Łužničanski dwór“ we Łužnicy móže dźakowano spěchowanju nowy schodowy lift kaž tež rampu k zachodej zatwarić.