Krótkopowěsće (31.05.23)
Ekstremistka zasudźena
Drježdźany. Wyše krajne sudnistwo w Drježdźanach je dźensa pozdatnu lěwicarsku ekstremistku Linu E. wjacorych nadpadow na prawicarskich ekstremistow dla k jastwu pjeć lět a třoch měsacow zasudźiło. Třo dalši wobskorženi dyrbja dwě a tři lěta do jastwa. Přiwisnicy zasudźeneje w sudniskej žurli wótře přećiwo wusudej protestowachu. 28lětnej studentce wumjetuja kriminelnu namóc.
Lědma mjenje bjezdźěłnych
Budyšin. W meji běše we wuchodnej Sakskej 19 020 bjezdźěłnych, 329 resp. 1,7 procentow mjenje hač w aprylu. Kaž Budyska wotnožka Zwjazkoweje agentury za dźěło dźensa informuje, su słabeje konjunktury dla w róžowniku mało hibanja na tudyšich dźěłowych wikach zwěsćili. Zawody swój personal dźerža. Ličba přizjewjeneje bjezdźěłnosće je porno aprylej dale spadowała.
Ličba kurjakow woteběrała
Hormony w prawej měrje
„Posłuchaj lěkarja, prjed hač jeho trjebaš!“, serbske přisłowo namołwja.
Tuž wěnuje so student mediciny Pětr Dźisławk znatym a mjenje znatym chorosćam, zo by je čitarjam trochu bliže rozłožował (21).
Přimńće sej raz kedźbliwje za šiju na wysokosći kyrka. Tutón nadeńdźeće tam, hdźež maja mužojo mjenje abo bóle prominentnje so jewjacy wohryzk. Kyrk při póžěranju tež horje a dele pućuje. Hnydom pod kyrkom čujeće mjechki organ, kiž je za mnoho procesow čłowječeho ćěła wažny, husto pak nažel tež zawinowar chorosćow: tarčowu žałzu. Wona produkuje hormony, kiž postajeja rytmus přeměny maćiznow w ćěle. Bjez tarčoweje žałzy by runowaha tychle procesow mylena była.
W Pančicach błyskač rozbuchnyli
Policija (30.05.23)
W bydlenskim wozu kradnyli
Kamjenc. Hdyž cirkus do města přijědźe, je to zwjetša z wulkim wjeselom za wobydlerjow zwjazane. W Kamjencu zaběra so policija porno tomu w tym zwisku z kriminelnym deliktom. Sobotu popołdnju dóstachu so njeznaći w Lessingowym měsće na teren cirkusa na Weißmantelowej a zadobychu so do bydlenskeho woza. Z njeho pokradnychu 15 000 eurow kaž tež časniki w hódnoće něhdźe 5 000 eurow. Nimo toho načinichu něhdźe 3 000 eurow wěcneje škody, kaž w rozprawje Zhorjelskeje policajskeje direkcije rěka. Kriminalisća nětko za skućićelemi pytaja.
Serbski čitanski dyrdomdej
Młodostni so we wobłuku akcije angažowali
Nowa parlička za Chelno
Wjace hač 370 wobydlerjow Chelna pola Radworja ma hižo wot decembra zašłeho lěta nowy towarstwowy dom. Hakle nětko su jón ze swjatočnym aktom oficialnje přepodali.
Chelno (WL/SN). Po historiskim kulojtym domje je Chelno w Radworskej gmejnje wo dalšu parličku bohatši. Tole rjekny zapósłanc Sakskeho krajneho sejma Marko Šiman (CDU) při oficialnym přepodaću wjesneho towarstwoweho domu. Nimale dodźeržanu gratownju wohnjoweje wobory na zbožo wottorhali njejsu, ale jemu druhu šansu dali.
Swjatki zhromadnosć knježiła
Wěriwi ze wšitkich serbskich wosadow do Róžanta putnikowali
Róžant (SN/MWj). Kóždolětne putnikowanje serbskich katolskich wěriwych swjatkownu póndźelu do Róžanta je někak tři tysac wěriwych k hnadownemu městnu přićahnyło. Zdźěla z wosadnych wsow, zdźěla tež z dalšich městnow putnikowaše dźesać procesionow, na čole z chorhojemi a družkami, kotrež njesechu postawu maćerje Božeje. Mnozy rjane wjedro wužichu a sej z kolesom do Róžanta dojědźechu, druzy wostajichu awta we wokolnych lěsach stejo a posledni čwak nóžkowachu.
Na putniskej łuce bě wočiwidne, zo bě lětsa wjace kemšerjow hač hewak. Samo wot wołtarnišća trochu zdaleniše wobłuki běchu z wjele putnikami wobsadźene. Hłowny celebrant bě Budyski farar Wito Sćapan. Kemše wobrubił je projektny dźěćacy chór, kiž je loni spěwohru „Z Tobu – Bohu swjećene lěto“ sobu wuhotował. Nawod měješe Měrćin Weclich. Kěrluše přewodźała je kapała Horjany z hosćimi pod nawodom Jurja Hejduški.
Wulki nawal w Kromoli
Krótkopowěsće (30.05.23)
Župne literarne wubědźowanje
Choćebuz. Župa Delnja Łužica je literarne wubědźowanje „Přećeljo – pismiki – prominentni“ zahajiła. Wubědźowanje je wšitkim delnjoserbskim prócowarkam a prócowarjam wěnowane, kotřiž lětsa jubilejne posmjertne narodniny swjeća. Wo tym je Bramborske serbske radijo rozprawjało. Basnica a redaktorka Mina Witkojc kaž tež farar a sobuzałožer Domowiny Bohumił Šwjela staj dwajo z nich.
Nowa nawodnica
Worklecy. Worklečanske dźěćace dnjowe přebywanišćo „K wódnemu mužej“ změje wot 1. julija 2023 nowu wjednica. Gmejna Worklecy, jako nošerka žłobika, pěstowarnje a horta je so za 25lětnu Vanessu Kralowu z Kinsporka rozsudźiła. Z tym mnohe lěta w zarjadnišću jako kubłarka a komisariska nawodnica skutkowaca Monika Lejnertowa bórze swojej naslědnicy zamołwitosć přepoda.
Dołhe rynki jězdźidłow na A4
