Nakupowanska nóc přiwabiła
Wuspěšnu dožiwjensku nóc – znajmjeńša hladajo na mnóstwo wopytowarjow – registrowachu wikowarjo minjenu sobotu w Budyskim nutřkownym měsće, hdźež witachu na 20. nakupowansku nóc „Romantica“.
Budyšin (CS/SN). Nakupowanska nóc Romantica, kotraž steješe pod hesłom „Shopping-safari“, přiwabi minjenu sobotu tysacy wopytowarjow do Budyšina. Sčasami bě na hasach a naměstach telko wopytowarjow, zo bě lědma móžne so dale pohibować. Při předawanišćach za napoje a kulinariske speciality nastachu dołhe čakanske rynki. W poskitku mějachu nimo dalšich napojow samo hižo dohodowne swětłe a čerwjene horce wino. Něhdźe 160 wobdźělenych wikowarjow so prócowaše, swojim hosćom něšto wosebite skićić, kaž na přikład črijowy dom Mutscher na Karla Marxowej, kiž bě swój wobchod jako dźungl wuhotował. Wša dekoracija pak njemóžeše zakrywać, zo su na Karla Marxowej mnohe wobchody njewužiwane a prózdne.
Na beneficny hudźbny nyšpor přichwatachu zajimcy minjenu njedźelu ...
Nowe wobličo za bydlenski kompleks IX
Na nowy, moderny a kompaktny bydlenski kwartěr z wobchodami chcedźa kónčinu „Nowa Kinajchtska hola“ we Wojerowskim bydlenskim kompleksu IX wuwić. To je wyši měšćanosta Torsten Ruban-Zeh (SPD) minjenu srjedu w Zusowym měsće podšmórnył.
Wojerecy (AK/SN). Město Wojerecy, bydlenska towaršnosć Wojerecy tzwr a tamniše bydlenske drustwo LebensRäume chcedźa kónčinu zhromadnje wuwić. Předwidźane su wosebity wikowanski areal, měšany wobłuk a powšitkowna bydlenska štwórć. Kompleks chcedźa 2024 wotewrěć. Nimale 25 milionow eurow cyłkowna inwesticija wučinja. Firma halsdorfer+ingenieure projekt GmbH z Burgdorfa pola Hannovera je wuwiwar předewzaća.
Krótkopowěsće (08.11.22)
Pop raz hinak
Budyšin. Wosebite hudźbne chłóšćenki poskića serbska hudźbna skupina Brankački. W kooperaciji z radijowym sćelakom MDR Jump poskićeja jako skupina Popsorben na Instagramje hudźbny kwis z coverami znatych spěwow w stilu polki.
Nowy wučer za kurs čěšćiny
Chrósćicy. Nowy rěčny kurs čěšćiny je wčera w Chrósćicach z nowym wučerjom Jiřijom Jonákom startował. Wón je naslědnik Jana Breindla, kotryž bě dotal w nadawku Rěčneho centruma WITAJ dźěći kaž tež dorosćenych w čěšćinje wuwučował. 47lětny Jiři Jonak pochadźa z Ústíja nad Labem a je w minjenych 16 lětach w Brüsselu wuwučował.
Hišće njerozjasnjene prašenja
Drježdźany. Na wčerawšim 3. sakskim energijowym wjeršku zastupjerjow sakskeho knježerstwa a zwjazkow wšelakich branšow běchu hišće wotewrjene prašenja nastupajo zwoprawdźenje wot Zwjazka planowanych wolóženjow k złahodnjenju energijowych płaćiznow. Hospodarski minister Martin Dulig (SPD) připowědźi podpěru swobodneho stata, dyrbjał-li pomocny fonds Zwjazka za małe a srjedźostawske předewzaća hišće dźěry wotkryć.
Krótkopowěsće (07.11.22)
Fachowe zetkanje dźiwadłow
Brest. Na zetkanju mjezynarodneho mjeńšinoweho dźiwadłoweho projekta „Phōnē – mjeńšinowym rěčam hłós dać“ minjeny kónc tydźenja w francoskim Bresće wuradźowachu zastupjerjo marketingowych wobłukow wobdźělenych jewišćow wo „komunikaciskich strategijach“ a předstajichu internetowu stronu projekta. Reprezentantka Němsko-Serbskeho ludoweho dźiwadła bě Anna Měrćinowa.
Inwestuja něhdźe miliardźe eurow
Choćebuz. Za planowane zaměstnjenje medicinskeje fakulty z dohromady 60 profesurami a wutwar komunalneje Carla Thiemoweje chorownje w Choćebuzu na uniwersitny klinikum maja so 1,9 miliardow eurow ze strukturneho fondsa Zwjazka za brunicowe regiony nałožować. Projekt je dźěl wutworjenja modeloweho regiona „Strowota Łužica“.
Myta Grünbauma spožčili
Gmejna dale wužadana
W Njebjelčicach pytaja za móžnosćemi, komunu na prawy, nowy puć přinjesć
Njebjelčicy (JK/SN). Dnjowe porjady posedźenjow Njebjelčanskeje gmejnskeje rady bywaja wot posedźenja k posedźenju stajnje wobšěrniše. Wčerawše wopřiješe cyłych 20 dypkow. Byrnjež na próstwu zastupowaceho wjesnjanosty Thomasa Klara dwaj dypkaj šmórnyli, sedźachu radźićeljo daloko do nocy, zo bychu wšitke temy rozjimali a wuradźowali. Dominowace temy běchu energija a přemysło kaž tež financny staw komuny.
Policija (04.11.22)
Wandalizm na wosobowym awće
Wojerecy. Njeznaći su w nocy na srjedu wosobowe awto marki Mercedes na Bonhoefferowej we Wojerecach wobškodźili. Wandalojo su so na wonkownymaj špihelomaj a wobručach awta z hwěžku wucychnowali, nastata škoda wučinja po podaću mějićela 1 500 eurow. Kriminalna słužba je přepytowanje přewzała.
Swójske ratarjenje předstajiłoj
Bě to zajimawy wječor, na kotryž běštaj Matkec bratraj Pawoł a Beno minjeny pjatk na swój ratarski dwór w Konjecach přeprosyłoj. Jako „Gebrüder Matka GbR“ wonaj něhdźe połsta zajimowanym rozłožištaj, na kotre wašnje rolu wobdźěłujetaj a kotre mašiny a techniske nastroje při tym wužiwataj. Jeju hłowna motiwacija je pódu samu dźěłać dać a jej najlěpše wuměnjenja za to skićić. Za to zepěrataj so na přikład na wudźenki, kotrež pódu z podzemskimi tunlemi mjelnja a tak kanalowy system za zasaknjenje dešća twarja.
Bratraj wusywataj, bjeztoho zo z mašinami pódu wobdźěłujetaj. Nimo toho staj sobu prěnjej, kotrajž juchu z hadźicu na polo klumpataj. Woboje je dalša inowacija moderneho ratarstwa. Nimo techniki leži ćežišćo sobu na naslědnym wašnju ratarjenja – pódu před wuschnjenjom škitać a wutki na přirodne wašnje z mjezypłodami aktiwować. Wosebje wočiwidne bu to w zhromadnym dźěle z pčołarjemi, jako Matkec bratraj rozjasništaj, kak mjezsobna komunikacija kóždemu wobłukej pomoc skići.
Přewšo snadnuške wothłosowanje
Budyšin (CS/SN). Dźensa wječor budźe premjera „Budyskich narěčow“ w tachantskej cyrkwi. Prěni rěčnik budźe Wolfgang Tiefensee (SPD), durinski hospodarski minister. Wo spěchowanju noweho rjadu zarjadowanjow, kotryž Spěchowanske towarstwo ekumeniskeho tachantskeho wobchoda organizuje, je financny wuběrk Budyskeje měšćanskeje rady na swojim posedźenju minjenu wutoru wothłosował. Organizatorojo běchu próstwu wo podpěru 4 700 eurow zapodali. Radźićel AfD Sieghard Albert je k tomu někotrežkuli znapřećiwił. Wón njerozumi, zo trjebaja financny wuběrk jenož hišće k „wotnygowanju“ sumy, wšako su zrěčenja hižo wotzamknjene. Zo pak su organizatorojo politikarku FDP Marie-Agnes Strack-Zimmermann přeprosyli, předsydku zakitowanskeho wuběrka zwjazkoweho sejma, nic jenož pola radźićela Alberta ryze stróžele wubudźa. Rěč bě wo tym, zo je wona čista brónjenska lobbyistka, kotraž so za dodawanje bróni zasadźuje.
