Najwjace hłosow za ławki
Prioritna lisćina za wobydlerski etat 2023 města Wojerec zestajena
Wojerecy (SN/MWj). 923 wosobow je so wotsrjedź apryla hač dosrjedź meje we Wojerecach na wothłosowanju wo wobydlerskim etaće lěta 2023 wobdźěliło. Tole je měšćanske zarjadnistwo tele dny zdźěliło, po tym zo bě dźěłowa skupina wšitke dochadźane hłosy zličiła a wuhódnoćiła. Tak nasta prioritna lisćina za město same kaž tež za wjesne dźěle Brětnja/Michałki, Němcy, Hórnikecy, Čorny Chołmc a Ćisk. Wobydlerjo móžachu z cyłkownje 37 namjetow wuběrać, 19 z toho za město same.
Najwjace hłosow, mjenujcy 278 dósta namjet „Ławki za gmejnu Němcy“. Najwjace hłosow za město dósta namjet „DVD k projektej ‚Dźěćatstwo w měsće z najwjace dźěćimi NDR‘“, za kotryž so 267 ludźi wupraji.
Plany dotal jenož na papjerje
Žarki (UM/SN). Klukšanski Aeroteam chce bywše sportnišćo w Žarkach we Wulkodubrawskej gmejnje wužiwać jako stanowanišćo za wopytowarjow zarjadowanjow, kotrež towarstwo wuhotuje. Kaž čłon předsydstwa towarstwa Holger Wießner rozłoži, słužeše za to dotal łuka na terenje towarstwa. Tam pak su kapacity wobmjezowane. Dotal wšak njejsu płujadłowi sportowcy hišće jako wobsedźer sportnišća w ležownostnej knize zapisani.
We Wulkej Dubrawje su dróhi na taflach wšitke přikładnje ...
Projekt za awtonomne jězdźenje we Wojerecach zahajili
Wojerecy (AK/SN). Změna strukturow je we Wojerecach dale a widźomniša. Hižo kónc apryla bu kontaktny běrow za projekt „SivaS – wěstota w splećenym a awtomatizowanym wobchadźe“ wotewrjeny. „Běrow ma so nětko ze žiwjenjom pjelnić. W nim móža zajimcy swoje nazhonjenja wuměnjeć, informacije dóstać a sobu na projekće slědźić“, sobudźěłaćer běrowa Sebastian Schindler minjeny pjatk we Wojerecach podšmórny. Tam su zamołwići SivaS projekta oficialnje we wobydlerskim centrumje zahajili.
Kontaktny běrow na Bonhoefferowej dróze njeměł wobydlerjow jenož informować, ale tež dźěłarnički, projektne dny za šulerjow, měšćanske wodźenja za wědomostnikow, jězby žurnalistow a dale terminy organizować. „Předewšěm měł so labor za sobuskutkowanje zarjadować a aktiwny partner za změnu strukturow być“, Sebastian Schindler zwurazni. SivaS je projekt Drježdźanskeje Techniskeje uniwersity, firmy za systemowe daty jězdźidłow FSD a města Wojerec, při čimž zwjazkowe ministerstwo za digitalizaciju a wobchad akterow financielnje spěchuje.
Krótkopowěsće (20.06.23)
Dalše myto Rushdiejej
Frankfurt n. M. Salman Rushdie je z lawreatom lětušeho Měroweho myta němskeho knihikupstwa. Wuznamjenjenje spožčace Bursowe towarstwo němskeho knihikupstwa počesći awtora, kiž „najebać wosobinske wohroženje a lońši atentat nadal hłuboko čłowjesce pisa“, za jeho „njepowalnosć, jeho haj k žiwjenu a za to, zo wón ze swojej radosću nad powědanjom swět wobohaća“.
Bydlić nad Šibojskim jězorom
Sprjewiny Doł. Gmejna Sprjewiny Doł smě za wuwiće bydlenskeje kónčiny při Šibojskim jězoru přichodne kročele zawjesć. Wo tym je Krajna direkcija Sakskeje wčera informowała. Z tym je wotchilenje wot cilow rjadowanja rumow móžne. Předewzaće chcedźa na sewjernym pobrjoze blisko Bórka zwoprawdźić.
„Popjelawka“ na znamkach
W lěću so před klěšćemi prawje škitać
„Posłuchaj lěkarja, prjed hač jeho trjebaš!“, serbske přisłowo namołwja.
Tuž wěnuje so student mediciny Pětr Dźisławk znatym a mjenje znatym chorosćam, zo by je čitarjam trochu bliže rozłožował (22).
Runja žiwemu slěbru stupa w lěću tež požadosć mnohich bydlenje wopušćić a so wonka zaběrać, najlěpje w přirodźe. Za strowotu je to přewšo spomóžne. Wšojedne hač dźěło w zahrodce, sportowanje pod hołym njebjom abo prosće małe wuchodźowanje, aktiwita tyje ćěłu a duchej. Tendencielnje je čłowjek w lěću strowši hač w zymje. To zaleži hłownje na mjenowanej aktiwiće a na parowanju typiskich zymskich infekciskich chorosćow.
Wěra a rěč wusko zwjazanej
15. serbski ewangelski domizniski dźeń wjedźeše z Wojerec do Brětnje
Wojerecy/Brětnja (AK/SN). Swěra wěrje a hajenje rěče słušatej pola ewangelskich runje tak hromadźe kaž zachowanje stawiznow a wizije do přichoda. Tole wotbłyšćowaše wčera 15. domizniski dźeń ewangelskich Serbow Wojerowskeho regiona. „Štóž zańdźenosć zabudźe, nima přichod“, wuzběhny Lothar Kujaš, předsyda Brětnjanskeje rejwanskeje skupiny a wjesny předstejićer w Brětni-Michałkach. Hromadźe z mnohimi dalšimi swjećeše wón we Wojerowskej Janskej cyrkwi němsko-serbsku bohosłužbu. Hudźbnje wobrubił je ju Židźinski chór pod nawodom Kerstin Lieder z wjacorymi serbskimi pěsnjemi a z „Knjezowym jandźelom“. Sigrun Nazdalina a Bernd Bramborg z Němcow přednjeseštaj próstwy. Wonaj prošeštaj wo měr, wo zachowanje serbskeho ludu a wo kónc wójny w Ukrainje. Superintendent na wuměnku Jan Malink prědowaše wo Božej hosćinje.
Policija (19.06.23)
Rostliny pokradnyli
Wojerecy. Njewšědnu rubiznu běchu sej paduši w nocy na sobotu we Wojerecach wupytali. Woni zadobychu so namócnje do štomownje na Grodkowskej šoseji. Z njeje spakosćichu něhdźe 30 truskalcowych rostlin. Dalše rostliny woni wobškodźichu. Kelko zrałych truskalcow na rostlinach wisaše, policiji bohužel znate njeje. Cyłkowna škoda wučinja něhdźe 50 eurow.
