Myta młodźinje
Biskopicy (SN/bn). Wot lońšeho spožča towarstwo Syć za dźěło z dźěćimi a młodostnymi w Budyskim wokrjesu w Myto za młodźinski angažement. Wuznamjenjenje je zdobom „zjawne hódnoćenje“ prócy młodych wobydlerkow a wobydlerjow regiona w starobje do 27 lět na najwšelakorišich towaršnostnych, kulturnych a socialnych polach. Dźensa buchu wosom lětuši lawreaća wozjewjene.
Nimo młodźinskeho centruma Postkosmos we Wojerecach, młodźinsko-kulturneje skupiny FisMollSieben ze Załomja a młodźinskeje wohnjoweje wobory w Słonej Boršći je mjez mytowanymi cyłkami tež Njebjelčanski młodźinski klub. Wuznamjenjenja „pokazuja wjelorakosć, energiju a kreatiwitu, z kotrymiž młodostni ze swojimi čestnohamtskimi činitosćemi na dobro sobučłowjekow a towaršnostneho zhromadneho žiwjenja skutkuja. Jich aktiwity móžeja być z nastorkom, přikładom a motiwaciju za druhich, so sami towaršnostnje angažować“, we wopodstatnjenju spožčaceho towarstwa rěka.
Krótkopowěsće (06.12.22)
Zelena ruka za solidaritu
Budyšin. Dźěłarnistwo twarstwo-agrar-wobswět (IG BAU) zaso z akciju „złota ruka“ solidarisku mjezsobnosć ludźi wšelakeho pochada w zawodach podpěruje: www.gelbehand.de . Wučomnicy a powołanscy šulerjo tež z wokrjesa Budyšin na namołwjeni, hač do 16. januara swoje projekty zapodać, kaž IG BAU dźensa w zdźělence informuje.
Pjeriznowa mrětwa we Łomsku
Radwor/Łomsk. Wudyrjenje pjeriznoweje mrětwy su we Łomsku hamtsce zwěsćili, tak krajnoradny zarjad Budyšin. Do toho je Friedricha Löfflerowy institut, zwjazkowe slědźenišćo za strowotu zwěrjatow, rozbudźak wobkrućił. Kontakty a wokoliny přepytawši ma zarjad strach rozšěrjenja rozbudźakow za snadny. Tohodla so zarjadowanja pasma z restrikcijemi wzdadźa.
Njepřihódny slogan zběhnyli
Policija (05.12.22)
Frontalnje do so zrazyłoj
Niska. Ćežke wobchadne njezbožo stało je so wčera popołdnju na zwjazkowej dróze B 115 mjez Kodersdorfom a Niskej. Byrnjež kurjawojte było chcyše 59lětny wodźer wosoboweho awta hnydom štyri před nim jěduce jězdźidła přesćahnyć. Při tym wón frontalnje do napřećo přijěduceho awta zrazy. Jeho 24lětna wodźerka kaž tež zawinowar so ćežko zraništaj. Dróha bě štyri hodźiny zawrjena.
Wjele modelow wobdźiwać
Počesća K. A. Kocora
Historiski chódnik ponowjeny
Mozaikowe plesternaki a ornamenty po starym přikładźe kładli
Wojerecy (SiR/SN). Měšćanska štwórć wokoło Wojerowskeho dwórnišća je wot njedawna wo zajimawostku bohatša. Tam su minjeny štwórtk ponowjeny historiski chódnik při Dwórnišćowej aleji zjawnosći přepodali. Dźěła na 200 metrow dołhim wotrězku, kiž su z mozaikowymi plesternakami a ornamentami po historiskim přikładźe sporjedźeli, běchu nazymu tohole lěta zahajili.
„Předewzaće je so jara derje poradźiło. Móžeš jenož wobdźiwać, kak su twarscy dźěłaćerjo chódnik tak rjenje wuplestrowali“, rjekny wyši měšćanosta Torsten Ruban-Zeh (SPD). Po jeho słowach dyrbjachu při twarskich dźěłach něštožkuli wobkedźbować, wšako su chódnik sam kaž tež štomy podłu njeho jako pomnik zastopnjowane. Tak su šćežku trochu zwyšili, zo by wona před korjenjemi bliskich štomow lěpje škitana była. Kaž z měšćanskich podłožkow wuchadźa, bu pućik wokoło lěta 1905 natwarjeny.
Symptomy infarkta spóznać
„Posłuchaj lěkarja, prjed hač jeho trjebaš!“, serbske přisłowo namołwja.
Tuž wěnuje so student mediciny Pětr Dźisławk w nowej seriji znatym a mjenje znatym chorosćam, zo by je čitarjam trochu bliže rozłožował (4).
Schorjenja wutroby a wobtoka su hłowna přičina za njepřirodnu smjerć w Němskej kaž tež w mnohich tamnych industrijnych krajach. Čehodla to tak je, je wočiwidne. Čłowjek so stajnje mjenje hiba a so stajnje njestrowšo zežiwja. Wosebje surowa situacija, kotraž mnohim ludźom strach wobradźa, je w tutym zwisku infarkt wutroby.
Na adwentne wiki čołmikowali
Za swoju kóždolětnu kubłansku jězbu bě sej předsydstwo Kamjenskeje župy „Michał Hórnik“ lětsa wosebitosć wumysliło. Čłonojo wopytachu hodowne wiki w Lubnjowje a na Lědach. Wosebitosć je tu, zo su woboje wiki přez jězbu z čołmom zwjazane. Tak poda so nimale 20 ludźi, čłonojo župneho předsydstwa a dalši zajimcy župje přisłušacych towarstwow, njedawno do Delnjeje Łužicy. Jězba w čołmje po měrnej zymskej krajinje bě wosebite dožiwjenje.
W muzeju pod hołym njebjom na Lědach witaše wobdźělnikow wosebje rjana hodowna atmosfera. Rjemjeslnicy prezentowachu swoje wudźěłki a chłóšćenki. W pozadku běchu delnjoserbske hodowne pěsnje słyšeć. Dźěćetko wudźěleše swoje žohnowanje a dari wopytowarjam złoty worjech. Tež rumpodich bě po puću. Něchtóžkuli móžeše sej tu rjany hodowny darik sobu domoj wzać.
Na dompuću wulětnikarjo hišće k wječeri w Klóšterskej Nowej Wsy pozastachu. Běše to rjany zhromadny dohodowny wulět. Katharina Jurkowa
Ruiny w Časecach chcedźa wottorhać
Časecy (SN/MWj). Na posedźenjach gmejnskeje rady Pančicy-Kukow mała wjes Časecy přehusto na dnjowym porjedźe njesteji. Nětko pak ma tam nastać twarski plan, z kotrymž so napohlad wsy změni, a to na dobro wsy.
W Časecach wobsedźi Lejnjanski ratar Ralf Henčel štyristronski statok, kiž sej tele mjeno lědma hišće zasłuži. Bywšu bróžnju drje su w zašłosći sporjedźeli, tak zo hodźi so wužiwać, tři tamne dźěle statoka pak su jenož hišće ruiny. Zdźěla su wonkowne sćěny hižo sypnjene, dalše su krótko před tym. To chce Henčelec swójba změnić. Předewšěm jeje młódša generacija planuje ruiny wottorhać a jako dźěl statoka nowy jednoswójbny dom natwarić. Za to je trěbny twarski plan. Zo ma so tajki zdźěłać, je wjetšina gmejnskeje rady na swojim zašłym posedźenju schwaliła. Kaž wjesnjanosta Markus Kreuz (CDU) rozłoži, płaća za to lětsa hišće jednoriše předpisy. Wot klětušeho by to komplikowaniše było.
