Krótkopowěsće (29.06.23)
Lisćinu herbstwa rozšěrjeli
Podstupim. Zwjazkowa lisćina imaterielneho kulturneho herbstwa wopřijima wot wčerawšeho oficialnje mjez druhim tež „twar a wužiwanje čołmow w Błótach“. We wobłuku wot skupiny Serbska reja hudźbnje wobrubjeneho „swjatočneho nowozapisowanja“ porěčeštej mjez druhim Braniborska kulturna ministerka dr. Manja Schüle a dr. Marlen Meißner z Němskeje UNESCO-komisije.
Předsyda rozprawjał
Wojerecy. Čłonam Serbskeje přirady města Wojerec je předsyda Domowiny Dawid Statnik na jich posedźenju wčera w tamnišej radnicy wo swojim skutkowanju w tymle zastojnstwje rozprawjał. Kaž bě z kruha wobdźělenych zhonić, su so přitomni tež wo serbskim ludowym zastupnistwje Serbskim sejmje wuměnili. Gremijej dźesać wosobow přisłuša, měšćanscy radźićeljo a štyri Serbowki.
Direktor knižne wiki wopušći
Wustajeńca z małym jubilejom
Skupinarjo sej do Delnjeje Łužicy wulećeli
Po dlěšej přestawce organizowaše naša Domowinska skupina Komorow-Rakecy-Trupin lětsa zaso wulět. Tón wjedźeše nas njedawno do Delnjeje Łužicy.
Prěnja stacija bě Serbski muzej w Choćebuzu, hdźež nas Christina Kliemowa witaše. Wona pokaza nam wobnowjenu trajnu wustajeńcu z ćežišćemi wěra a nabožina, nałožki a narodne drasty kaž tež hudźba a wupućowanje. Jara zajimawa wustajeńca wobsahuje mjez druhim repliki a originale pismowstwa a ludoweho wuměłstwa kaž tež filmy.
Na to podachmy so do Dešna. Tam nam Babette Zenkerowa tamniši domizniski muzej ze swojej wobšěrnej zběrku na přikład narodnych drastow a domjaceje nadoby, sydlišćo Stary lud a wosadnu cyrkej pokaza a mnoho pozadkow rozłoži. Farar a sobuzałožer Domowiny Bogumił Šwjela bě so wo to postarał, zo běchu při wobnowjenju Dešnjanskeje cyrkwje tež serbske napisy zachowali.
Policija (28.06.23)
72 km/h přespěšnje jěł
Połčnica. Zo dyrbiš stajnje a wšudźe z kontrolu spěšnosće ličić, je poprawom znate. Wodźer Audija w nocy na wutoru na awtodróze A 4 wo tym najskerje hišće ničo słyšał njeje. Wón bě jedyn z tych 447 šoferow, kotrychž při kontroli na A 4 pola Połčnic lepichu, dokelž běchu spěšnišo hač dowolenych 80 km/h jěli. Wony wodźer Audija docpě negatiwny rekord a jědźeše 72 km/h přespěšnje nimo błyskača. Na njeho čakaja nětko 700 eurow pokuty, dwaj dypkaj w Flensburgu a tři měsacy bjez jězbneje dowolnosće.
Dalše poćeženje na A 4
Hudźa w zmysle ekumeny
Kulowski pozawnowy chór swjeći tele dny 70lětne wobstaće
Kulow (AK/SN). Prěni kónc tydźenja w juliju swjeći Kulowski pozawnowy chór swoje 70lětne wobstaće. Na to skedźbnja nawodnica Jana-Eva Scholz. „Sobotu wot 15 hodź. zahudźimy w jednotliwych wjesnych dźělach. Wot 17.30 hodź. hudźimy na Kulowskim torhošću.“ Njedźelu w 14 hodź. slěduje bohosłužba w ewangelskej cyrkwi. Tomu přizamknje so wosadny swjedźeń. Na njón wočakuja pozawnowe chóry z wokoliny. Dźěći budu instrumenty paslić móc.
Kulowski pozawnowy chór je 1953 nastał. Do žiwjenja zwołał je jón farar Otto Kasper. Wón bě tehdy ze Šleskeje do Kulowa přišoł a so tu wo čiłe wosadne žiwjenje starał. „Farar Otto Kasper bě prěni pozawnowy farar našeje krajneje cyrkwje“, Jana-Eva Scholz rozłoži.
Wo połoženju zawodow zhonili
Čorny Hodler (SN/BŠe). Ratarstwo na městnje dožiwić a so wo tuchwilnym połoženju na polach informować móžachu wopytowarjo minjenu sobotu na swjedźenju wotnajerjow w Čornym Hodlerju. Ratarskej prodrustwje Radwor a Wulki Wjelkow jónu wob lěto wotnajerjow přeprošujetej, zo móhli jim pokazać, kajka je situacija. Hladajo na wjele ludźi, kotřiž su přišli, je zajim jara wulki. A tak jězdźachu wotnajerjo z busom po kónčinje, zo móhli sej wobhladać, što na polach rosće. Wězo bě jim wěcywustojny fachowc poboku. „Tak chcedźa ludźo wědźeć, kajka je situacija zawoda“, rozkładźe jednaćel Radworskeho ratarskeho předewzaća Stefan Triebs. Tamniše agrarne drustwo wobdźěłuje tuchwilu něhdźe 1 200 hektarow polow. Wulkowjelkowski zawod ma so wo něhdźe 700 hektarow starać. „Na čarje zhonja zajimcy wo zwiskach mjez družinami. Mjeztym plahuja ratarjo na honach wokoło Radworja žonop za znate Budyske předewzaće“, jednaćel rozkładźe. Na zarjadowanju dóstachu wotnajerjo hinašu perspektiwu a tuž z hinašimi wočimi dźěło burow posudźuja.
Z mnohimi pomocnikami su wčera w Smječkecach stan za hudźbny event ...
Wustajeńca na promenadźe
Zalutowanja etat wolóžeja
Po wjele diskusijach a wobydlerskej zhromadźiznje je Wojerowska měšćanska rada wčera hospodarski plan za 2023 a 2024 wobzamknyła. Pjenježne połoženje w měsće njeje jednore.
Wojerecy (AK/SN). Ze zaměrnym lutowanjom chce město Wojerecy swoje pjenježne połoženje dołhodobnje wolóžić. Na swojim wčerawšim posedźenju wobzamkny měšćanska rada hospodarski strukturny koncept hač do lěta 2027 a dwójny hospodarski plan 2023/2024. „Bjez strukturneho koncepta bychmy 22,1 milion eurow deficita měli, z konceptom je to 15,9 milionow eurow deficita“, rjekny wyši měšćanosta Torsten Ruban-Zeh (SPD).
