We wobłuku ekskursije k hatam wokoło Kupoje mějachu wopytowarjo ...
Krótkopowěsće (25.10.23)
Sakske wysoke šule požadane
Drježdźany. Sakske uniwersity, wysoke šule a powołanska akademija móžachu na spočatku zymskeho semestra ličby studijnych nowačkow zwyšić. Na 14 statnych wysokich šulach je něhdźe 15 000 młodych ludźi prěni raz studij nastupiło, 1 000 wjace hač loni. W powołanskej akademiji Sakskeje maja 1 569 nowych zapisanjow, loni bě jich 1 532.
Wupad wučby nadal wulki
Drježdźany. Wupad wučbnych hodźin na šulach Budyskeho wokrjesa je nadal wulki, zwěsća sakske kultusowe ministerstwo hladajo na druhe šulske połlěto 2022/2023. Najwjetši wupad 12,5 procentow je w spěchowanskich šulach. Něhdźe 10 procentow hodźin wupaduje na wyšich šulach, dźewjeć procentow na gymnazijach. Zakładne šule maja ze 4,3 procentami najnišu kwotu wupada. Hłownej přičinje stej zo nadal wučerjo a šulske rumnosće njedosahaja.
Nowy profil Kretschmera
Spěšne jednanje pomha
„Posłuchaj lěkarja, prjed hač jeho trjebaš!“, serbske přisłowo namołwja.
Tuž wěnuje so student mediciny Pětr Dźisławk znatym a mjenje znatym chorosćam, zo by je čitarjam trochu bliže rozłožował (30).
Nazymske wěncy paslili
Inwestor projekt cofnył
Zmysłapołne wužiwanje bywšeje zakładneje šule zwrěšćiło
Běły Chołmc (AK/SN). Wot lěta 2010 je bywša zakładna šula „Fritz Kube“ w Běłym Chołmcu prózdna. Tu chcyše inwestor Daniel Scholze dowolowe bydlenja wutwarić. Tónle plan je nětko cofnył, kaž na naprašowanje zdźěli. Jako přičinu mjenuje wón dwě wuwići. „Na jednym boku je so hospodarske połoženje firmy Perplex Holding & Consulting jako inwestor tak pohubjeńšiło, zo smy nětko w saněrowanskim procesu. Na tamnym boku smy minjene lěta hižo tójšto inwestowali, mjez druhim do planowanja a do posudkow, w kotrychž dachmy pódu, wobchad, wohnjoškit a přirodoškit přepytać. Při tym jewješe so telko postajenjow a wobmjezowanjow, zo dźeń a bóle dwělowachmy, hač so projekt hospodarsce liči“, Daniel Scholze rozłoži.
Policija (24.10.23)
Awto pokradnjene a namakane
Budyšin. Paduši su so na Leibnitzowej w Budyšinje w nocy na njedźelu do wosoboweho awta typa Hyundaj zadobyli a z nim wotjěli. Wobsedźer móžeše pozdźišo swoje jězdźidło z pomocu techniki na parkowanišću při Schliebenowej zwěsćić. Tam steješe wone njezamknjene a njewobškodźene.
Na zwjazkowej dróze twarja
Delnja Hórka. Z poćežowanjemi nadróžneho wobchada dyrbja šoferojo hač do spočatka decembra na zwjazkowej dróze B 156 mjez Budyšinom a Delnim Wujězdom ličić. Tu kładu na wšelakich městnach tak mjenowane banketowe platy, zo bychu kromy puća stabilizowali. Twarske dźěła su w třoch wotrězkach předwidźane. Te su z Budyskeho směra přijěducy krótko před Delnjej Hórku kaž tež mjez Lěskej a Delnim Wujězdom. Z pomocu ample tam wobchad nimo twarnišća wjedu.
Informuja wo wobšudnikach
Budyšin. „Zjebanje při telefonje a druhe činki“ je hesło přichodneho serbskeho popołdnja župy „Jan Arnošt Smoler“ štwórtk, 26. oktobra, w 16.30 hodź. na žurli Budyskeho Serbskeho domu. Wo aktualnej temje zjebanja při telefonje, přez whatsapp abo mejlki budźetaj policistaj rozprawjeć. Wažne budu pokiwy, kak so najlěpje škitać. Zarjadowanje wotměje so w rjedźe přednoškow za čłonow Domowinskich skupin a towarstwow w župje kaž tež wšitkich zajimcow.
Přednošuje wo pućowanju
Za Israel hromadźe stali
Budyšin (CS/SN). Namołwje Petry Kaulfürstoweje k solidarnemu zeńdźenju za Israel pod hesłom „Hromadźe stać za Israel“ je minjeny pjatk něhdźe sto wobydlerjow Budyšina slědowało. Po měrowej modlitwje w tachantskej cyrkwi słuchachu woni wonka před Božim domom na přednošk Petry Kaulfürstoweje wo mnohostronskich poćahach, kotrež ju a jeje swójbu z Israelom zwjazuja.
Wona je w křesćanskim, ale tež politisce zajimowanym staršiskim domje wotrostła. Jeje wowka je tež za čas nacionalsocializma pola židowskich wikowarjow nakupowała, byrnješ sej hrožacych represalijow wědoma była. Tež jeje dźěd je Židam pomhał. Jeje nan je so jako mostytwarc zrozumił a za čas NDR wo stawiznach Israela přednošował.
