Wabja za sebje na nowej stronje
Chrósćicy (jb/SN). Dotal bě Chróšćanska młodźina předewšěm na woblubowanych socialnych kanalach, kaž Instagram a Facebook, zastupjena. Wotnětka maja młodostni tež swójsku serbsko-němsku internetnu stronu. Pod adresu móža so zajimcy mjez druhim wo wšitkich aktiwitach młodźinskeho kluba kaž tež wo přichodnych zarjadowanjach informować. Jedne tajke budźe mejemjetanje w Chrósćicach, 20. meje, w 16 hodź. Wječor přizamknu so reje ze serbskej band Holaski.
Dalša nowosć, kotruž klub minjene dny připowědźi, je zarjadowanje wjetšeho razu kónc tydźenja, 6. a 7. oktobra we wjacezaměrowej hali „Jednota“ w Chrósćicach. Tam planuja pjatk „Ü30-party“. Sobotu na tak mjenowanej „Aurora nights“ maja młodostni z cyłeho regiona móžnosć, zhromadnje k hudźbje wšelkich DJjow swjećić. Při přewjedźenju wosebiteho zarjadowanja podpěruje młodostnych wjesne towarstwo Domizna. „Přez tutón zhromadny projekt wšěch našich čłonow a wšelakich generacijow chcemy zhromadnosć w młodźinskim klubje a we wsy dale skrućić“, rěka na nowej internetnej stronje.
Ideju za zetkanišćo předstajiłoj
Miłoćicy (SN/MWj). Z towarstwom Miłočanska žaba maja w Miłoćicach aktiwny wjesny cyłk, kiž so hižo wjele lět z najwšelakorišimi zarjadowanjemi wo čiłe wjesne žiwjenje stara. Při tym dźěła wone z młodźinu runje tak hromadźe kaž z wohnjowej woboru a młodymi swójbami. Zhromadnje organizuja na přikład dźěćace póstnicy, chodojtypalenje, mejske reje a wjesny swjedźeń. Nětko měri so towarstwo na nowy projekt, zo by swojim čłonam a dalšim wjesnjanam porjadne wjesne zetkawanišćo skićiło. Za to chcedźa bywše předawanišćo wosrjedź wsy přetwarić. Na zašłym posedźenju Njebjelčanskeje gmejnskeje rady staj předsyda towarstwa Marko Kowar a swobodny architekt René Bětnar koncept projekta předstajiłoj.
Na jutřišim swjedźenju Božeho spěća změja mužojo wjacore ...
Znowa zhromadnje „Majówku“ swjećili
Budyšin (SN/CS). Hdyž so zarjadowanje hižo dźesaty króć wotměwa, móžemy bjezdwěla wo dobrej tradiciji rěčeć. Při mejskim swjedźenju „Majówce“, kotryž organizuje społnomócnjena Budyskeho wokrjesa za naležnosće wukrajnikow Anna Piętak-Malinowska, tomu tak je. Byrnjež swjedźeń koronawirusa dla dwójce wupadnyć dyrbjał, je jeho přiwabliwosć njezlemjena. Minjenu njedźelu městna na žurli Kamjentneho domu lědma dosahachu. Na jewišćowym programje wobdźěli so něhdźe 200 sobuskutkowacych. Mjez nimi běchu tež młode rejwarki a rejwar dorostoweje skupiny Łužičanka Serbskeho ludoweho ansambla, kiž program zahajichu. Prěni króć pódla běchu tež hosćo z Ukrainy, kotřiž běchu w Budyšinje wućek před wójnu namakali.
Krótkopowěsće (17.05.23)
Pytanje wulětow přestorčili
Budyšin. Marketingowa towaršnosć Hornja Łužica-Delnja Šleska dyrbi zahajenje onlinoweje pytanskeje funkcije FAMIL-O-MAT techniskich ćežow dla wot 1. junija na 7. julija přestorčić. Z funkciju móža zajimcy za wólnočasnymi poskitkami w Hornjej Łužicy pytać, zo móhli swoje wulěty ze swójbu optimalnje planować. W testowej fazy bě wjac hač 300 poskitkow cyłkownje 260 poskićerjow na platformje wopisane.
Spěwy popoweje opery online
Budyšin. Wšitke spěwy předlońšeje serbskeje popoweje opery „Carpe Noctem – njeskónčna nóc“ su wot nětka na wšelkich streamingowych platformach přistupne. Cyłkownje třinaće spěwow namakaće mjez druhim na „Spotify“. Projekt nasta w kooperaciji hudźbneho kolektiwa „Trio a Kumple“ z młodźinskim towarstwom „Pawk z.t.“.
Orlando Bloom a čěske piwo
Wosom typow jednoho wirusa
„Posłuchaj lěkarja, prjed hač jeho trjebaš!“, serbske přisłowo namołwja.
Tuž wěnuje so student mediciny Pětr Dźisławk znatym a mjenje znatym chorosćam, zo by je čitarjam trochu bliže rozłožował (20).
Hamtski rjadowar na čole gmejny
Trjebin (AK/SN). Wot 1. junija nawjeduje naležnosće Trjebinskeje gmejny hamtski rjadowar (Amtsverweser). Na swojim zašłym posedźenju je gmejnska rada Roberta Sprejza (Trjebinske wolerske zjednoćenstwo) do tuteje funkcije wuzwoliła. Wón bě jenički kandidat. 34lětny přisłuša wot lěta 2019 gmejnskej radźe a je wot lětušeho nalěća amtěrowacy čestnohamtski wjesnjanosta. Do toho je wjesnjanosta Waldemar Locke strowotnych přičin dla zastojnstwo złožił. 27. awgusta w Trjebinje noweho wjesnjanostu wola.
Jako najwažniše ćežišća přichodneho dźěła mjenowaše Robert Sprejz zhromadnosć w gmejnje zesylnić, financy solidnje dale wjesć, wudawki za energiju znižić a po móžnosći wuski zwisk k wobydlerjam wudźeržować. W gmejnje bydli tuchwilu 760 wobydlerjow. Po přesydlenju Miłoraza kónc lěta 2024 budźe jich hišće 650. Přiwšěm zagmejnowanje do Slepoho po słowach Roberta Sprejza tuchwilu žana tema njeje. „Gmejnska rada je so jasnje za samostatnosć wuprajiła“. wón rjekny. Sprejz dźěła hłownohamtsce jako přistajeny firmy za wotwožowanje wotpadkow NEG w Běłej Wodźe.
Policija (16.05.23)
Pod wliwom drogow jěł
Haj. Je lědma dnja, zo policajscy zastojnicy někoho njelepja, kiž pod wliwom drogow z awtom jědźe. Tajki pad sta so předwčerawšim w Haju w Radworskej gmejnje. Tam zadźeržachu pólskeho šofera a zwěsćichu, zo bě wón konop brał. Z tym bě jeho jězba skónčena a 23lětny dyrbješe krej wotedać. Nimo toho zahajichu přećiwo njemu wotpowědne jednanje.
Wo swój spěwny a hudźbny dorost so Lipjenjo starosćić njetrjebaja
Pančicy-Kukow (SN/MWj). Tradicionalny nalětni koncert na zahrodźe klóštra Marijineje hwězdy w Pančicach-Kukowje je so předwčerawšim znowa jako wopytowarski magnet wopokazał. Wopytowarjo z wokolnych wsow a z dalšich kónčin dožiwichu wokřewjacu połdra hodźinku ze znatymi melodijemi, nowosćemi a překwapjenkami.
Judith Pjetašec a Jan Rjeda připowědźištaj na spočatku sep lubosćinskich pěsnjow, kotrež njezaspěwa jenož chór pod nawodom Jadwigi Kaulfürstoweje, ale tež Daniel Wałda jako solist „Lubki lilije“. Na Dnju maćerje njesmědźeše wězo Měrćina Weclichowa „Maći luba“ pobrachować. Premjernje zaklinča spěw „Dźeržiš so mje“, za kotryž staj Werner Meškank tekst a Dietmar Kreisel melodiju stworiłoj. Fabian Kaulfürst měješe chórowu sadźbu na starosći. Dalši solist bě Marko Paška z „A ženje ja njejsym“. Nora Birkhofenec přednjese baseń Moniki Kochoweje „W klóšterskej dolinje“. Spěwarki a spěwarjow na klawěrje přewodźał je Jan Brězan.
