Budyšin. Hišće hač do přichodneje wutory, 28. februara, móža wobydlerjo, iniciatiwy a towarstwa w gmejnach zapadneje Łužicy zapodać projekt we wobłuku spěchowanskeho programa „Partnerstwo za demokratiju w Budyskim wokrjesu“. Z nim podpěraja jednotliwcow a iniciatiwy, kiž so za mjezsobny respekt w towaršnosći zasadźuja. Lětsa je spěchowanska suma 15 000 eurow wusměrjena na projekt, z kotrymž so zhromadnosć mjez wobydlerjemi sylni abo z kotrymž ma zetkanišćo nastać. Móžne su najwšelakoriše rozmołwne koła, fotowy projekt, schadźowanja, wustajeńcy, čitanja, dźiwadłowe předstajenja, hudźbne zarjadowanja a dalše. Nimo gmejnow wokoło Kinsporka, Radeberga, Kamjenca, Arnsdorfa a Ramnowa su tež wobydlerjo w gmejnach zarjadniskeho zwjazka Při Klóšterskej wodźe namołwjeni, projekty zapodać. Nadrobniše informacije a přizjewjenski formular nadeńdu zajimcy pod www.pfd-lk-bautzen.de.

Přirodoškitna stacija je spěchowanske srědki za wulki projekt dóstała

Mały Holešow (UM/SN). Wot srjedź měrca maja twarscy dźěłaćerjo teren rybarskeho dwora w Małym Holešowje wobdźěłać. Potom započnu wulki a hižo dlěje planowany projekt zwoprawdźić. „Planujemy jón hižo dwě lěće“, praji jednaćelka Njeswačanskeje přirodoškitneje stacije z.t. Angelika Schröter. Towarstwo ma swoje sydło w tak mjenowanym archiwnym pawiljonje Njeswačanskeho hrodoweho parka. Najwjetši dźěl wólnočasnych a kubłanskich poskitkow pak přewjedu na rybarskim dworje w bliskim Małym Holešowje.

Wojerecy. Město Wojerecy a tamniša biblioteka Brigitty Reimann pokročujetej 27. februara slěd zarjadowanjow pod hesłom „Prašej so wyšeho měšćanostu“. Tónraz njezměja krutu temu, tak zo móže kóždy swoje naležnosće přednjesć a so wo tym z Torstenom Rubanom-Zehom (SPD) rozmołwjeć. Wobdźělenje je darmotne a kóždy je přeprošeny, so wot 18 hodź. w měšćanskej bibliotece wobdźělić. Zarjadowanje wotměje so we wobłuku projekta „Wotewrjena dźěłarnička demokratije“. Z nim chcedźa wobydlerjow do procesa rozsudow wo měšćanskich naležnosćach zapřijeć.

Za wubědźowanje so přizjewić

Hózk. Za lětuše wubědźowanje Black Bird Run 3. septembra w Hózku móža so zajimcy nětko přizjewić. Kaž Hózkowske młodźinske towarstwo zdźěli, maja wobdźělnicy na dwanaće kilometrach 15 zadźěwkow přewinyć. Ličba wobdźělnikow je na 400 wobmjezowana. Star­tować móža zajimcy wot 18 lět. Při­zjewjenja přijimuja pod blackbird­run@hoske.net.

Často zwrěšćeja komunalne inwesticije na tym, zo města a gmejny dosć pjenjez za swójske podźěle nimaja. W Kulowje zda so to hinak być. Tam maja něštožkuli předwidźane.

Kulow (AK/SN). Najebać wulke poćeženja přiběracych wudawkow za energiju a wokrjesneho wotedawka dla chce město Kulow lětsa dale inwestować. Tole wuchadźa z hospodarskeho plana 2023, kiž su měšćanscy radźićeljo na swojim zašłym posedźenju schwalili. „Najwjetša naprawa je nowa wólnočasna a sportowa připrawa při měšćanskim haće za dohromady 310 000 eurow. Nimo spěchowanja je za to w etaće 80 000 eurow swójskich srědkow zaplanowane. Nastać matej wulke hrajkanišćo a čara za kolesowanje“, rozłoži komornik Mathias Kockert. Dźěći a wosebje młodostni su sej připrawu dołho přeli.

Poprawom chcychu etat hižo loni w decembru wobzamknyć. „Tehdy pak njebě hišće jasne, kak so kóšty za energiju wuwija, kelko dochodow změjemy z přemysłoweho dawka a kajke budu tarifowe jednanja w zjawnej słužbje. Tohodla smy rozsud přestorčili. Mjeztym su někotre dypki rozrisane, tak zo móžemy lěpje planować“, praji měšćanosta Markus Posch.