Policija (29.08.23)
Trawusyčak fuk
Wolešnica. Samo při dźěle w swójskej zahrodce dyrbiš mócnje na to kedźbować, zo ći paduši grat za chribjetom njepokradnu. Tole dyrbješe předwčerawšim popołdnju muž we Wolešnicy (Oelsa) pola Lubija nazhonić. Wón so na swojej zahrodźe wo čisty trawnik staraše a wostaji trawusyčak krótki čas njewobkedźbowany. Tónle wokomik njeznaći wužichu, podachu so přez njezamknjene wrota na ležownosć a trawusyčak spěšnje sobu wzachu. Po informacijach policije bě mašina něhdźe 270 eurow hódna. Kriminalna słužba Lubijskeho rewěra nětko pad dale přepytuje.
Za přichodnych organistow
Budyšin. Budyski tachantski kantor Kamil Maksymilian Kulawik poskića w nowym šulskim lěće wuwučowanje na pišćelach. Wuměnjenje su zakładne znajomosće w hraću na klawěrje. Poskitk měri so na młodych za hudźbu zajimowanych, kotřiž bychu zwólniwi byli, nimo swojeho powołanja słužbu organista přewzać, abo kotřiž zajimuja so za studij cyrkwinskeje hudźby. Zajimcy měli so z mejlku na na farje tachantskeje wosady přizjewić. Tam dóstanu tež dalše informacije.
Radźićeljo wuradźuja
Chrósćicy. Přichodne posedźenje Chróšćanskeje gmejnskeje rady wotměje so štwórtk, 31. awgusta, w 19 hodź. w gmejnskim a kulturnym centrumje. Mjez druhim porěča radźićeljo wo zwyšenju staršiskeho přinoška w pěstowarni „Chróšćan kołć“. Dale zaběraja so woni ze zwoprawdźenjom projekta „Wutworjenje přirodnych žiwjenskich rumow w Hórkach“.
Serbske twórby zaklinča
Nětko wšěm přistupna
W Pančicach-Kukowje wotewru fyzioterapiju w klóštrje Marijinej hwězdźe
Pančicy-Kukow (SN/MWj). Štóž w klóštrje Marijinej hwězdźe w Pančicach-Kukowje hdys a hdys krej daruje, čini to pod třěchu Józefoweho domu. Při tym někotryžkuli ani njewě, zo mějachu w prawym křidle domu wjele lět fyzioterapiju. W njej pak starachu so jenož wo wobydlerjow klóštra a chowancow tamnišeje spěchowanskeje šule. To so wot zajutřišim změni. Předewzaće OL Physio, samostatna wotnožka Hornjołužiskich klinikow, je rumnosće a dospołne wuhotowanje wot klóštra respektiwnje wot tamnišich dźěłarnjow přewzało a nětko swójsku fyzioterapeutisku praksu wotewrje. „Naše posłužby móža nětko tež wšitcy dalši wužiwać, kotrymž lěkar wotpowědny recept wupisa“, rozłoži nawodnica Stephanie Krawžina.
Zhromadnje so dale kubłali
Samo wobjed za swójbu wari
Wot spočatka měrca 1992 wuchadźeja Serbske Nowiny jako wječornik. A wot toho časa je pomocnicy w mnohich wjetšich a mjeńšich wsach čitarjam do domu noša. Najwjetši čas tuž našich pilnych roznošowarjow w lětnjej seriji předstajić (19).
Podaš-li so na puć, kotryž wjedźe z wuchoda do Bronja, sy překwapjeny wot jónkrótneje tam před dwaceći lětami nastateje aleje. Wot wobeju bokow puća steji něhdźe 30 lipow, štož drje lědma nihdźe w našej kónčinje nańdźeš. We wsy samej je forma kulowca derje spóznać. Na nawsy napadnje sydom wulkich kastanijow.
Krótkopowěsće (29.08.23)
Serbja na Dnju Saksow
Budyšin. Na lětušim Dnju Saksow, kotryž so wot 1. do 3. septembra w Aue-Bad Schlema wotměje, so tež Serbja wobdźěla. Publikum wo serbskej rěči a kulturje informować chcedźa tu Serbska kulturna informacija, towarstwje Serbski kulturny turizm a Serbski folklorny ansambl Wudwor kaž tež zarjad Domowiny. Ze serbskim denerom budźe Wawrikec catering wopytowarjow pohosćować.
Wita naprawy Schustera
Zhorjelc. W dźensnišej nowinskej zdźělence wita krajny rada Zhorjelskeho wokrjesa Stephan Meyer (CDU) naprawy k zamjezowanju ilegalneho zapućowanja, kotrež je nutřkowny minister Sakskeje Armin Schuster (CDU) kónc tydźenja připowědźił. Sakska policija slědźi wot wčerawšeho w namjeznych kónčinach sylnišo za ilegalnymi přesmykowarjemi.
Cyła wjes bjez miliny
Strowy duch, nic jenož strowe ćěło
„Posłuchaj lěkarja, prjed hač jeho trjebaš!“, serbske přisłowo namołwja.
Tuž wěnuje so student mediciny Pětr Dźisławk znatym a mjenje znatym chorosćam, zo by je čitarjam trochu bliže rozłožował (26).
Policija (28.08.23)
Traktor muža přejěł
Porchow. 55lětny wodźer traktora chcyše sobotu w Porchowje wróćo jěć a 66lětneho prošeše, jemu prawy puć pokazać. Při tym pak zajědźe traktor přez pomocnika a jeho ćežko zrani.
„Čej’ da sy?“ w kniharni
Wo popłatkach debatowali
Worklecy (SN/MG). Dołhe běchu diskusije gmejnskich radźićelkow a radźićelow wo zwyšenju popłatkow za pěstowarnju a hort. „Zo dyrbja popłatki stupać, je jasne“, praji radźićelka strony CDU Jadwiga Rychtarjowa. „Kóšty za energiju a tež personal konsekwentnje stupaja.“ Při wysokosći popłatkow ma so gmejna po předpisach zarjadniskeho zwjazka měć, kotryž procentowe podźěle wuličuje, kiž měli starši za swoje dźěći zarunać. Na přichodnym posedźenju rady chcedźa so temje znowa wěnować a potom rozrisanje namakać. Prašenje, kotrež radźićelki a radźićelow dale zaběra, je, čehodla měli so popłatki docyła po procentach wuličować, a nic z krutej sumu.
