Porjedźernju železnicy wopytali
Krótkopowěsće (22.09.23)
Dalše zetkanje phōnē
Santiago de Compostela. Intendant Němsko-Serbskeho ludoweho dźiwadła, Lutz Hillmann, a zamołwita za serbske dźiwadło, Madleńka Šołčic, podaštaj so dźensa na dalšu konferencu w zwisku z projektom phōnē w Španiskej. W galiciskim měsće Santiago de Compostela wuměnjeja sej zamołwići a režiserojo mjeńšinoweho dźiwadła.
Přikrótši jězbny plan za liniju S8
Kamjenc. Zastupjerjo Němskeje železnicy kaž tež wobchadneho zwjazka VVO su so srjedu w Kamjencu z měšćanskimi radźićelemi zetkali, zo bychu wo rozrisanju kopicy ćežow na železniskej čarje mjez Kamjencom a Drježdźanami (S8) diskutowali. Z nowym jězbnym planom z jasnje mjenje zwiskami wot oktobra sem chce Němska železnica problem rozrisać.
Dilema wokoło wulkopósłanca
Kónčna etapa kolesowanja po wólbnym wokrjesu
Hórki/Sernjany. Po šěsć tydźenje trajacej jězbje po wólbnym wokrjesu staj požadarka wo kandidaturu za wólby Sakskeho krajneho sejma Elaine Jentsch kaž tež zapósłanc krajneho sejma Alojs Mikławšk (CDU) swoju kolesowansku turu srjedź septembra zakónčiłoj. Wšelake etapy skićachu móžnosć předewzaća, towarstwa a institucije zeznać a sej při tym přehlad wo wužadanjach jednotliwych akterow tworić. Poslednja etapa wjedźeše po serbskich gmejnach podłu Klóšterskeje wody a bu wot komunalnych politikarjow přewodźana.
W Hórkach pobychu na 30. jěchanskim a skakanskim turněrje a rozmołwjachu so tam mjez druhim z předsydku konjaceho sportoweho towarstwa Při Klóšterskej wodźe Sandru Bernd wo wuwiću towarstwa. W 20 wubědźowanjach nastupi nimale 200 jěcharjow z pjeć wšelakich zwjazkowych krajow. Babylětnje wjedro njestaraše so jenož wo optimalne wubědźowanske wuměnjenja, ale přiwabi tež mnohich hosći.
Kritiske zynki w radźe
Radźićeljo přeja a žadaja sej lěpše podłožki za swoje dźěło
Njeswačidło (JK/SN). Tež hdyž je minjene posedźenje Njeswačanskeje gmejnskeje rady zastupowacy wjesnjanosta Norbert Braun (rjemjesło a přemysło) nawjedował, su radźićeljo jasnje a wuraznje swoju njespokojnosć we wjacorych dypkach zwuraznili. Hladajo na wažne rozsudy kaž zwyšenje staršiskich přinoškow za dźěćace dnjowe přebywanišća je trěbne, zo dóstawajo radźićeljo sčasom dosć jasne a wuprajace ličby a fakty na blido. To pomha sej tworić měnjenje, wolóža rozsudy a hustodosć wuradźowanja gmejnskeje rady přikrótša.
Policija (21.09.23)
Wobšudnistwu zadźěwał
Budyšin. Žonje w Budyšinje je wutoru pozdatny sobudźěłaćer předewzaća Paypala při telefonje napowědał, zo je něchtó 500 eurow wot jeje konta wotzběhnył. Žona pak móhła to storněrować, hdyž tak mjenowane steam-karty kupi a tajne čisła zdźěli. Jeje mandźelski so tuž na puć do přichodneho wobchoda nastaji a chcyše tam tajke karty kupić. Při kasy jeho kedźbliwy sobudźěłaćer wobchoda na to skedźbni, zo móhło so snano wo wobšudnistwo jednać a zo měł tuž radšo na policiju zwonić. Sobudźěłaćer wobchoda a přiwołani policisća móžachu tak pjenježnej škodźe zadźěwać.
Tež za wulku wodu zwučowali
Městna hišće swobodne
Budyšin. Za kubłansku jězbu župy „Jan Arnošt Smoler“, kotraž budźe sobotu, 30. septembra, su hišće městna swobodne. Serbja z Budyšina a Budyskeje wokoliny su wutrobnje přeprošeni sobu jěć. Štóž ma zajim, njech so prošu pola regionalneje rěčnicy Katje Liznarjec pod telefonowym čisłom 03591 550211 přizjewi. Wotjězd je w 9 hodź. wot Lawskich hrjebjow. Lětsa podadźa so na kołopuć Šěracha w Budyšinku. Po wobjedźe w Njeswačidle budu pola Šołćic w pčólnicy „Regina“ w Konjecach na wopyće. Jězba płaći na wosobu 30 eurow.
Předstaji stawizny wsy
Radwor. Stawizny Chelna steja w srjedźišću přednoška Pětra Wałdy jutře, pjatk, w 19.45 hodź. w Radworskim Słodeńku. Na to chór Meja wšitkich zajimcow wutrobnje přeprošuje.
Druhi wotrězk hakle pozdźišo
Bjedrichecy (AK/SN). Wot kromy Łaza hač k železniskemu přechodej při Slěbornym jězoru je Budyski wokrjes wokrjesnu dróhu K 9219 z nowej asfaltowej worštu pokrył. Dalši twarski wotrězk wot železniskeho přechoda hač k wotbóčce do Złyčina w Bjedrichecach pak po wšěm zdaću slědować njebudźe.
Kaž nowinska rěčnica Budyskeho wokrjesa Sabine Rötschke na naprašowanje zdźěli, je wokrjesna dróha K 9219 najprjedy raz jako wokołopuć za planowany wutwar statneje dróhi S 108 předwidźana. Wokrjesnu dróhu wužiwa tohorunja LMBV jako transportny puć za saněrowanje Slěborneho jězora. „Dokelž je druhi wotrězk w přewšo špatnym stawje, njeby tam nowa asfaltowa woršta kaž na prěnim wotrězku zmysłapołna była. Dalše ponowjenje tuž najprjedy raz předwidźane njeje“, Sabine Rötschke informuje.
