Radwor. Poněčim so Radworske dwórnišćo na integraciske zetkanišćo a přebywanišćo přeměnja. Kohož zajimuje, što je hižo nastało, njech pozastanje tam njedźelu na dnju wotewrjeneho pomnika. Towarstwo dwórnišćo inkluzije Radwor přeproša wšitkich zajimcow cyle wutrobnje na wodźenje po wobnowjenych rumnosćach. Wosebje rady chcedźa nowu kuchnju za projektowe dźěło prezentować. Wo ćělne derjeměće so wězo tež ­postaraja, poskićejo hrochowu poliwku, gulaš z kotoła a samopječeny tykanc.

Darmotnje do muzeja

Budyšin. We wobłuku dnja wotewrjeneho pomnika zajutřišim, njedźelu, budźe tež Budyski Serbski muzej přistupny, a to darmotnje. Na tamnišej žurli kaž toho­runja na dalšich stacijach pokazaja stawizny domu. Nimo toho móža zajimcy wosebitu wustajeńcu „machot časa – wot běłeho k čornemu“ wopytać.

Literatura w radiju

Pod wliwom drogow z awtom jěł

Chrósćicy. Hdyž lepja policisća wodźerja awta, kiž pod wliwom drogow jědźe, je to zwjetša w městach. Druhdy pak su zastojnicy tež na wsy wuspěšni, kaž pokaza so to předwčerawšim w Chrósćicach. Tam zadźeržachu w 13.30 hodź. na Hórnikowej 18lětneho šofera VW Golfa. Při tesće so wukopa, zo bě wón amfetaminy brał. Za njeho bě jězba wězo nablaku ­nimo. Policisća su młodostneho hnydom k wotedaću kreje sobu wzali a jeho delikt přizjewili.

Płaćizny porjadnje planować je nimale kaž lotowe ličby trochować

Pančicy-Kukow (SN/MWj). Za 1,4 miliony eurow přewjeduja tuchwilu dalši twarski wotrězk cyłkowneho saněrowanja Šule Ćišinskeho w Pančicach-Kukowje. Mjeztym zo su minjene lěta rjadowniske rumnosće, chódby a třěchu ponowić kaž tež přitwar wottorhać dali, stej nětko křidle we wuchodnym a zapadnym dźělu na rjedźe.