Zwučowanja za hortske dźěći

Wojerecy. Njeje scyła lochko po wěstym puću dróhu překročić. To zwěsćichu tele dny hortske dźěći z Wojerec. Póndźelu popołdnju su wone pod dohladom policajskeju zastojnikow zwučowali, zo bychu na kóncu přijeli pas za pěškow. Kedźbliwje a z wulkej zahoritosću su so dźěći w starobje šěsć do sydom lět na praktiskim treningu w ramiku wobchadneho kubłanja wobdźělili. Wobydlerskej policistaj běštaj jim w zašłych tydźenjach teoretiske zadźerženje jako pěšk wujasniłoj. Nětko su dźěći cyle praktisce zwučowali, swoju wědu w zjawnym wobchadźe dopokazali a z wulkim wjeselom jednotliwe nadawki pod kedźbliwym wóčkom policistow zmištrowali. K zakónčenju prewenciskeho zarjadowanja a po wuspěšnym dokonjenju wšitkich zwučowanjow staj jim zastojnikaj přepodałoj požadany pas za pěškow a zešiwk Poldi.

Wo twarje kompostowarnje pola Miłoćic budu znowa rozsudźić dyrbjeć

Njebjelčicy (SN/JaW). W Njebjelčicach změja bórze Dróhu Jana Buka. Po znatym molerju a čestnym wobydlerju komuny chcedźa puć w nowej bydlenskej štwórći „Při Jěžowskim puću“ pomjenować. To je Njebjelčanska gmejnska rada na swojim zašłym posedźenju jednohłósnje wobzamknyła. „Tak česćimy jako gmejna swojich wuznamnych wobydlerjow“, wopodstatni wjesnjanosta Tomaš Čornak (CDU) rozsud gremija. „Wjacore lěta hižo pytamy móžnosć sławneho sy­na­ wsy prawje hódnoćić. Nětko smy ju našli.“ Swójba 2019 zemrěteho Jana Buka bě wotpowědnu próstwu wo to zapodała. Na posedźenju přitomny wnuk molerja, kotryž tohorunja Jan Buk rěka, zwurazni swoju hordosć nad rozsudom, zo „gmejna mojeho dźěda takle česći“.

Kubšicy (CS/SN). Gmejna Kubšicy je swoju internetnu stronu ponowić dała. Dźiwała je při tym na dwurěčnosć, zdźěli wjesnjanosta Olaf Reichert (njestronjan) na naprašowanje našeho wječornika. Mjeztym su hač na zawodny tekst „Witajće w gmejnje“ nimale wšitke hesła na webstronje w němskej a serbskej rěči wupokazane. Komuna dale na tym dźěła dwurěčnosć zwoprawdźić.

Wo tójšto njeměra mjez wobydlerjemi komuny zbudźiło je připowědźenje Němskeje železnicy (DB), za elektrifikaciju železniskeje čary Drježdźany–Zhorjelc nowy milinowód přez teritorij komuny twarić chcyć. Předewšěm postara so fakt wo njeměr, zo je planowane jón do zemje njezaryć, ale jako swobodny wód (Freileitung) twarić. Tohodla bě so hižo na posedźenju Kubšiskeje gmejnskeje rady do lětnjeje přestawki tójšto wobydlerjow wobdźěliło a sej wot wjesnjanosty žadało, připowědźenemu předewzaću znapřećiwić.