Wotrowska wosada přihotuje so na 250. jubilej swojeho załoženja

Wotrow (SN/MWj). Lětsa je tomu 250 lět, zo běchu we Wotrowje cyrkej poswjećili, štož wobhladuja runočasnje jako załoženje wosady. Za tónle wulki jubilej su hižo w lěće 2017 prěnje ideje zběrali. Cyle zaměrnje so wot nalěća 2020 na podawk přihotuja, rozłožuje předsydka wosadneje rady Claudia Wjacławkowa, kotraž ma přihotowanske nitki sobu w horšći. „Bě dołho jasne, zo dyrbi naša cyrkej k jubilejej ponowjena być. Mjeztym je tam elektrika składźena a sćěny su prěni raz barbjene“, Wotrowčanka rozprawja. Najpozdźišo hač k wosadnemu swjedźenjej wot 23. do 26. junija ma wšitko hotowe być. Potom dožiwja wosadni štyridnjowski swjedźeń z wjacorymi zarjadowanjemi.

Iniciatiwa žonow towarstwa „My smy tu“ a sobudźěłaćerjow měšćanskich zawodow Běłeje Wody zawjeseleja dźěći ukrainskich ćěkancow, kotřiž tučasnje we wočer­stwjenskim domje při Brusniku (Braunsteich) přebywaja. Dokelž su němske regionalne jědźe Ukrainjanam cuze, zrodźichu krótkodobnu ideju, we wuchodnej ­Europje znate pirožki zhotowić. Něhdźe 300 pirožkow – pjelnjenych ze sykanym mjasom, tołčenymi běrnami abo kałom – pak dyrbi najprjedy raz formowanych być. Při tym pomhatej z Ukrainy pochadźacej Jana a Tanja (1. a 4. wotlěwa). Za přičinki ­pirožkow su hač do wutory 1 440 eurow nazběrali. Foto: Joachim Rjela

Štóž je hižo raz někajkižkuli zjawny swjedźeń přihotował, wě, kelko dźěła to wo­znamjenja. Tajke něšto dyrbiš sčasom planować započeć a potom wobstajnje ludźi wokoło sebje měć, kotřiž nadawki přewozmu a je po móžnosći derje spjelnja. We Wotrowje je tuchwilu najskerje lědma swójby, kotraž do přihotow 250. róčnicy poswjećenja cyrkwje a załoženja wosady zapřehnjena njeje. Za přihoty lětušeho wulkeho swjedźenja wot 23. do 26 junija trjebaja wjele pomocnikow. Woni nje­přihotuja jeno swjedźenski ćah, ale tež spěwny wječor, wustajeńcu, přednošk, dźěćacu zabawu a wjele dalšeho. Štož ­planować njemóžeš, je wězo wjedro – ­a dźensniši čas bohužel tež wuwiće koronoweje pandemije nic. Myslu pak sej, zo su Wotrowčenjo runje tak optimistiscy kaž ja, zo so połoženje hač do lěća tak ­někak normalizuje. Njeby dźě ničo hór­šeho było, hač dyrbjeli swój swjedźeń ­małeho wirusa dla wotprajić. Tuž njech so wšo derje poradźi. Marian Wjeńka

Tola wjac natyknjenjow było

Budyšin. Zastatk při wobdźěłanju přizjewjenych natyknjenjow z koronowirusom je Budyski krajnoradny zarjad wčera při­znał, rozprawjejo wo ličbje 2 063 nowych infekcijow a wo jednym smjertnym padźe. Po Roberta Kochowym instituće wučinja incidenca tu 1 677,8 a we wokrjesu Zhorjelc 1 238,0. Tam rozprawjachu wčera wo 1 034 dalšich natyknjenjach.

Wobsahi podpěry rozjimali

Budyšin. Prěnje wobsahi podpěry za ćěkancow z Ukrainy su wjesnjanosća a měšćanosta hromadźe ze zarjadnistwom Budyskeho wokrjesa wčera rozjimali a decentralnej organizaciji zasadnje přihłosowali. Wokrjes wočakuje, zo kóžda komuna za zaměstnjenje kapacitu přewostaja, wotpowědowacu dwěmaj procentomaj ličby wobydlerstwa. Dotal je něhdźe 1 200 ćěkancow we wokrjesu.

Sberbank w likwidaciji