Hodźijska gmejna nadźija so impulsow
W Třoch Hwězdach nastawa tuchwilu parkowanišćo za 68 nakładne awta. Wone ma z přikładom za přichod być, a awtodróhowe parkowanišća wolóžeć.
Tři Hwězdy (CS/SN). Nowe parkowanišćo za nakładne awta w Třoch Hwězdach w Hodźijskej gmejnje dźeń a dale rosće. Mjeztym zo twarscy dźěłaćerjo tuchwilu na zadnim róžku fundamenty za přikuskowy kiosk přihotuja, kładu na druhim městnje bordy a wotwodźenje za dešćowu wodu, kotrež zdobom tež jednotliwe parkowanske městna za nakładne awta wotmjezuja. Kaž sej to zakonjedawar žada, njeje nowe parkowanišćo wjace hač kilometer wot awtodróhoweho přijězda Słona Boršć zdalene.
Tajke parkowanišća za nakładne awta su nuznje trěbne, dokelž nańdu šoferojo tychle hoberskich mašinow na wotpočnišćach direktnje při awtodróze často jenož jara ćežko swobodne městna za swoje trucki. To wjedźe potom husćišo k strašnym situacijam. Dokelž njemóža šoferojo swoje po zakonju cyle jasnje předpisane, časy za wotpočowanje dodźeržeć, wotstaja často swój Lkw na městnach, hdźež njeje to dowolene a k tomu zdźěla tež chětro strašne.
Policija (22.08.22)
Skaliskow dla Sprjewina hasa zawrjena
Budyšin. Pozdaću dołheje suchoty w regionje a pjatkownych a sobotnych dešćow dla su so na Budyskej Sprjewinej hasy wjacore skaliska z tamnišeje sćěny pušćili a na dróhu padnyli. Dźakowano kedźbliwemu wobydlerjej, kiž bě wobradu widźał a hnydom wohnjowu woboru a policiju za wołał, móžachu zadźěwać, zo je něchtó škodu poćerpjeł. Dokelž njemóžeše wohnjowa wobora dalše zesuwanja kamjenjow wuzamknyć, su Sprjewinu hasu dospołnje zawrěli.
Wulki són sej spjelnił
Na njedawnych šachowych mišterstwach w Budyšinje dožiwich dosć wuspěšne popołdnjo před tamnišim Měšćanskim muzejom. Móžach sej swój wulki són spjelnić: Jónu přećiwo jednomu z wulkich mištrow partiju šacha hrać.
Tež, hdyž čujach jenož snadnuški wuspěch, běše partija w sprjewinym měsće tola přemóžaca. Něhdźe 16 hrajerjow šacha nastupichmy tuž 12. awgusta, zo bychmy partiju w simultanym šachu přećiwo wulkomištrej Grigorijej Šofčenkej hrali. Spočatnje wupadaše derje. Na třoch blidach trjebaše Šofčenko stajnje trochu dlěje, zo by dokładnje rozmyslował, kotru figuru dokal pohibuje. To nas wězo pohonjowaše, ale skónčnje so tola elita přesadźi. Dźiwam so stajnje znowa, što tónle čłowjek zamóže a kak so wón wot jednoho wokomika na druhi do wšelakich situacijow zanuri. Škoda jenož, zo so tak mało dźěći z tutej zajimawej hru zaběra. Křesćan Sćapan, Kamjenej
Z kedźbliwosću so wo lěs starać
Hospodarskemu planej za komunalny lěs přihłosowali
Wojerecy (AK/SN). Statny zawod Sachsenforst chce Wojerowski komunalny lěs dale zamołwiće wobhospodarjeć. To podšmórny referent za priwatne a korporaciske lěsy Jörg Moggert na minjenym wuradźowanju Wojerowskeje měšćanskeje rady. Ta je jednohłósnje zawodne planowanje za Wojerowski komunalny lěs hač do lěta 2031 wobzamknyła.
Wotkryće wobraza wjeršk był
Pančicy-Kukow (SN). Wjace hač sto wšelakich družinow zelow steješe wčera w srjedźišću lětušeje zeloweje njedźele w zahrodźe klóštra Marijina hwězda. Puć do Zežiwjenskeho a zeloweho centruma Křesćansko-socialneho kubłanskeho skutka (CSB) je po informacijach CSB wjace hač 900 hosći namakało. „Mjez wopytowarjemi běchu mnohe swójby ze swojimi dźěćimi“, wuzběhny CSB w swojej nowinarskej zdźělence. Woni kaž tež wšitcy dalši móžachu sej „na cyłkownje 6 000 kwadratnych metrow wulkim arealu mnohostronskosć a pisanosć rostlin“ wotkrywać a sej mjez druhim tež serbske zapřijeća zelow a rostlinow zbližić.
Ze zelowej njedźelu zakónči CSB tradicionelnje zahrodowu sezonu w swojim Zežiwjenskim a zelowym centrumje, kotryž je w bywšej zahrodźe Pančičansko-Kukowskeho konwenta zaměstnjeny. Zajim mnohich hosći zbudźichu tež zelowe a přirodowe wiki. Wjace hač 20 wikowarjow a producentow z regiona njeposkićachu na nich jenož swoje wudźěłki, ale rady tež zajimowanych wo plahowanju, wužiwanju a składowanju zelow poradźowachu.
Dwurěčny literarno-hudźbny wječork w Poršiskej farskej bróžni ...
Krótkopowěsće (22.08.22)
Kubšicy a Hamor na čole
Budyšin. Trajacy dešć kónc tydźenja je tež w Hornjej Łužicy přirodźe přewšo tył. W nocy wot soboty na njedźelu su w Kubšicach a Hamorje w běhu 24 hodźin 77,4 litry resp. 72,2 litraj na kwadratny meter naměrili. Wobě komunje mjenowaše Němska wjedrowa słužba jako načolnikow. Pomróčenje w běhu dnja přiběra, za nóc wočakuja dalše spadki.
Label LABA so wobara
Zhorjelc. Hornjołužiski modowy label LABA wobara so na Drježdźanskim wyšim krajnym sudnistwje přećiwo rozsudej krajneho sudnistwa Zhorjelc, zo njesmě t-shirt z portretom žony na zakładźe mólby Hanki Krawcec hižo předawać. Po měnjenju labela njewobsahuje wusud zakładne prašenje za poměrom mjez prawom na swójskim wobrazu a wuměłsku swobodu.
1 968 krónow za Ukrainu
Policija (19.08.22)
Swědk zadźěwa jězbje w pjanosći
Połčnica. Kedźbliwemu swědkej napadny srjedu wječor na B 98 w Połčnicy napita šoferka. Wona jědźeše ze swojim Opelom Astra w křiwicach na poprawom runej droze. Na to swědk policiju zawoła. Tuta kontrolowaše 38lětnu Němku krótko před tym, zo tuta swoju domjacu adresu docpě. Při tym zwěsćichu zastojnicy, zo ma 1,52 promile alkohola w dychu. Młoda žona dyrbješe jězbu přetorhnyć a so z policiju k wotewzaću kreje na rewěr podać. Tam zhotowichu tež wozjewjenje delikta.
Wjetšej škodźe zadźěwali
Wjesnu dróhu zawru
Serbske Pazlicy. Twarskich dźěłow na nadróžnych šachtach dla budźe wjesna dróha po Serbskich Pazlicach dwaj dnjej dospołnje zawrjena. Kaž zdźěli Budyski krajnoradny zarjad stej za to wutora, 23., a srjeda, 24. awgust, předwidźanej. Wobjězdka budźe woznamjenjena
Kemše z Dźěćacym a młodźinskim chórom
Smochćicy. Z Božej mšu zakónči Dźěćacy a młodźinski chór z Magdeburgskeho biskopstwa njedźelu, 21. awgusta, w Smochčanskim kubłanišću swj. Bena swój lětuši spěwarski tydźeń. 30 młodych spěwarjow a spěwarkow wobrubja w 10 hodź. kemše w tamnišej cyrkwičce, kotrež sćelak MDR Kultur live wusyła.
Serbske pěsnje na Čornoboze
Čornobóh. Chór Budyšin koncertuje njedźelu, 21. awgusta, znowa při hosćencu na Čornoboze. Program budźe pisana měšeńca serbskich, słowjanskich, němskich a dalšich mjezynarodnych pěsnjow, připowědźi předsyda spěwneho cyłka Benjamin Wirth. Koncert wotměje so we wobłuku lětušeho Dnja Hornjeje Łužicy, započatk je w 14 hodź.
