Seniorojo škotowali
Přepodadźa hrajkanišćo a hětu
Chrósćicy. Dalši dźěl wobšěrneho projekta „Chrósćicy pohibuja wšitkich“ je na arealu bywšeje pěstowarnje dotwarjeny. Tuž přeproša gmejna wobydlerjow na oficialne přepodaće noweho hrajkanišća a grilowanskeje hěty jutře, pjatk, w 16.30 hodź. Wšitcy zajimcy su wutrobnje witani.
Pytaja instrumentalistow
Zwjeseleni a wolóženi
Z Drěwcow do Złyčina nastanje po dołhim tam a sem skónčnje puć
Drěwcy (AK/SN). Twar 1,6 kilometrow dołheje dróhi z Drěwcow (Driewitz) do Złyčina (Litschen), wo kotruž so hižo wot lěta 2012 prócuja, je nětko oficialnje zahajeny. „To njeje jenož derje za syć našich dróhow, ale předewšěm za wobě wsy“ wuzběhny wjesnjanosta Łazowskeje gmejny Thomas Leberecht (CDU). Termin přepodaća hižo steji. 17. decembra ma puć hotowy być.
„Wuměnjenje je dobre wjedro“, měni Carola Freitag z twarskeho zawoda Nadebor, kotryž twarske dźěła wukonja. Wotrězk podłu pola asfaltuja, wotrězk přez lěs plestruja. Puć je jako zwisk mjez wjeskomaj mysleny. Wužić smědźa jón kolesowarjo a pěškojo, wobsedźerjo lěsow a polow a w nuzowych padach wohnjowa wobora, katastrofowy škit a wuchowanska słužba. Dohromady płaći puć 325 000 eurow. Wot toho přewozmje Němska železnica něhdźe 163 000 eurow. Łazowska gmejna přida 48 500 eurow. Kraj Sakska wobdźěli so z 113 500 eurami.
Jedne lěto pochowanski lěs
Kamjenc (SN/MWj). Swój posledni zemski wotpočink wosrjedź přirody měć je mjeztym jedne lěto w Kamjenskim pochowanskim lěsu móžno. 38 hektarow wulki lěs zapadnje Kamjenca pola Brunowa je po swojim wotewrjenju 30. oktobra 2020 woblubowana alternatiwa k tradicionalnemu kěrchowej abo pohrjebnišću, rěka w nowinskim zdźělenju předewzaća Friedwald tzwr. Wjace hač 450 ludźi je so mjeztym za štom abo městnosć w pochowanskim lěsu rozsudźiło. Wjace hač sto zemrětych su hižo při jich štomje pochowali.
„Je dźeń a wjace wobydlerkow a wobydlerjow, kotřiž sej posledni wotpočink wosrjedź přirody přeja. W Kamjencu je so tele přeće w załoženju wobydlerskeje iniciatiwy wotbłyšćowało. Wjace hač 700 ludźi je so tehdy za to wuprajiło, pochowanski lěs wutworić. Wulki wothłós po wotewrjenju před lětom je pokazał, zo mamy z pochowanskim lěsom nětko městnosć, kotraž dawa ludźom składnosć, so dostojnje a indiwiduelnje rozžohnować, so dopominać a spominać“, praji Kamjenski wyši měšćanosta Roland Dantz (njestronjan). Město je nošer pochowanskeho lěsa.
Nowy swjaty křiž w dotal prózdnym woknje apsidy na južnej ...
Wurjadna to žona
Krótkopowěsće (28.10.21)
385 nowych natyknjenjow
Budyšin/Zhorjelc. We woběmaj hornjołužiskimaj wokrjesomaj incidenca korony dla dale přiběra. Za Budyski wozjewi Roberta Kochowy institut dźensa hódnotu 278,8. Wčera přizjewi wokrjes 250 nowych schorjenjow. Za Zhorjelski wokrjes podawa RKI incidencu 258,2. Tam zwěsćichu 135 dalšich infekcijow.
Šulerske filmy hišće zapodać
Drježdźany. Za sakski festiwal šulerskeho filma „film ab!“ móžeja šulerki a šulerjo swoje samoprodukowane paski hišće hač do 5. nowembra na internetnej stronje zapodać. Kultusowe ministerstwo a Sakski krajny wustaw za priwatny rozhłós a nowe medije festiwal zarjadujetej. Wuknjacy wšitkich rjadowniskich schodźenkow móža so wobdźělić. Najlěpše filmy z premijemi cyłkownje 2 100 eurow mytuja.
China so mjerza
Policija (27.10.21)
Tobak při puću ležał
Krušwica. Paket hrubeho tobaka je předwčerawšim popołdnju w Krušwicy policajske zasadźenje zawiniło. Swědcy namakachu paket při kromje puća, kotryž wjedźe k hraničnemu mostej, a informowachu policiju. Po wšěm zdaću bě paket z transportera abo nakładneho awta padnył. Kaž bě z nalěpka wučitać, jednaše so wo 33 kilogramow tobaka. Policisća wzachu wšitko sobu a informowachu swojich kolegow-cłownikow. Woni maja nětko nadrobniše wobstejnosće namakanki wuslědźić.
W prózdninach do muzeja
Budyšin. „Baje, baje, bachu ...“, rěka dalši prózdninski poskitk Budyskeho Serbskeho muzeja jutře, štwórtk, wot 10 hodź. Při tym steja sćinowe bajki w srjedźišću. Wobdźělić móža so zajimcy, kotřiž zamóža bajki bać a je tež pokazać. W Serbskim muzeju móža woni swójske sćinowe dźiwadło a figury paslić. Přizjewjenja přijimuja e-mailnje pod adresu ticket@sorbisches-museum.de abo pod telefonowym čisłom 03591/270 87 00.
Wotewru wustajeńcu
Budyšin. Rězbarstwo Alojsa Šołty ze Žuric steji w srjedźišću noweje wustajeńcy Budyskeje Serbskeje kulturneje informacije, kotruž tam pjatk, 29. oktobra, w 17.30 hodź. wotewru. Pod hesłom „Korjenje – swětło w rjadźe – swobodne kreacije z drjewa“ pokaza serbski wuměłc přehlad swojeho tworjenja a jednotliwe eksponaty a jich nastaće rozłoži. Wopytowarjo maja płaćiwe hygieniske postajenja wobkedźbować. Za zarjadowanje płaći prawidło 3G. Wšitcy zajimcy su na wotewrjenje zajimaweje přehladki wutrobnje přeprošeni
Čita z druheje knihi
Postajenja znowa rjaduja
Po dźesać lětach chcedźa policajske wustawki přiměrić
Slepo (CK/SN). Jako škit před zjawnym poćežowanjom maja gmejny, zarjadniske zjednoćenstwa a zwjazki status policajskeho zarjada. To potrjechi mjez druhim zanjerodźenja přez skót, njedowolene wupowěsnjenje plakatow abo poćežowanja hary dla. Rjadowane je to wšo w policajskich wustawkach. Wot lěta 2010 maja tajke tež w Slepjanskim zarjadniskim zjednoćenstwje, hdźež płaća wone za gmejny Slepo, Dźěwin a Trjebin.
