Wotewru lěsnu kupjel
Farar před zarjadom stawkował
Krótkopowěsće (23.05.22)
Muž w zmysle Pücklera
Choćebuz. Pücklerowej załožbje w Mužakowje a Rogeńcu wopominatej z nekrologom krajinoweho architekta prof. Helmuta Rippla. Wón je jako slědźer a wot 1984 hladar zahrodniskich pomnikow w bywšim Choćebuskim wobwodźe, ale tež jako tworjacy krajinowy architekt Łužicu w zmysle wjercha Pücklera tworił. Rippl bě w aprylu 96lětny zemrěł, jutře budźe pohrjeb w Choćebuzu.
Komponista wopominali
Łaz. Komponist Jan Pawoł Nagel (1934–1997) ze Złyčina wostanje ze swojej hudźbu a swojim žiwjenskim skutkom njezapomnity. Tole zwuraznichu minjeny pjatk čłonojo Spěchowanskeho towarstwa Zetkanišćo Dom Zejlerja a Smolerja. Składnostnje 25. posmjertnin komponista połožichu při jeho rowje we Łazu kwěćel. Pódla bě Łazowski wjesnjanosta Thomas Leberecht (CDU).
Brunica nachwilnje dale trěbna
Pěstowarnja do srjedźišća wsy
Rowno (AK/SN). Nowotwar Witaj-pěstowarnje „Milenka“ w nošerstwje gmejny Slepo je klučowy projekt za přichodne wuwiće Rownoho. „Nowotwar zwyši atraktiwitu wsy. Pěstowarnja słuša do wjesneho srjedźišća“, potwjerdźa planowar Thomas Jansen minjeny pjatk při předstajenju koncepta wo wuwiću wsy. Dźěłowa skupina něhdźe 20 wobdźělnikow je we wšelakich dźěłarničkach ideje za wuwiće wjesneho srjedźišća a cyłeje wsy zezběrała. K angažowanym ludźom słušachu čłonojo wjesneje rady, wjesneho kluba Rowno a dobrowólneje wohnjoweje wobory, sobudźěłaćerjo pěstowarnje a dalši wobydlerjo. Zaběrali su so z pěstowarnju a wjesnym srjedźišćom, domom za towarstwa a starej šulu, z bydlenjom kaž tež z mjeńšinowym centrumom a brunicowej jamu.
Policija (20.05.22)
Ćežko zranjeny mopedist
Pančicy-Kukow. Na statnej dróze S 100 mjez Pančicami-Kukowom a Hlinowcom při křižowanišću Jawora-Miłoćicy je wčera popołdnju mopedist znjezbožił. Młodostny bě ze swojej Simson z Jawory do směra na Miłoćicy po puću. Jako chcyše na křižowanišću zastać, poča so při borzdźenju na spliće suwać a zrazy do napřećo jěduceho Audija. Młodostneho dowjezechu do chorownje, šofer a sobujěduca Audija so njezraništaj. Dźesać kameradow Pančičansko-Kukowskeje wohnjoweje wobory su městno njezboža zawěsćili.
Do přichoda gmejny hladać
Zaběraja so intensiwnje ze zdźěłanjom koncepta k wuwiću gmejny
Róžant (JK/SN). Podobnje dalšim gmejnam Sakskeje chce tež gmejna Ralbicy-Róžant zdźěłać koncept k wuwiću swojeje komuny. Tajki wopřijima bytostne zaměry hospodarskeho, komunalneho a infrastrukturneho wuwića we wěstym času. Z pomocu koncepta chcedźa tam nadawki zmištrować, kotrež demografiske změny wosebje tež we wjesnym rumje ze sobu přinjesu.
Na mejemjetanje
Konjecy: 21. a 22. meje swjeća w Konjecach zaso wjesny swjedźeń. Započatk je sobotu w 16 hodź. z dźěćacym swjedźenjom pod hesłom „wohnjowa wobora“. Tu chcedźa překwapić mały, ale tež starši publikum. Snano dyrbja wohnjowi wobornicy na alarm chwatać? Njedźelu dopołdnja wotměje so wubědźowanje čestnohamtskich wohnjowych woborow wokolnych wsow. Wjeršk swjedźenja je njedźelu w 14.30 hodź. mejemjetanje młodźiny w Šunowje. K zakónčenju w 16.30 hodź. budźe požohnowanje noweho wohnjowoborneho awta. Zastupjerjo wokrjesa a gmejny je wobornikam oficialnje přepodadźa.
Hórki: Wjesne towarstwo a Hórčanska młodźina přeprošujetej sobotu, 21. meje, wot 17 hodź. na mejemjetanje. Běhej wo wjeršk meje přizamkny so program wjesnych dźěći a mejska reja młodźiny. Wječor su wšitcy witani na spěwny wječork ze skupinu „Brankački“.
Chrósćicy: W Chrósćicach poběža młodźency hižo w 16 hodź. za wjerškom meje. Wjeselće so na zhromadne popołdnjo z kofejom a tykancom. K zabawje hudźa Chróšćanscy muzikanća. Na dźěći čaka skakanski hród. Dale přihotuja za wšitkich přitomnych tombolu, livestream na kopańcu a reje.
Brigada prěni raz pódla
Budyšin (CS/SN). Jutry w sprjewinym měsće su pokazali, zo su Budyšenjo a jich hosćo po lětomaj pandemije cyle cyplkojći na to, zaso bjez wobmjezowanjow swjećić, praji Markus Gießler, zamołwity města za zjawnostne dźěło. Tohodla so wón nadźija, zo budźe 1018. Budyske nalěćo wulki wuspěch a liči z rozrostom hosći porno ličbam zańdźenych lět. Zhromadnje ze sobudźěłaćerku kulturneho wotrjada Katarzynu Kudzewicz je wón naročny program za swjedźeń wot 27. do 29. meje zestajał, a to najebać stupace płaćizny we wšěch wobłukach. Wo konkretnych sumach pak w zjawnosći njerěča, tak wobaj na wčerawšej nowinarskej konferency w Budyšinje. Wosebite ćeže mějachu tež z tym, zo zwučene partnerske firmy za wuhotowanje techniki a jewišćow čas koronapandemije přežiwili njejsu.
Na zahrodźe Konječana Jana Hrjehorja steja zajimawe miniatury z ...
Krótkopowěsće (20.05.22)
Wjace pjenjez Danam a Frizam
Berlin. Za danski kulturny třěšny zwjazk Sydslesvigsk Forening (SSF) a za frizisku ludowu skupinu steji po 50 000 eurow wjace w zwjazkowym etaće 2022 k dispoziciji. Wo tym informowaše dźensa zapósłanc SSW w zwjazkowym sejmje Stefan Seidler z wuporjedźenskeho posedźenja etatoweho wuběrka parlamenta. „To je so bjez swójskeje frakcije poradźiło, hoberski wuspěch“, Seidler piše.
Hoberski wětrnik
Šipkow. W Šipkowje (Schipkau), wokrjes Hornje Błóta-Łužica, ma klětu w parku wětrnikow 300 metrow wysoki milinowětrnik stać, kaž nawoda komunalneho twarskeho zarjada wčera informowaše. Najprjedy chcedźa w přihotach runje tak 300 metrow wysoku wěžu k měrjenju powětra natwarić. Na to firma Gicon tak mjenowanu wysokostnu powětrowu wěžu jako pilotowu připrawu montěruje.
Za městopředsydu wuzwoleny
