„Strukturna změna je šansa“
Nowy Zhorjelski krajny rada prěnje změny a swoje zaměry předstajił
Zhorjelc (AK/SN). Strukturna změna w Zhorjelskim wokrjesu je wužadanje a zdobom šansa. „Trjebamy dołhi dych. Měli šansu wužić, wokrjes dale wuwić“, podšmórny nowy krajny rada dr. Stephan Meyer (CDU) tydźenja po prěnich 34 dnjach w zastojnstwje. Wokrjes so organizatorisce na strukturnu změnu nastaja. K nowembrej pak so za něhdźe 300 dźěłowych městnow w zarjadnistwje něšto změni.
Přichodnje zarjaduja tam z dwanaće sobudźěłaćerjow wobstejacy nowy wotrjad za strukturne wuwiće, hospodarske spěchowanje a mjezynarodne poćahi. Sobu zapřijaty je Sakski krajny zarjad za zažne kubłanje w susodnych rěčach, kotryž bě dotal w kulturnym zarjedźe integrowany. Stephan Meyer bě wobłuk hišće jako zapósłanc Sakskeho krajneho sejma sobu iniciěrował. „Chcemy krajnoradny zarjad hišće šěršo nastajić. Tak nima so jenož na dźěćace dnjowe přebywanišća orientować, ale tež dalše kubłanske wobłuki wobkedźbować.“ Dale wusko hromadźe dźěłać chcedźa ze serbskimi institucijemi, předewšěm z Budyskim Rěčnym centrumom WITAJ.
Krótkopowěsće (17.10.22)
Noweho prezidenta wuzwolili
Darmstadt. José Francisco Agüera Oliver je nowy prezident němskeho PEN-centruma. Basnik a esejist, kiž bě mjez druhim jako docent na Massachusetts Institute of Technology a na Drježdźanskej Techniskej uniwersiće skutkował, bu minjeny štwórtk na wurjadnej zhromadźiznje centruma wuzwoleny. Dotalny komisariski nawoda organizacije Josef Haslinger bě so kandidatury wzdał.
Njepodpisaja zrěčenje
Biskopicy. Towarstwo KulturOrt Biskopicy je wobzamknyło, městotwarske zrěčenje wo nuzowym zawěsćenju tamnišeho stareho kina njepodpisać. Kaž w zdźělence zjednoćenstwa rěka, njewidźa „so kmani, kriterije spěchowanja a zdobom zrěčenske kriterije prawnisce wěsće spjelnić“. Přichod domu wostawa tuž njewěsty.
Zesylnja škit wažnych objektow
Wopominaja Zejlerja
Łaz. Solisća, chór a orchester Serbskeho ludoweho ansambla pod hudźbnym nawodom Georgiosa Balatsinosa wuhotuja jutře, sobotu, w 14.30 hodź. koncert składnostnje 150. posmjertnin Handrija Zejlerja. Hudźbne zarjadowanje je zdobom wěnowane 200. posmjertnym narodninam jeho towarša Korle Awgusta Kocora. Wobaj staj z njezapomnitymi oratorijemi hłuboke slědy swojeho wuměłskeho přećelstwa a njesprócniweho skutkowanja za zdźerženje serbskeje rěče a kultury zawostajiłoj. Oratorijowy cyklus „Počasy“, z kotrehož někotre sadźby zaklinča, liči k najwuznamnišim twórbam serbskeje hudźbneje kultury. Nimo toho słyša wopytowarjo w koncerće instrumentalne twórby załožerja serbskeje wuměłskeje hudźby a twórby načasnych serbskich komponistow, kotřiž su so z tworjenjom Kocora rozestajeli.
Wotewrjeny proces
Policija (14.10.22)
Hóršemu zadźěwać móhli
Budyšin. Takrjec zbožo w njezbožu měješe minjenu wutoru žona w Budyšinje, kotraž by so bjezmała z woporom wobšudnikow stała. Wokoło připołdnja dósta 64lětna powěsć přez whatsapp na swoje šmóratko. W powěsći prošeše pozdatny syn wo to, zo měła mać jemu 3 000 eurow dla někajkeje nuzoweje situacije přepokazać. Tule próstwu Budyšanka spjelni. Jako sej wobšudnik na to dalše pjenjezy žadaše, bě to žonje podhladne a wona wobroći so na sobudźěłaćerjow swojeje banki. Woni wobšudnistwo hnydom spóznachu a móžachu přepokazanku žony cofnyć. Tuž Budyšance žanažkuli škoda njenasta a wona móžeše změrowana domoj hić. Kriminalisća Budyskeho policajskeho rewěra tónle pad wobšudnistwa dale přepytuja.
Dalše běrokratiske wužadanje
Wot 2023 maja tež gmejny za posłužby a dźěła zběrać wobrotowy dawk
Chrósćicy (JK/SN). Z problemom wobrotoweho dawka a kak so tón klětu na posłužby a nadawki gmejny wuskutkuje, mějachu so Chróšćanscy gmejnscy radźićeljo na swojim wčerawšim posedźenju zaběrać. K wobzamknjenju předležachu naćiski wotpowědnych wustawkow, kotrež rjaduja wone popłatki gmejny, kotrež su wot wobrotoweho dawka wuwzate. W přihotach na klětuši folklorny festiwal dźěše w tym zwisku wosebje wo stejnišća za gastronomiskich zastaraćelow a wudawki za milinu a wodu. Jich próca wostanje wot wobrotoweho dawka wuswobodźena. W tym zwisku nasta mjez radźićelemi prašenje, hač su tuchwilne płaćizny za stejnišćo, milinu a wodu hišće načasne a hač njeměli so aktualnym a tež we wokolinje płaćiwym tarifam přiměrić. Konkretne namjety radźićelow wjesnjanosta Marko Kliman (CDU) na wědomje wza a namjetowaše, wustawki wudospołnić a na přichodnym posedźenju z nowymi ličbami znowa wuradźować. Dalše wustawki wo wobrotowym dawku radźićeljo akceptowachu.
Wobškodźenej wazy restawrowanej
Njeswačidło (UM/SN). Dwě wazy z pěskowca, kotrejž so w zašłosći při wichorach wobškodźištej, buštej w Njeswačanskim hrodowym parku po restawrowanju zaso nastajenej. Kaž gmejnske zarjadnistwo zdźěli, stejitej wonej nětko zaso na swojim poprawnym městnje na balustradźe w barokowym dźělu parka.
Historiskej debjence pochadźatej z 18. lětstotka. Stworił je jej za Njeswačanski hrodowy park Benjamin Thomae, mišterski šuler Balthasara Permosera. Zo móhł nóžku jedneje wazy restawrować, je Budyski restawrator Uwe Konjen pěskowc z Reinhardtsdorfa w Sakskej Šwicy wužiwał. Rozdźělnje wulke wotłamane kuski dyrbjachu přirjadować a zlěpić. Mjeńše pobrachowace městna dyrbješe restawrator zamazać a druhim dźělam wazy barbnje přiměrić. Sobudźěłaćerjo Njeswačanskeho komunalneho zawoda potom sobu pomhachu, wazy na jeju podłožk stajić. Kaž Njeswačanske gmejnske zarjadnistwo dale zdźěli, bě restawrowanje móžne dźakowano wulkomyslnym pjenježnym daram za wudźeržowanje hrodu a parka. Za tele dary so komuna wutrobnje dźakuje.
Twarski projekt schwaleny
Radwor (SN/MkWj). Twarski plan za nowotwarsku štwórć „Stara Budyska dróha“ w Radworju je schwaleny. Gmejnscy radźićeljo su projektej na swojim posedźenju předwčerawšim, srjedu, přihłosowali. Do toho bě zastupnica zamołwiteho architekturneho běrowa rozłožiła, z kajkimi wobmyslenjemi su so minjeny čas zaběrali. Tak Budyski krajnoradny zarjad pruwowaše, hač by so hara ze susodneje wjacezaměroweje hale Slavia w bydlenskej štwórći wuskutkowała. Tež z wobswětoškitnym zarjadom su so nastupajo sadźenje nowych štomow dojednali. Dalše pokiwy a wobmyslenja ludźi su wobkedźbowali. Skónčnje radźićeljo twarskemu planej jednohłósnje přihłosowachu, kotryž chcedźa nětko krajnoradnemu zarjadej předpołožić. Wotpowědnu dowolnosć za projekt swójbnych domow wočakuja klětu w měrcu.
Krótkopowěsće (14.10.22)
Zjawne wozjewjenje FUEN
Budyšin. Ze zjawnymaj listomaj swojeho čestneho prezidenta Hansa Heinricha Hansena a Mjeńšinoweje rady w Němskej, kotrejž njewotwisnosć FUEN a jeje angažement za demokratiju a čłowjeske prawa do prašenja stajitej, je so nowowuzwoleny prezidij FUEN předwčerawšim zaběrał. Prezidij je oficialne wozjewjenje wobzamknył, w kotrymž po słowach prezidenta Loránta Vinczeho „zranjenje swobody, demokratije, čłowjeskich prawow a prawostatnosće zasudźa“.
Čestnohamtskich počesćili
Drježdźany. Za wosebity angažement w kulturje je sakska kulturna ministerka Barbara Klepsch (CDU) wčera 27 čestnohamtsce skutkowacych počesćiła. Mjez wuznamjenjenymi su Gabriela Linakowa ze Serbskeje rejwanskeje skupiny Ćisk, Christa Heide z Kulturneje załožby Miłkečanski park a Klaus-Peter Rosenstengel z Wojerowskeje Kulturneje fabriki.
Trolejbusy so do Prahi nawróća
Policija (13.10.22)
Kolesowar ćežko znjezbožił
Budyšin. Při wobchadnym njezbožu je so wčera rano 37lětny muž w Budyšinje strašnje zranił. Před dwórnišćom chcyše wón z Tuchorskeje na Jordanowu nalěwo wotbočić. W tym wokomiku přijědźe wotlěwa 43lětny wodźer motorskeho a do kolesowarja zrazy. Tón so ćežko zrani, tak zo dowjezechu jeho k dalšemu zastaranju do chorownje. Wěcna škoda wučinja něhdźe 250 eurow.
