Policija (11.10.22)
Štom pokradnyć spytali
Trjebin. Na njewšědnu rubiznu měrjachu so njeznaći minjeny kónc tydźenja w Trjebinje. Tam podachu so na priwatnu ležownosć a započachu aziski klon wuryć. Dokónčili pak woni swój njeskutk njejsu. Snano je jich něchtó mylił, snano pak bě dźěło přećežke, přetož aziski klon ma chětro sylne korjenje. Přiwšěm je policija na městnje slědy zawěsćiła a nětko za skućićelemi pyta.
Z wobchoda pjenjezy spakosćili
Budyšin. Njeznaći su so w nocy na njedźelu do wobchoda na Budyskej Bohatej hasy zadobyli. Kaž policija rozprawja, woni we wobchodźe njemdrje zachadźachu, mobiliar skóncowachu a pjenjezy pokradnychu. Wo kotru sumu so jedna, bohužel znate njeje.
Přewjedu projekt
Rakecy. „Moja serbska domizna“ je hesło projektoweho tydźenja 5. lětnika Rakečanskeje Pawołskeje šule, z kotrymž so šulerki a šulerjo tutón tydźeń zaběraja. Mjez druhim wopytaja studijo Serbskeho rozhłosa, rejuja ze SLA, wobhladaja sej staru cyrkwinsku biblioteku a nawjerća krótke filmy wo serbskich temach. Sobotu wot 14 do 17 hodź. wuslědki w šuli prezentuja. Předwidźane su dale kwis, hudźba a reje. K tomu su zajimcy witani.
DZA so předstaji
Wojerecy. Z Němskim centrumom za astrofyziku (DZA) ma we Łužicy wulki slědźenski centrum z mjezynarodnym wuprudźenjom nastać, kiž stwori perspektiwy za cyły region. Što pak DZA dokładnje čini a što wón za region wunjese? Na tutej prašeni a dalše wotmołwjeja dr. Christian Stegmann, dr. Maria Krause a Katharina Henjes-Kunst jutře, srjedu, wot 19 hodź. we Wojerowskej kulturnej fabrice na Piwarskej hasce 1. Wšitcy zajimcy su na informaciske zarjadowanje přeprošeni.
W radiju wo Zejlerju
Zo móhli ludźo twarić
Zapadnje sprjewineho města ma nowotwarska štwórć nastać
Budyšin (SN/MWj). Dźeń a wjace ludźi so w Budyšinje naprašuje, hdźe móhli sej ležownosć kupić a na njej jednoswójbny dom twarić. Kaž měšćanski zarjad wčera zdźěli, chce město tuž na swojej zapadnej kromje ležownosće předać a tak nowu bydlensku štwórć wutworić. W Ratarjecach je něhdźe 135 000 kwadratnych metrow wulka płonina w planje wužiwanja ležownosćow hižo za bydlenske zaměry wupisana. Tuž móža tam trěbny twarski plan nastajić.
Po informacijach města móhło něhdźe 150 jednoswójbnych domow z 500 do 800 kwadratnych metrow wulkimi ležownosćemi nastać. Za to pytaja nětko inwestora, kiž bydlensku štwórć jako cyłk wuwije. „Wón ma za płoninu swójski koncept zdźěłać. Inowatiwne měšćanskotwarske ideje pod wobkedźbowanjom aktualnych towaršnostnych a wobswětopolitiskich tendencow su wuraznje witane“, rěka w nowinskej zdźělence města. Bydlensku štwórć planować a ju k trěbnym medijam přizamknyć móže so we wjacorych wotrězkach stać. Při tym pak maja cyłkowne planowanje wulkeje płoniny wobkedźbować.
Maja nowe wohnjowoborne awto
Bóšicy (MiR/SN). Bóščanska wohnjowa wobora wobsteji lětsa 8. oktobra dokładnje 146 lět, štož njeje jubilejna ličba. Přiwšěm bě to zańdźenu sobotu wobydlerjam gmejny hódna přičina swjećić. Wšako dósta wohnjowa wobora nowe wohnjowoborne awto. Jězdźiło bu po trochu njezwučenych měrach wrotow gratownje natwarjene. Awto je trochu dlěše a niše hač to jězdźidła su, kotrež druhe gmejny wobstaraja. „Před třomi lětami, w nowembru 2019“, tak wjesnjanosta Stanij Ryćer (rjemjesło Bóšicy), „smy jězdźidło skazali. A tež hdyž je nětko mamy, njeje wone hišće doskónčnje wuhotowane. To pak so přichodne tydźenje nachwata.“ Jězdźidło, kotrehož je Budyski wokrjes pjenježnje podpěrał, płaći něhdźe 370 000 eurow.
Składnostnje 800. róčnicy prěnjeho naspomnjenja Klětnoho je ...
Porjedźenka
Ja jich wobdźiwam
Noweho přirjadnika wuzwolili
Z personalnymi naležnosćemi je so Budyski wokrjesny sejmik na swojim wčerawšim posedźenju zaběrał. Tak je předsyda frakcije SPD Gerhard Lemm Uda Wićaza (CDU) jako noweho krajneho radu spřisahał.
Budyšin (CS/SN). W dalšim rozsudźe běchu wokrjesni radźićeljo Jörga Szewczyka za přirjadnika z jednaćelskim wobłukom 1 krajnoradneho zarjada wuzwolili. Za njeho hłosowaše 62 radźićelow z haj, jědnaće z ně a sedmjo so hłosa wzdachu. Sewczyk je dotalny nawoda wokrjesneho financneho zarjadnistwa a wukonja nawod nutřkowneho serwisa komisarisce. Nowe zastojnstwo wón 1. nowembra nastupi. Do jeho zamołwitosće słušeja nimo mjenowaneju dale zarjad za twarjenja a ležownosće, zarjad za wukrajnikow, žiwidła wobstražowacy a weterinarny zarjad kaž tež šulski, młodźinski a strowotniski zarjad.
Krótkopowěsće (11.10.22)
Ličba protestowacych přiběra
Budyšin/Zhorjelc. Po informacijach policije je wčera znowa tójšto ludźi po cyłej Sakskej protestowało. W Budyskim a Zhorjelskim wokrjesu zwěsćichu něhdźe 5 000 wobdźělnikow. Předewšěm hladajo na energijowu krizu a stupace płaćizny we wšěch žiwjenskich wobłukach ludźo swoje njezrozumjenje zwuraznjeja. Protesty přewažnje měrnje wotběžachu.
Nowa čłonka přirady ECMI
Flensburg. Zastupowacu direktorku Instituta za slawistiku Pólskeje akademije wědomosćow prof. dr. Nicole Dołowy-Rybińsku su za čłonku přirady Europskeho mjeńšinoweho slědźenskeho centruma (ECMI) w Flensburgu powołali. Spočatk nowembra chce so gremij ze 17 čłonkow a čłonow z cyłeje Europy a Ameriki w Flensburgu schadźować.
Nahladny rozrost korona-padow
Zajim za dokumentami žada sej rozrisanje
Pančicy-Kukow (JK/SN). Dokumenty a podłožki zarjadnistwa maja so po zakonju wěsty čas składować a wotkładuja so zwjetša w archiwach. Tak hodźa so pozdźišo trěbne podłožki abo wopisma zaso wužiwać abo za kontrole předpołožić. Wosebje podłožki nastupajo wosobowe daty wobydlerjow su přeco zaso trěbne a maja so tak zachować, zo hodźa so stajnje zaso wužiwać. Tak je tež pola zarjadniskeho zwjazka „Při Klóšterskej wodźe“ w Pančicach-Kukowje. Tam su samo štyri archiwy, jedyn za wosobowe daty, za twarske dokumenty, archiw komornistwa a pinčny archiw, w kotrymž chowaja podłožki nastupajo komunalne dźěło a protokole posedźenjow gmejnskich radow a zarjadniskeho zwjazka.
