Nimale 30 namjetow zapodate
Wojerecy (SN/MWj). Hač do 14. nowembra maja wobydlerjo města Wojerec a přisłušacych wsow składnosć, namjety za wobydlerski etat 2022 zapodać. Móžno je to mjez druhim ertnje w radnicy, pisomnje z wotpowědnym formularom abo tež internetnje na stronje města pod . Přidatna móžnosć budźe zajutřišim, pjatk. Wot 9 do 17 hodź. změja we Łužiskim centeru informaciske stejnišćo, hdźež móža zajimcy swoje prašenja wo wobydlerskim etaće wotbyć a runočasnje swoje namjety za polěpšenja w měsće direktnje wotedać.
Dotal je 29 namjetow dóšło, kaž měšćanske zarjadnistwo informuje. Tak je namjetowane, nowe hrajkanišća na wjacorych městnach runje tak kaž chódniki porjedźeć, stołpy wobchadnych znamjenjow wobarbić a ławki k posydnjenju nastajić. W Ćisku wobydlerjo namjetuja, fasadu hosćenca „K zelenemu wěncej“ ponowić, w Hórnikecach pak přeja sej nowe nastroje za hrajkanišćo.
Samo drohoćinka pódla była
Za někotrežkuli twory dyrbiš dźensa hłuboko do móšnje sahnyć, mjez druhim za kolesa. Při zjawnym přesadźowanju namakanych wěcow móžeš porno tomu tójšto lutować.
Kamjenc (BG/SN). Sčasami so ludźo dźiwachu, kajke pokłady w Kamjenskim běrowje za namakanki w běhu časa nazběraja. Něhdźe 40 zajimcow je minjenu sobotu do starych busowych garažow na Jahnowej přišło, zo bychu so tam wobdźělili na přesadźowanju namakankow. Mjez mnohimi kolesami bě tež jedyn e-bike pódla, samo kultowy moped S 50 z časa NDR bě w poskitku. Dohromady bě jich něhdźe sto kolesow. Na blidźe bě mały wuběr časnikow widźeć. Na prěni zwjeršny pohlad jednaše so wo tuni ćikot. Štóž je dokładnišo hladał, wuhlada pak tež časnik swětoznateje firmy Lange und Söhne ze sakskeho městačka Glashütte. Tajke nowe chronometry płaća wjacore tysac eurow. Wša česć sprawnym namakarjam, kotřiž hotowe drohoćinki w běrowje za namakanki wotedadźa.
Po lońšej koronowej přestawce staj moderatoraj Olaf Pöschk a Georg ...
Zjawna peticija Budyskej měšćanskej radźe startowana
Wobaranje přećiwo wobzamknjenju hłowneho wuběrka Budyskeje měšćanskeje rady, na Čornoboze Bismarckowy pomnik zaso stajić, je dalši schodźenk demokratiskeho wobdźělenja docpěło. Kulturnowědnik Julian Nyča je zjawnu onlinepeticiju pod titlom „Kein Bismarck-Denkmal auf dem Czorneboh/Čornobóh“ nastorčił. Hač do připołdnja běštej dźensa 102 ludźi podpisałoj.
Budyšin (SN/at). Podpisacy přizamkuja so dotalnym protestam přećiwo wotumej hłowneho wuběrka w naležnosći Bismarckoweho pomnika. Woni wobroćeja so na měšćanske radźićelki a měšćanskich radźićelow z próstwu, zo bychu tući wobzamknjenje zběhnyli. Peticiju podpisać je hač do 13. decembra móžno, ju chcedźa na posedźenju Budyskeje měšćanskeje rady 15. decembra přepodać, kaž iniciator Julian Nyča na naprašowanje našeho wječornika zdźěli.
Krótkopowěsće (03.11.21)
Incidenca dale dosć wysoka
Budyšin. Z wčera w Budyskim wokrjesu wozjewjenymi 87 natyknjenjemi z koronawirusom je so tu dźensa wot RKI podata incidenca na 305,4 zwyšiła. Wot 1 844 schorjenych lěkuja 67 w klinice. We wokrjesu Zhorjelc rozprawjachu wčera wo 164 dalšich infekcijach, 84 wosobow korony dla w chorowni zastaruja. Indicenca tam je po RKI dźensa 294,5.
Podróšenja lětsa kaž 2008
Kamjenc. W prěnich dźewjeć měsacach lěta dyrbjachu sakscy přetrjebarjo zdźěla sylnje zwyšene płaćizny akceptować. Rata lětneho podróšenja mjez januarom a septembrom bě přerěznje 2,4 procenty nad niwowom samsneje doby loni, kaž Statistiski krajny zarjad dźensa w Kamjencu zdźěli. Wyša inflaciska rata za prěnje dźewjeć měsacow bě naposledk w lětomaj 2007 a 2008 z 2,6 proc.
Słowjanska cyrkej w Awstriskej
„Hdźež so módrja, zelenja“ tola zaklinčało
Město Budyšin haji mjeztym 20 lět partnerske zwiski z pólskim Bolesławiecom. Koronapandemije dla běchu drje lětsa wjacore zhromadne projekty wotprajene, přiwšěm stej wobaj krajnoradnej zarjadaj mały folklorny festiwal přewjedłoj, a to pod hesłom „Přezmjezna kultura Budyšina a Bolesławieca“. Městnosć cyłodnjowskeho zarjadowanja bě Bolesławiecske Stare dźiwadło, štož je rjany pisany plakat připowědźił. Z Pólskeje su so njeličomne ludowe ansamble, chóry a kapały za festiwal přizjewili. Z Budyskeho wokrjesa pak stej po mnohich próstwach a naprašowanjach jeničce balet Serbskeho ludoweho ansambla a nĕmski chór Njewotwisneho zwjazka seniorow připrajiłoj, program sobu wuhotować.
Policija (02.11.21)
Z rewěra do jastwa
Wojerecy. To drje sej 25lětny Wojerowčan předwčerawšim rano myslił njeje, zo budźe hišće samsny dźeń w jastwje přenocować dyrbjeć. Wón zjewi so na Wojerowskim policajskim rewěrje, zo by ramikowe čisło kolesa přepruwować dał. Pječa chcyše tele koleso pola eBay kupić. Policisća zwěsćichu, zo bě groćany konik pokradnjeny a zo za nim pytaja. Ale tež młody muž sam bu z přikazom zajeća pytany, tak zo dowjezechu jeho do jastwa. Pokradnjene koleso namakachu pozdźišo pola njeho doma a nic pola eBay. Nětko móža koleso prawemu wobsedźerjej zaso wróćić.
Přewjedu dźěłarničku
Budyšin. „Kajke je twoje stejišćo?“ rěka hesło dźěłarnički, kotruž přewjedu pjatk, 5. nowembra, wot 17 hodź. w Budyskim Kamjentnym domje. Při tym póńdźe hłownje wo to, kak z druhimi ludźimi prawje diskutuješ, jich měnjenje analyzuješ a swójske měnjenje zakituješ a prawje formuluješ. Nawod změje Benjamin Winkler ze Załožby Amadeu Antonio. Zajimcy móža so hač do jutřišeho přizjewić, a to pod telefonowym čisłom 0 35 91 / 5 31 99 72 abo e-mailnje pod . Wobdźělenje je darmotne.
Zběraja znowa pakćiki
Smjerdźaca. Humanitarne towarstwo Swj. Filomeny chce tež lětsa zaso dźěći a swójby w maćerno-dźěćacym domje w Dolní Podluži kaž tež w bołharskim měsće Razgrad a wokolnych wsach z hodownymi pakćikami zawjeselić. Wobsah pakćikow njeje předpisany, móžne su kakaw, słódčizny, hrajki, pisanske materialije a podobne. Pakćiki kaž tež poćehnjenja a najwšelakoriše hygieniske twory hromadźa wot 22. do 25. nowembra wšědnje wot 17 do 18 hodź. w Smjerdźečanskim kulturnym domje. Trjebanu drastu a črije lětsa njehromadźa. Dalše informacije poda Gerat Róbl pod telefonowym čisłom 01 72 / 7 94 75 22.
Dźiwadło z gastronomiju
Wulke plany za bywši Hórnikečanski kulturny dom
Wojerecy (AK/SN). Wjele lět bě bywši Hórnikečanski kulturny dom prózdny. Nětko móhło do njeho zaso žiwjene zaćahnyć. Kaž Wojerowscy měšćanscy radźićeljo na swojim zašłym posedźenju wobzamknychu, předadźa imobiliju z ležownosću Martinej Eitnerej (SN rozprawjachu). Grodkowčan je załožer firmy Werminghoff Entertainment. Wón chce nimale pjeć milionow eurow inwestować a nadźija so za to spěchowanja we wobjimje 90 procentow.
Za nowe pišćele koncertowali
Zo so do cyrkwje dospołnje nowe pišćele zatwarja, so přehusto njestawa. Ćim naročniše je, zo so Slepjanska wosada na tajki krok hotuje. Za to njetrjebaja jeno zmužitosć, ale tež pjenjezy.
Slepo (JoS/SN). Na reformaciskej njedźeli wotmě so w Slepjanskej ewangelskej cyrkwi beneficna nutrnosć na dobro nowych pišćelow, kotrež chcedźa zatwarić dać. Dotalne pišćele buchu lěta 1858 natwarjene. Dokelž so hižo njezadani, je porjedźeć, je wosadna cyrkwinska rada wobzamknyła, nowe natwarić dać. Za to trjebaja něhdźe 300 000 eurow. Dźěl drje dóstanu spěchowany, wosada pak dyrbi tež swójski podźěl zwjesć. Tón chcedźa z darami a beneficnymi koncertami zezběrać.
