Wjesela so na Serbski swjedźeń
Tradicije po dwulětnej přestawce koronapandemije dla zaso rozkćěja. Jedna tajka je w Delnjej Łužicy we wobłuku Choćebuskeho měšćanskeho swjedźenja zajutřišim, sobotu, Serbski swjedźeń.
Choćebuz (SN/at). „Wšitcy, wuměłcy, kulturne skupiny a wězo tež publikum su zbožowni, zo budźe lětsa zaso Serbski swjedźeń w Puškinowym parku.“ Swojim słowam zamołwita za serbske naležnosće města Choćebuza Anna Kosacojc-Kozelowa přida, zo běchu w přihotowanskej fazy mjez někotrymi sobuskutkowacymi najebać wulke wjeselo nad so wotměwacym swjedźenjom, tež wobmyslenja. Bojachu, zo pobrachowaceho zaměrneho zwučowanja za čas korony dla wšitko hišće tak kulojće njeběži kaž je to jich narok.
Funguje „lěpje hač wočakowane“
Platforma Digiserb bě z hosćićelom wirtuelnje wuhotowaneje podijoweje diskusije, w kotrejež wobłuku direktor Załožby za serbski lud Jan Budar a społnomócnjeny samsneje institucije za digitalizaciju Daniel Zoba wo najnowšich wuwićach a wuhladach nastupajo serbšćinu w cyber-swěće informowaštaj. Ćežišćo wčerawšeho zarjadowanja bě slědźenski projekt za mašinelne spóznawanje rěčow.
Krótkopowěsće (16.06.22)
Kretschmer w Romje
Drježdźany/Rom. Składnostnje konstituowanja dźěłoweje skupiny Sakska-Latij (Latium) kaž tež k priwatnej awdiency pola bamža Franciskusa přebywa sakski ministerski prezident Micheal Kretschmer (CDU) wot wčerawšeho hač do soboty w Romje. Jeho mjez druhim delegacija biskopstwa Drježdźany-Mišno pod nawodom biskopa Heinricha Timmereversa přewodźa.
Šulerjo wotpokazani
Worklecy. Wyša šula Worklecy dyrbi na wukaz LaSuB štyrjoch šulerjow z Chróšćanskeje gmejny wotpokazać. Starši měli jich do Ralbic słać. To zdźěli wčera Domowina. Starši su tomu pisomnje znapřećiwili a Serbske šulske towarstwo kaž tež Domowina a wjesnjanostaj Worklec a Ralbic-Róžanta zasadźuja so w lisće ministrej Christianej Piwarzej za wutworjenje dweju 5. lětnikow we Worklecach.
Za změnu krajneje wustawy
Projekt na dobrym puću
Najpozdźišo 2024 chcedźa strowotniski centrum twarić započeć
Hamor (AK/SN). Medicinski zastaranski centrum jako projekt Hamorskeje gmejny we wobłuku strukturneje změny je na dobrym puću. To podšmórny wjesnjanosta Achim Junker (CDU) předwčerawšim na posedźenju gmejnskeje rady. „Smy projekt Zhorjelskemu wokrjesej zapodali. Tam su jón jako dobry posudźowali a sakskej agenturje za strukturne wuwiće (SAS) dale dali“, Junker rozłoži.
Někotre korektury měješe gmejna hač do 9. junija dodać. Při tym dźěše mjez druhim tež wo financy. Za to prošachu najprjedy wo podlěšenje termina, štož pak SAS wotpokaza. Skónčnje je so tola poradźiło, žadane korektury sčasom zapodać a do swojeho projekta zadźěłać. „To bě chětro wjele dźěła, ale dźakowano wšitkim wobdźělenym smy je zmištrowali“, so Junker wjeseli.
Skulptury su nětko pod wodu
Policija (15.06.22)
Smjertnje znjezbožił
Mučow. Tragiski wukónc měješe jězba 60lětneho wodźerja VW Sharana wčera dopołdnja na zwjazkowej dróze B 96 mjez Mučowom a Wulkimi Ždźarami. Z dotal njeznateje přičiny zajědźe muž na runym puću na lěwy bok jězdnje a zrazy do wjacorych štomow. Při tym so wón w jězdźidle zatłusny a hišće na městnje njezboža zemrě. Wobchadna njezbožowa słužba policije přičiny zražki přepytuje. Nimo policije běchu wohnjowe wobory wokoliny zasadźene. B 96 bě wjacore hodźiny dospołnje zawrjena.
W kubłanišćach SŠT dźěłać
Budyšin. Serbske šulske towarstwo poskići młodostnym wot 15 lět, kotřiž maja zajim na dźěle jako kubłarka/kubłar, prózdninske dźěło w swojich kubłanišćach w Hornjej a Delnjej Łužicy. Zajimcy njech so z krótkim požadanjom pod přizjewja.
Wo wuznamnych wosobinach
Budyšin. Na wosebite wodźenje přeprošuje Muzej Budyšin sobotu, 18. junija, w 15 hodź. Muzeologa Hagen Schulz powjedźe wobdźělnikow po slědach wuznamnych wosobinow města, po kotrychž buchu hasy pomjenowane. Z wutwarom wuchodneho a zapadneho dźěla města w 19. lětstotku nastachu nowe puće, kotrež po wuznamnych wosobinach pomjenowachu, mjez druhim po wyšim měšćanosće Käubleru a mějićelom ćišćernje Weigangu. Po Druhej swětowej wójnje dachu někotre mjena politiskich přičin dla změnić. Po politiskim přewróće 1989 někotre mjena znowa změnichu. Wobdźělenje na wodźenju płaći 3,50 eurow.
Maja swobodne městna
Darowanska akcija wunošna była
Pančicy-Kukow (SN/MWj). Drje wot přichodneho šulskeho lěta smědźa so holcy a hólcy zakładneje „Šule Ćišinskeho“ w Pančicach-Kukowje na nowowuhotowany kabinet za wuměłstwo a ručne dźěło wjeselić. Tón je we wobłuku wobšěrnych twarskich dźěłow zašłych měsacow nastał. Nic pak jenož rumnosć budźe nowa, ale tež meble w njej. Za nje su gmejnscy radźićeljo na swojim wčerawšim posedźenju we Wotrowje nadawk we wobjimje 25 000 eurow firmje WPO w Illertissenje blisko Ulma přepodali.
Dokelž běchu stare meble dodźeržane a so hižo dale wužiwać njehodźachu, sej šula nowe přeješe. Dokelž pak to Pančičansku gmejnu po drohim a z přidatnymi wudawkami zwjazanym saněrowanju kubłanišća přežadaše, zahajichu wobšěrnu darowansku akciju. Z njej zezběrachu dohromady něhdźe 15 000 eurow, kaž wjesnjanosta Markus Kreuz (CDU) wčera zdźěli. Tež wón sam bě tomu přinošował a swoju koronowu premiju za tónle zaměr přewostajił.
