Husace wiki zaso přeprošuja
Fleischer radźićelam „werbalne wotbrónjenje“ poručił
Budyšin (CS/SN). Jeno štwórć hodźiny traješe wurjadne posedźenje Budyskeje měšćanskeje rady, kotrež bě wyši měšćanosta Alexander Ahrens (SPD) minjenu srjedu zwołał. Jenički dypk dnjoweho porjada bě přeće Ahrensa, směć tež jako stawnik skutkować, za čož bě wosebite třidnjowske dalekubłanje zmištrował. Kaž hižo na zašłym posedźenju radźićelow, jako wo naležnosći diskutowachu, jemu tež tónraz wjetšina radźićelow přihłosowanje zapowědźi, mjenujcy 16. Štyrjo běchu za Ahrensowe přeće, pjećo so hłosa wzdachu.
Wyši měšćanosta pak so z wotpokazanjom wotnamakać nochce. Kaž wón připowědźi, chce w přisłušnym prawniskim dohladowanskim zarjedźe znapřećiwjenje zapodać, přetož naležnosć dyrbja zasadnje rozrisać. Ahrens powołuje so na „nutřkownu organizacisku swobodu“ a na „škitanu swobodu powołanskeho skutkowanja“. Zo wón při tym jenož na sebje mysli, kaž jemu medije wumjetowachu, je wobsahowje wopak. Za swoje emocionalne wustupowanje na zašłym posedźenju parlamenta prošeše wón wo zrozumjenje.
Nuzowe milinowe nastroje trěbne
Njedawna wichorowa nižina Ignac je diskusiju wo tym wožiwiła, hač měli wohnjowe wobory nuzowe milinowe nastroje kupić abo nic. W Miłorazu na přikład běchu ludźo wichora dla 28 hodźin bjez miliny.
Trjebin (CK/SN). Tři tydźenje po wichoru Ignacu wobydlerjow Trjebinskeje gmejny tale wěc přeco hišće zaběra. Wokoło Slepoho dźě je woneho 21. oktobru milina wupadnyła. Wosebje potrjecheny bě Miłoraz. Ludźo běchu 28 hodźin bjez miliny. „Mam zaćišć, zo je wjes hižo wotpisana, dokelž budźe tak a tak wotbagrowany“, porokowaše wobydlerka na zašłym posedźenju Trjebinskeje gmejnskeje rady. Podobnje wupraji so Miłoraski wjesny předstejićer Detlef Rölke. Jemu po wichorje zdźělichu, zo „su wažniše wsy, kotrež dyrbimy přizamknyć“. Miłoraz nima žanu prioritu. To samo wjesnjanosta Waldemar Locke (CDU) wobkedźbuje.
Klětu dwójna informacija
Kulturnej pomnikaj matej nowu, zhromadnu infotaflu dóstać
Njeswačidło (JK/SN). Pawšalne spěchowanske srědki, kotrež sakske komuny lětsa dóstanu, su nětko na kóncu lěta nimale wšudźe rozdźělene. Tak tež w Njeswačanskej gmejnje, hdźež maja nimo wonych 70 000 eurow spěchowanskich srědkow za wjesne komuny tež hišće 5 000 eurow za spěchowanje žiweje dwurěčnosće w gmejnje.
Wulki čwak su gmejnscy radźićeljo hižo rozdźělili, při čimž tež na towarstwa zabyli njejsu. Podpěra pak je zwjazana z konkretnymi projektami, za kotrež chcedźa towarstwa pjenjezy zasadźić. Na minjenym posedźenju gmejnskeje rady zdźěli komornica Liliane Wetzko, zo su sydom towarstwam hižo podpěru za projekty wupłaćili. Wšitke dalše hišće wo projektach rozmysluja abo njejsu je dotal hišće zapodali.
Nowe hrajkanišćo hotowe
Runje na lětušim Mjezynarodnym dnju dźěsća bě symboliski prěni zaryw za nowe hrajkanišćo při horće w Pančicach-Kukowje. Mjeztym drje je wone dotwarjene, oficialnje přepodać pak je hišće njemóžachu.
Pančicy-Kukow (SN/MWj). W běhu štyrjoch měsacow na zelenej łuce nowe hrajkanišćo natwarić je zawěrno sportowske wužadanje. To rjeknychu hižo spočatk junija w Pančicach-Kukowje, jako bě tam symboliski prěni zaryw za hrajkanišćo při tamnišim horće. Hač do kónca oktobra měješe wone dotwarjene być. Termin je zahrodniska firma Měrćina Krala dodźeržała, zdźěli wjesnjanosta Markus Kreuz (CDB) na zašłym posedźenju gmejnskeje rady. Bohužel holcy a hólcy nowe hrajkanišćo hišće wužić njemóža. Najprjedy dyrbi wusyta trawa trochu přirosć, zdźěli Křesćansko-socialny kubłanski skutk (CSB) jako nošer. Potom budźe wjeselo zawěsće ćim wjetše.
Witanske tafle Njebjelčanskeje gmejny kaž tule na kromje Serbskich ...
Dalšej hłosaj přećiwo pomnikej
Wotpokazanje znowanatwara Bismarckoweho pomnika na Čornoboze dźeń a bóle přiběra. Słowa jimała je so wčera předsydka SPD Sakskeje. Serbske młodźinske towarstwo Pawk informowaše wo rezoluciji w naležnosći, kotruž běchu wobdźělnicy generalneje zhromadźizny Młodźiny europskich narodnych mjeńšin (MENS) 6. nowembra w bretoniskim Lorienće jednohłósnje schwalili.
Krótkopowěsće (16.11.21)
Incidenca dale nad tysac
Budyšin. Z 1 053 je incidenca po Roberta Kochowym instituće dźensa w Budyskim wokrjesu dale nad tysac. Wot minjeneho pjatka su tu wo 962 wobkrućenych natyknjenjach z koronawirusom a štyrjoch smjertnych padach informowali. Za samsnu dobu je wokrjes Zhorjelc wčera wo 882 infekcijach a wo dwěmaj zemrětymaj rozprawjał. Incidenca tam wučinja po RKI dźensa 783,5.
Schadźowanka znowa online
Budyšin. Hladajo na tučasne wobstejnosće a naležne poručenje krajnoradneho zarjada Budyšin je so přihotowanski wuběrk rozsudźił, schadźowanku lětsa znowa w digitalnym formaće přewjesć. Hižo zestajany kulturny program móža zajimcy online sćěhować, kaž Załožba za serbski lud zdźěli.
Němske ćahi w sewjernej Čěskej
Liberec. Na hłownej železniskej čarje Liberecskeho kraja budu wot 12. decembra moderne ćahi Trilex němskeho wobchadneho předewzaća Die Länderbahn zasadźene. Runje podpisane zrěčenje nastupa trasu Mladá Boleslav – Česká Lípa – Rumburk. Klětu chcyło předewzaće tež čaru Liberec – Česká Lípa – Děčín přewzać.
Z dypkom so z Běłeje wróćili
Wopominanje je zdobom namołwa
Budyšin (CRM/SN). Hižo 33. raz wopominachu němscy kaž tež serbscy křesćenjo zhromadnje ze sotrami tudyšeho konwenta klarisow w klóšterskej cyrkwi minjenu wutoru pogromowu nóc, kotraž bě wot 9. na 10. nowember 1938. Zjawna namóc nacionalsocialistow přećiwo Židam, na kotrejž pak njeběštej jeničce SA a SS wobdźělenej, so w mjenowanej nocy započa. Tehdy bu w Němskej nimo 267 synagogow tež něhdźe 7 500 wobchodow židowskich sobuwobydlerjow zdźěla dospołnje zničenych. Přez lětdźesatki rěkachu tymle podawkam „Reichskristallnacht“. Hladajo na historisku dimensiju zahuby je nětko rěč wo pogromowej nocy. Tuta namóc přećiwo židowskemu ludej, trajaca hač do lěta 1945, žadaše sej někak šěsć milionow woporow.
Policija (15.11.21)
Na dróze so wubědźowałoj
Njedźichow. Ilegalne awtowe wubědźowanje je policija sobotu wječor na zwjazkowej dróze B 97 pola Njedźichowa skónčiła. Policisća zwěsćichu tam sylnje motorizowanej jězdźidle, kotrejž hač do 200 km/h spěšnje do směra na Wojerecy smaleštej. Při wotbóčce do Čorneho Chołmca zastojnicy awće zadźeržachu. Za wodźidłomaj Seata a Audija sedźeštaj mužej w starobje 22 a 36 lět.
