Radwor. Na swjedźenju Božeho spěća zajutřišim, 26. meje, přeprošuja na wjacorych městnach muži, kotřiž su z kolesom abo pěši po puću na přestawku. Tak móža woni mjez druhim wot 10 do 17 hodź. na Radworskej kupje pozastać. Wot 11 hodź. zaklinči tam live-hudźba Olivera Stavenowa. Nimo toho změja kaž kóžde lěto słódnu hrochowu poliwku, dźěćacu zabawu a samopječeny tykanc přihotowane. Zjednoćenstwo kupoweho hata so prawje wjele wopytowarjow nadźija.

Konjecy. Móžna stacija za wulět muži budźe Konječanska burska stwa. Tam so wot 11 hodź. wo ćělne derjeměće lačnych wopytowarjow staraja. Nimo toho přewjedu wjacore žortne wubědźowanja kaž flunkyball, bierpong a flip the cup. Konječanski młodźinski klub wšitkich zajimcow wutrobnje přeprošuje.

Nowoslicy. Dinarjecy w Nowoslicach budu tohorunja na přichad wjesołych muži přihotowani. Tam poskićuja k wobjedu šašlik, pražene kołbaski, rězk z fritkami, čerstwje pječene honačiki a wězo chłódne piwo. Hudźbne wobrubjenje budźe runje tak zaručene.

Zwučuja zhromadnje

Drježdźany. Tež lětsa přeprosy studentski zwjazk „Bjarnat Krawc“ znowa na nalětnje pućowanje, kotrež předwčerawšim, njedźelu, přewjedźechu. Pućowanje běchu studenća 2019 po pjeć lětach přestawki wozrodźili. Před lětomaj dyrbjachu je pandemije dla do nazymy přesunyć. Tónraz wobdźěli so dohromady 16 zajimcow. Tež skupina studowacych Lipšćanskeje Sorabije bě sej do Drježdźan dojěła.

Čara je kóžde lěto hinaša. Lětsa star­towachmy připołdnju wot Alaunparka w Nowym měsće do njedalokeje Drježdźanskeje hole. Po šěsć kilometrach, někak na połojcy čary, kiwaše studentam a studentkam přestawka. Při krasnym ćopłym słónčnym wjedrje nóžkowachu wobdźělnicy dale přez lěs a podłu rěčki. Druha etapa wjedźeše pućowacych z hole k lěsnemu hrodźikej a wottam podłu Łobja k róžowej zahrodźe, hdźež sej lód popřachu. Naposledk podachu so po cyłkownje dwanaće kilometrach na łuki při Łobju, hdźež so dalši Drježdźanscy studenća přidružichu. Tam dachu zhromadne popołdnjo a wječor při bjesadźe a kartyplacanju wuklinčeć.