Ćežka technika na dobro jěchanja
Na Hórčanskim sportnišću njejsu tele dny za bulom honili abo so w konjacym sporće wubědźowali. Tam bě ćežka technika zasadźena, štož pak měješe přiwšěm z jěchanjom činić.
Hórki (aha/SN). W lěće 1992 załožene konjace sportowe towarstwo Při Klóšterskej wodźe ze swojimi tučasnje něhdźe 50 čłonami wobdźěla so mjeztym na turněrach po cyłej Němskej. Hač do lěta 2005 organizowaše wone wjacore tajke ze swójskimi mocami tež w Chrósćicach, pozdźišo pak kóždolětnje na sportowym arealu w Hórkach a na płoninach njeposrědnje wokoło tamnišeho stadiona.
Přihoty na turněry su wulke wužadanje čłonam towarstwa a mnohim dalšim jich čestnohamtsce podpěrowacym. Tola tež dźěło po turněrje žada sej dokładne postupowanje. Wosebje strapacěrowany trawnik sportnišća ma so po turněrje zaso wuporjedźeć, zo bychu tam mjez druhim tež koparjo sportoweho towarstwa Módro-běli Hórki dobre wuměnjenja měli a zo njeby strach hrozył znjezbožić, abo so zranić.
Za nowy transporter a kuchnju
Hory (AK/SN). Srědki z komunalneje pawšale Swobodneho stata Sakskeje za spěchowanje wjesneho ruma gmejna Halštrowska Hola zaměrnje wužiwa. Tole podšmórny komornica Stefanie Arndt na zašłym posedźenju gmejnskeje rady. Wot 2018 do 2020 dóstachu runja druhim komunam wob lěto 70 000 eurow. Tež lětsa smědźachu so nad samsnej sumu wjeselić. Tak su w Blunjanskej pěstowarni za 4 900 eurow kuchnju zatwarić dali. Za twarski zawod gmejny kupichu transporter za 25 000 eurow. A za Židźinsku dobrowólnu wohnjowu woboru wobstarachu za 9 500 eurow wohnjowoborne jězdźidło.
Gmejnski nawoda trěbny?
Wobzamknjenje nowych wohnjowobornych wustawkow přestorčili
Dźěwin (AK/SN). Rozsud wo wohnjowobornych wustawkach a wo wustawkach k wotrunanju wobornikow su gmejnscy radźićeljo Dźěwin na swojim wčerawšim posedźenju přestorčili. Šesćo z nich chcychu wo wustawkach pozdźišo rozsudźić, pjećo bychu předležacej naćiskaj najradšo schwalili.
„Wo wohnjowobornych wustawkach hižo dlěje rěčimy. Wjesnej woborje Dźěwin a Brězowka stej intensiwnje přidźěłałoj, rjekny nawodnica hłowneho zarjada Marion Mudrina. Najwjetša diferenca z nawodomaj wobeju woborow wobsteji w prašenju, hač trjebaja zakonsce předpisaneho nawodu cyłkowneje gmejnskeje wobory. Tón ma so wolić a postajić. Jónu wob lěto zwoła wón po wustawkach lětnu hłownu zhromadźiznu. Dotal tajkeho nawodu njemějachu. „Wobaj wjesnaj nawodaj w Dźěwinje a Brězowce so derje wothłosujetaj“, podšmórny wjesnjanosta Helmut Krawc (SPD). „Wot lěta 1999, potajkim dołhož naša gmejna wobsteji, to takle praktikujemy. Hdyž je hłowna zhromadźizna w Brězowce, su zastupjerjo Dźěwina pódla a nawopak.“
Nawoda muzeja dźe na wuměnk
Grodk (JoS/SN). Jako so Eckbert Kwast 1958 w Grodku narodźi, drje njeby jemu nichtó wěšćił, zo wón raz po cyłej Łužicy takrjec muzejowe slědy zawostaji. Ale žiwjenje je w dwěmaj towaršnostnymaj systemomaj swójske puće šło. Wuchodźiwši rozšěrjenu wyšu šulu studowaše Kwast mašinotwar a dźěłaše na to w płunokombinaće Čorna Pumpa. Po politiskim přewróće pak wón tam hižo žadyn přichod njewidźeše a započa 1990 jako přidružnik w tehdyšim Grodkowskim domizniskim muzeju. Tam je dlěje hač 30 lět skutkował, hač do 2002 pod muzejowym nawodu Manfredom Ihle, wot toho časa jako nawoda. Nětko so wón na wuměnk poda.
Mjeztym drje ma kóždy swoje bydlenje abo swój dom adwentnje ...
Zražka před chorownju
Krótkopowěsće (02.12.21)
26 schorjenych zemrěło
Budyšin/Zhorjelc. Wo 26 smjertnych padach korony dla abo w zwisku z njej stej wokrjesaj Budyšin (15) a Zhorjelc (11) wčera rozprawjałoj. Z podatymi 1 297 natyknjenjemi je incidenca po Roberta Kochowym instituće w Budyskim wokrjesu dźensa 1 514,0 a we wokrjesu Zhorjelc 1 040,9. Tam su wčera wo dalšich 933 infekcijach informowali. 499 ludźi w chorownjach wobeju wokrjesow lěkuja.
Wo mjeńšinach wědu šěrić
Berlin/Budyšin. Wědu wo tudyšich narodnych mjeńšinach měli na šulach po cyłej Němskej šěrić. Dokument z wobsahowymi zakładami za wučbny material su čłonojo mjeńšinoweje rady wčera na swojim online-wuradźowanju rozjimali. Wo tym je dźensa rano Serbski rozhłós informował. Dale su sej mysle wuměnjeli ze Stefanom Seidlerom, nowowuzwolenym zapósłancom SSW w zwjazkowym sejmje.
Wubědźowanje popoweje hudźby
Fachowcy plahowanje pinguinow rozjimali
Wojerecy (SN/MWj). Zwěrjenc we Wojerecach bě minjene dny hosćićel prěnjeje regionalneje konferency wo plahowanju tak mjenowanych Humboldtowych a nawočowych pinguinow w coowach a zwěrjencach. Zastupjerjo dźewjeć coologiskich zarjadnišćow kaž tež štyrjo fachowcy diskutowachu a wuradźowachu we wobłuku hybridneje konferency, potajkim zdźěla přitomni a zdźěla online, wo wosebitych potrěbnosćach přewšo sensibelnych ptakow. „Wjeselu so jara, zo je telko kolegowkow a koleginow moje přeprošenje sćěhowało a zo su zwólniwi sej mysle a nazhonjenja wuměnjeć“, zwuraznja nawoda Wojerowskeho zwěrjenca Eugène Bruins w nowinskej zdźělence.
Policija (01.12.21)
Skład wurumowany
Dźěžnikecy. Móhłrjec wšo, štož móžachu dosahnyć, su njeznaći w Dźěžnikecach pokradnyli. Tam běchu so minjeny tydźeń na dotal njeznate wašnje do składowanskeje hale zadobyli. Kaž Zhorjelska policajska direkcija hakle nětko zdźěli, spakosćichu z njeje dwě kolesy, telewizoraj, tak mjenowanu soundbaru, hudźbnu připrawu kaž tež wšelki grat za dźěło w zahrodce. Po informacijach policije ma rubizna hódnotu něhdźe 7 000 eurow. Nimo toho načinichu paduši něhdźe 50 eurow wěcneje škody. Zastojnicy zawěsćichu slědy a zhotowichu wotpowědne wozjewjenje. Kriminalna słužba Budyskeho policajskeho rewěra pad nětko dale přepytuje.
Štomiki lětsa njepředawaja
Budyšin. Wobšěrnych žadanjow hygieny dla, kotrež bychu při předawanju hodownych štomikow z Budyskeho měšćanskeho lěsa trěbne byli, so tudyše zarjadnistwo lětsa předanje wzda. Město ma dwě štomowej plantaži, na kotrymajž hodowne štomiki plahuja. Zajimcy móžachu sej tam štomik wupytać a čerstwy podrězać. Dokelž bě nawal minjene lěta stajnje jara wulki, chce zarjadnistwo w času pandemije kóždežkuli riziko wotwobarać. Kaž w nowinskim zdźělenju města dale rěka, ma wotprajenje termina jednu lěpšinu. Wobstatk štomikow móže so po suchich lětach wočerstwić a budźe 2022 hišće rjeńši.
Młodźinsku woboru załožili
Wojerecy. Planowane swjedźenske zarjadowanje składnostnje załoženja młodźinskeje wohnjoweje wobory Wojerecy-stare město dźensa přewjesć njemóžachu. Město toho su woboru jenož formalnje w najmjeńšim kruhu załožili, zdźěli rěčnica měšćanskeho zarjadnistwa. Ručež to połoženje zaso dowoli, chcedźa z dźěćimi, staršimi, sponsorami a nawodami woborow oficialne załoženje nachwatać.
