Po wjace hač šěsć lětach prócowanja wo pohrjebny lěs pola Kamjenca zda so cil nětko cyle bliski być. Jedne wažne prašenje pak dyrbja hišće rozrisać, kaž z njedawneho wobzamknjenja Kamjenskeje měšćanskeje rady wuchadźa.
Ličba infekcijow přiběrała
Budyšin/Zhorjelc. W Budyskim wokrjesu je so dalša wosoba z koronawirusom natyknyła, z čimž stej aktualnje dwaj padaj znatej. W Zhorjelskim wokrjesu zwěsćeja tuchwilu dohromady 43 inficěrowanych, 33 wjace hač wčera. Tamniši krajny rada Bernd Lange (CDU) w tym zwisku namołwja, předpisy hygieny bóle wobkedźbować.
Lěsnym wohenjam wobarać
Offenbach/Podstupim. Horce lětnje wjedro Němska wjedrowa słužba za Saksku připowědźa, wočakujo přichodne dny temperatury hač do 36 stopnjow. Strach lěsnych wohenjow tu kaž tež w Braniborskej dale přiběra. Po słowach tamnišeho krajneho społnomócnjeneho za škit před lěsnymi wohenjemi Raimunda Engela njeje dešć minjeny kónc tydźenja ničo změnił, bě to „kapka na wupar“.
Z nahubnikom do šule
Z drogowym miljejom sprjewineho města zaběra so wot wčerawšeho 11. chłostanska komora Budyskeje wotnožki Zhorjelskeho krajneho sudnistwa. Před prezidentom krajneho sudnistwa Friedrichom-Leopoldom zu Stolberg stejachu wčera 16lětna Celina L., 21lětny Patrick W. a 17lětny Tom B. Poslednje mjenowaneho su hakle policisća na přikaz sudnistwa přiwjezli, dokelž bě sej pječa zaspał. Patricka porno tomu přiwjezechu justicni zastojnicy, a to z přepytowanskeje jatby. Wšako wón tuchwilu žanu krutu adresu nima.
Kulow (AK/SN). Měšćanska wohnjowa wobora w Kulowje trjeba dołhodobnje nowu gratownju z kubłanskej rumnosću, předrasćernju a sanitarnym wobłukom. Z naležnosću zaběrachu so nětko čłonojo měšćanskeje rady, jako sej tuchwilne wuměnjenja wobornikow na městnje wobhladachu.
Dźensniša gratownja nasta w lětomaj 1972/1973. „Po politiskim přewróće natwarichu kameradojo w swójskej režiji kuchnju, duše a nuzniki. Nimo toho zawěsćichu nuzowe zastaranje z milinu. Tehdyši wutwar bě trěbny, zo smy scyła dale skutkować móhli“, rozłoži wohnjowoborny nawoda Thomas Werner. W běhu časa dyrbjachu samo špundowanje w jězdźidłowej hali pohłubšić. Jenož tak so pomocne a hašenske jězdźidło (HLF) po wysokosći do hale hodźeše. K wuhotowanju wobornikow słušeja dale tankowe jězdźidło TLF 4000, komandowe awto a transportne jězdźidło. Kulowskej woborje přisłuša dźensa 40 aktiwnych kameradow, 20 žonow, 17 čestnych čłonow kaž tež 30 dźěći a młodostnych.
Jebakaj po puću byłoj
Wojerecy. Njeznaty porik je předwčerawšim we Wojerecach wjacorych wobchodnikow zjebał. Tak chcyštaj muž a žona we wobchodźe na Złokomorowskej někajku maličkosć z wulkej bankowku zapłaćić. Jako chcyše předawarka pjenjezy měnjeć, ju porik do rozmołwy zapleće. Pozdźišo předawarka pytny, zo w kasy pjenjezy pobrachuja. Podobne sta so we wobchodźe při Staroměšćanskim torhošću a w bliskim hosćencu.
Nimo wulkich nadregionalnych serbskich towarstwow, kotrež su často w medijach prezentne, mamy w dwurěčnej kónčinje njeličomne mjeńše a małe towarstwa, kotrež runje tak pilne dźěło wukonjeja, wo nich pak přewjele njezhoniš. W swojej lětnjej seriji lětsa tajke aktiwne cyłki předstajamy, dźensa Hórčanske wjesne towarstwo Při skale (10).
Lětsa w februaru bě tomu pjeć lět, zo su Hórčanske wjesne towarstwo Při skale jako powšitkownowužitne a zjawnoprawniske zjednoćenstwo załožili. Hačrunjež maja w Hórkach aktiwnu wohnjowu woboru a derje dźěłacy młodźinski klub, bě wjacorym Hórčanam wažne měć cyłk, kotryž so wo hajenje serbskich nałožkow kaž tež wo nałožowanje serbšćiny rěče stara. Wjace hač dwaceći entuziastow bě na załoženskej zhromadźiznje pódla, a tam wuzwolichu Marlis Młynkowu za předsydku. Jeje zastupjerka je Antonija Šołćina, Katharina Jurkowa ma financne naležnosće na starosći.