Zaběraja so ze zelemi
Smjerdźaca. Pod nawodom pedagogowki za hojenske rostliny a zela Reginy Krawcoweje poskićitej Serbske šulske towarstwo a Kubłanske srjedźišćo LIPA zelowe wuchodźowanja kołowokoło Smjerdźaceje, Łazka, Róžanta a Smječkec. Při tym sposrědkuja přehlad wo domizniskich hojenskich rostlinach a zelach, jich skutkowanju a móžnosćach wužiwanja. Prěnje terminy su 28. apryla w Smjerdźacej, 19. meje we Łazku a 23. junija w Smječkecach. Poskitk wotměje so stajnje wot 17 do 19 hodź. Dalše terminy sćěhuja. Přizjewjenja přijimuja hač do 27. apryla e-mailnje pod abo pod telefonowym čisłom 0172 7811959. Wobdźělenje na wuchodźowanju płaći wosom eurow.
Startuja do sezony
Na dźěłarničku a finisažu do muzeja
Budyšin (SN). Dźěłarničku fotografije přewjedźe Budyski Serbski muzej sobotu, 23. apryla, wot 10 do 14 hodź. Nawjedować budźe ju wuspěšny Hamburgski fotograf Jörg Müller. Dźěłarnička orientuje so na temje wosebiteje wustajeńcy „5 x Němska po wšěm swěće. W špihelu migracije“ z ćežišćom domizna, migracija, mnohotnosć. K tomu maja fota nastać, kotrež w kursu prezentuja a wuhódnoćeja. Při tym posrědkuje Jörg Müller wědu a praktiske nałožowanje fotografowanja. Kurs je za zajimcow z dobrej kameru, kotrymž je wobchad z fotowym aparatom a fotografiju znaty. Přizjewjenja přijimuja e-mailnje pod adresu abo pod telefonowym čisłom 03591 2708700. Wobdźělenje płaći na wosobu 15 eurow.
Dale přeprošuje Serbski muzej na finisažu mjenowaneje wosebiteje wustajeńcy njedźelu, 24. apryla, w 15 hodź. K tomu porěči fotograf Jörg Müller wo dožiwjenjach a zaćišćach na swojich wotkrywanskich jězbach, hdźež je so jemu poradźiło, němske žiwjenje na pjeć kontinentach fotografisce zapopadnyć. Wšitcy su na finisažu přehladki wutrobnje witani.
Nowe wjednistwo powołali
Rakečanska wohnjowa wobora so technisce a personelnje wuwiła
Rakecy (JK/SN). Na zašłym posedźenju Rakečanskeje gmejnskeje rady dźakowaše so wjesnjanosta Swen Nowotny (CDU) spočatnje nawodźe gmejnskeje wohnjoweje wobory Sörenej Johansonej, kotryž je dotal gmejnsku kaž tež Rakečansku wohnjowu woboru runočasnje nawjedował. Z dobropisom za fitnesowe studijo a čestnym wopismom jeho spušćomne a spomóžne dźěło na dobro gmejny zdoraznichu.
Při wólbach gmejnskeje wohnjoweje wobory w měrcu bu nowe wjednistwo wuzwolene. Na minjenym posedźenju gmejnskeje rady powoła wjesnjanosta nawodu a jeho zastupjerja do jeju zastojnstwow. Nowy nawoda je Stefan Ziesch, jeho zastupuje Frank Schimank. Woběmaj wupřa Swen Nowotny wjele wuspěcha při spjelnjenju jeju zamołwiteho čestnohamtskeho dźěła. Při tym pokaza na to, kak derje je so gmejnska wohnjowa wobora w minjenych lětach technisce kaž tež po personalu wuwiła a je so stała ze spušćomnym garantom za wěstotu, ale tež za pomoc při mnohich gmejnskich zarjadowanjach a akcijach na dobro wobydlerjow.
Sulšečan z tójšto zamołwitosću
Wot měrca wuhladaš w Kulowskej radnicy mjez sobudźěłaćerjemi nowe wobličo. Frank Kral ma tam najwšelakoriše nadawki w twarskim wotrjedźe. Nimo toho je wón nawoda měšćanskeho zawoda za wopłóčki.
Kulow (AK/SN). 5 225 domjacnosćow w centralnej wopłóčkowej syći, 170 domjacnosćow Koćinskeje rostlinskeje wodočisćernje a něhdźe tysac domjacnosćow z małej biologiskej čisćenskej připrawu Frank Kral ze swojimi sobudźěłaćerjemi zamołwja. Jako nawoda měšćanskeho zawoda za wopłóčki ma Sulšečan wot měrca najwšelakoriše nadawki zmištrować. Nimo toho je 47lětny zastupowacy twarski nawoda Kulowa. Dale je wón w radnicy prěni muž hdyž jedna so wo naležnosće wohnjowych woborow.
Tež hdyž wčerawše wjedro optimalne njebě, njejsu so swójby z ...
Kolesowarska šćežka wabi
Ludźo so žedźa
Krótkopowěsće (21.04.22)
Towarstwo do župy přiwzali
Chrósćicy. Předsydstwo Domowinskeje župy „Michał Hórnik“ Kamjenc je Spěchowanske towarstwo Serbskeje wyšeje šule „Michał Hórnik“ Worklecy na swojim posedźenju wčera w Chrósćicach do župy přiwzało. Wo tym informowaše tamniša regionalna rěčnica Domowiny Katharina Jurkowa. Hakle loni je čłonstwo župy wo młodźinskej klubaj Konjecy-Šunow a Pančicy-Kukow rozrostło.
Po jutrach wjace natyknjenjow
Budyšin. Po jutrach ličby zwěsćenych natyknjenjow z koronawirusom w Hornjej Łužicy zaso přiběraja. Roberta Kochowy institut mjenowaše dźensa za Budyski wokrjes w běhu 24 hodźin 845 infekcijow a štyri smjertne pady. Aktualna incidenca tu je 449,6. Wokrjes Zhorjelc rozprawješe wčera wo 632 natyknjenjach, mjez nimi je 75 dźěći. Incidenca po RKI je tam dźensa 328,1.
Ekoratarjam premije wupłaća
Hubertus Ryćer je widźomnje spokojom
Po přerěznej starobje wobydlerjow młoda gmejna Ralbicy-Róžant steji na solidnych nohach
Samo na sebi móhł wón lětsa woswjećić jubilej a snano tomu tak budźe, jeli so wobydlerjo gmejny Ralbicy-Róžant 12. junija za njeho a dalšu dobu z nim wupraja. Wšako je Hubertus Ryćer zastojnstwo wjesnjanosty delanskeje gmejny wot 1990 do 1994 (tehdy bě Róžant hišće samostatna gmejna) a wot lěta 2001 hač donětka tři wólbne doby wukonjał, štož wučinja 25 lět. Přihotowany na to wón je a ma tež wulki lóšt, swoje zastojnstwo dale wukonjeć.
K tomu pohonjeja jeho dotalne wuspěchi, kotrež je sej dyrbjał zdźěla zhromadnje z gmejnskej radu wšelakeje zestawy wuwojować. Ale skónčnje bě to wšo na dobro gmejny a wobydlerjow. Tych a jich wašnja wšak hižo ze štyrjoch lět jako hłownohamtski a 21 lět čestnohamtski wjesnjanosta znaje.
Kompromisy tworić dyrbjał
Móžne zapřijeće do rezerwata maja za wužadanje
Njeswačidło (JK/SN). Korona je w Njeswačanskim gmejnskim zarjedźe zawiniła stop zarjadniskeho dźěła. Nimo wjesnjanosty Gerda Schustera (CDU) stej tež nawodnica financneho zarjada a nawodnica twarskeho wotrjada schorjenej. Někotre dalše sobudźěłaćerki su runje tak schorjene abo maja karanteny dla doma wostać. Tež rěčne hodźiny minjeny tydźeń přewjesć njemóžachu. Wo tym informowaše zastupowacy wjesnjanosta Norbert Braun (rjemjesło a přemysło) na zašłym posedźenju gmejnskeje rady, kotrež bě mjenowanych přičin a přewidneho dnjoweho porjada dla poměrnje krótke.
