Skónčnje zaso raz nalětnje wiki dožiwili
Čorna Pumpa (JOS/SN). Wjele ludźi je minjeny kónc tydźenja nalětnje wiki w Čornej Pumpje wopytało. Kołowokoło železniskeho wagona, na tak mjenowanym „Nastupnišću 19“, poskićowaše něhdźe 80 wikowarjow a rjemjeslnikow swoje wudźěłki a posłužby. Kobjeler a pčołar běštaj runje tak zastupjenaj kaž kwětki, ratarske wudźěłki a samodźěłany palenc. Skrótka prajene bě móhłrjec wšitko na městnje, štož na prawe nalětnje wiki słuša. Wopytowarjow witaše Hans-Jochen Hoffmann, kiž bě 1990 prěni wjesnjanosta gmejny Čorna Pumpa po towaršnostnym přewróće.
Běchu to mjeztym štwórte wiki tajkeho razu, kotrež je towarstwo „Nastupnišćo 19“ ze swojim hibićiwym předsydu Holgerom Schwarzom organizowało. Započeli su 2018 z něhdźe 30 wikowarjemi. Nětko bě jich nimale trójce telko. Zmóžnili su to z tym, zo su teren wokoło železniskeho wagona w minjenymaj lětomaj powjetšili. Kónc tydźenja je so wopokazało, zo je so próca zadaniła. To podšmórnychu tohorunja wikowarjo a rjemjeslnicy, kotřiž so zdobom wjeselachu, zo mějachu zaso składnosć swoje wudźěłki poskićować a předawać móc.
Radźićeljo wuradźuja
Njebjelčicy. Saněrowanje nadróžneho wobswětlenja w Njebjelčanskej gmejnje budźe jedna z temow přichodneho posedźenja gmejnskeje rady zajutřišim, štwórtk, w 19.30 hodź. w gmejnskim zarjedźe. Dale porěča radźićeljo wo dróhotwarskich planach w Pěskecach.
Worklecy. Z naćiskom hospodarskeho plana 2022 a z lětušimi projektami zaběra so Worklečanska gmejnska rada tohorunja zajutřišim w 19.30 hodź. w šulskej jědźerni. Nimo toho chcedźa nadawk za rjedźenje šule rozdać.
Pječwo k róčnym časam
Budyšin. Pječwa k róčnym časam steja w srjedźišću přichodneho „Kofeja w třoch“, na kotryž přeprošuje Budyski Serbski muzej jutře, srjedu, w 15 hodź. Što ma plećena całta ze zelenym štwórtkom činić a kotra symbolika so za njej chowa? W běhu lěta mamy tójšto pječwow, kiž su na krute terminy wjazane. Něšto wšak maja wšitke zhromadnje – wone so na kóncu zjědźa. Wo tym a dalšim přednošuje kuratorka Andrea Pawlikowa a pječwa tohorunja k woptawanju poskića. Dokelž su městna wobmjezowane njech so zajimcy přizjewja pod telefonowym čisłom 03591 2708700 abo e-mailnje pod .
Policija (29.03.22)
Trabi najspěšniši był
Wojerecy. Poł hodźiny je policija předwčerawšim na Drježdźanskej dróze we Wojerecach, hdźež je 50 km/h dowolenych, spěšnosć měriła. Wot 45 měrjenych jězdźidłow bě 14 přespěšnych. Wosom šoferow woteńdźe z warnowanjom, na šesćoch čaka pokuta. Najspěšniše awto bě Trabant. Jeho 43lětny wodźer překroči dowolenu spěšnosć wo 27 km/h. Za to dyrbi z dypkom w Flensburgu a pokutu we wysokosći 180 eurow ličić.
Słónco a dešć hižo njemylitej
Modernizowanje Delnjohórčanskeje sportownje wotzamknjene
Delnja Hórka (UM/SN). Dypkownje kónc měrca su w Delnjej Hórce w Malešanskej gmejnje wobšěrne twarske dźěła na tamnišej sportowni a z njej zwjazanym sportowym domom wotzamknyli. Najwažniši dźěl dźěłow bě ponowjenje třěchi. Při sylnych zliwkach přez nju woda do twarjenja kapaše, rozłoži wjesnjanosta Matthias Seidel (CDU). To pak njebě jenička přičina, so do spěcha měć. Tež přirodoškita dla dyrbjachu hač do kónca měrca wšitko dodźěłane měć, dokelž su sej njetopyrje sportowy dom a sportownju jako domicil wupytali. To je k časowemu zastatkej wjedło. Dokelž dósta gmejna spěchowanske srědki hižo w lěće 2020 přizwolene, pod wuměnjenjom populaciju njetopyrjow přepytować a na nje reagować, je časowy zastatk nastał. Tuž njejsu jeno třěchu a lijawy ponowili, ale tež hnězdźenske móžnosće za njetopyrje připrawili.
Njewšědny hósć město wopytał
Wojerecy (SN). Financny předewzaćel Carsten Maschmeyer je minjeny pjatk we Wojerecach pobył. 62lětny wotnajmje na wjacore měsacy City-hotel w měsće, zo by w nim ukrainskim ćěkancam přebytk zmóžnjał. Nětko chcyše so wón na městnje wo tuchwilnym połoženju wobhonić. „Mje zajimuje, kak so ludźo w měsće přiwzaja a na kotre wašnje by so jim dale pomhać móhło“, tak Maschmeyer.
W rozmołwje z wyšim měšćanostu Torstenom Rubanom-Zehom (SPD) so wón wo wulkej pomocliwosći wobydlerjow a wo čestnohamtskim skutkowanju na dobro ćěkancow informowaše. Wyši měšćanosta rozprawješe wo přeću za internetnym přistupom ćěkancam, zo móhli kontakt k swojim swójbnym w Ukrainje wudźeržować. Dale přeja sej móžnosće k nawuknjenju němčiny. Wuměnjene za to pak je, zo su registrowani, štož móže hač do tři tydźenje trać.
Prěni raz su so minjenu sobotu popołdnju a wječor w Chróšćanskej ...
Za wšitkich
Krótkopowěsće (29.03.22)
Přećah šule wobzamknyli
Budyšin. Wyša šula w Malešecach přeměstni so do Barta. To je Budyski wokrjesny sejmik na wčerawšim posedźenju wobzamknył. Z planowanym přepodaćom noweho twarjenja wot šulskeho lěta 2025/2026 budźe stejnišćo wyšeje šule we wjesnym dźělu Bart. Nětčiša Bartska zakładna šula do Malešec přećehnje. Nošer wyšeje šule je wokrjes, za zakładnu je gmejna zamołwita.
Kolekcije jejkow zapodać
Budyšin. 69. wubědźowanje wo najrjeńše serbske jutrowne jejko za dźěći a młodźinu do 24 lět je zahajene. Hač do 20. apryla móža młodźi ludowy wuměłcy kolekcije z dwěmaj wudutymaj kokošacymaj jejkomaj wotedać. Mytuja so w štyrjoch znatych technikach z tradicionelnymi mustrami a gratami zhotowjene wudźěłki. Tučasnych wobstejnosćow dla maja so kolekcije z póštu zapodać.
Wolóženje pytnyć njeje
Policija (28.03.22)
Mopedist znjezbožił
Smjerdźaca. Ćežko zranił je so w nocy na sobotu młodostny w Smjerdźacej. Wón bě ze swojim mopedom na Radlubinowej po puću, jako z dotal njeznateje přičiny w prawej křiwicy na lěwy bok puća zajědźe, frontalnje do sćežora zrazy a so při tym ćežko zrani. 17lětneho dowjezechu z helikopterom do chorownje. Nimo wuchowanskich mocow běchu tohorunja wohnjowi wobornicy zasadźeni.
