Policija (16.03.22)
Bjez dowolnosće a z drogami
Ćisk. Wjacore přeńdźenja zwěsćili su policisća, jako předwčerawšim připołdnju w Ćisku wodźerja VW Passata kontrolowachu. 43lětny njemóžeše uniformowanym žanu jězbnu dowolnosć předpołožić, z kotrejž by směł wosobowe awto wodźić. Dale steješe wón pod wliwom wopojnych srědkow, štož so při drogowym tesće wukopa. Nimo toho měješe samo tež drogi při sebi. Zastojnicy přewodźachu muža k wotedaću kreje. Ale tež 58lětny wobsedźer awta, kiž bě při kontroli přitomny, žadyn jandźel njeje. Wón bě młódšemu jězdźenje ze swojim awtom po wšěm zdaću dowolił, byrnjež tón scyła žanu trěbnu jězbnu dowolnosć njeměł. Tohodla tež na njeho policajska wozjewjenka čaka, a to přizwolenja jězdźenja bjez dowolnosće dla.
Ma lóšt dale wjesnjanosta być
Chrósćicy (SN/MWj). Swojeho kandidata za wólby wjesnjanosty Chróšćanskeje gmejny 12. junija je wčera tamniši gmejnski zwjazk Křesćanskeje demokratiskeje unije (CDU) nastajił. Kaž wočakowane, dotalny wjesnjanosta Marko Kliman znowa za zastojnstwo kandiduje. Přitomna horstka čłonow strony je Prawočana jednohłósnje za kandidata wuzwoliła.
Předstajić so Marko Kliman wčera přitomnym wězo njetrjebaše, wšako je gmejnu hižo minjene sydom lět wuspěšnje nawjedował. Byrnjež čestnohamtske dźěło wjesnjanosty wužadanje było, ma wón „wulki lóšt w tymle zastojnstwje dale dźěłać“. Při tym jeho pohonja, zo su w zašłych lětach něštožkuli docpěli.
Wšědnje sta ukrainskich ćěkancow
Zhorjelc (dpa/SN). Ruskeho wojerskeho nadpada na susoda dla dochadźa w Zhorjelcu dale a wjace ćěkancow z Ukrainy. „Smy wšědnje na 500 ludźi přihotowani, w nuzy bychmy tež tysac zmištrowali“, zdźěli rěčnica Zhorjelskeho krajnoradneho zarjada. Jeničce póndźelu rano je něhdźe 350 ćěkancow z busami z Pólskeje do Zhorjelca přijěło. Jich běchu z ćahami z Ukrainy hač k pólsko-němskej mjezy přiwjezli.
Mjeztym su sportowu halu w Zhorjelcu za ćěkancow spřihotowali, zo móhli ukrainskich wobydlerjow zastarać a jim trěbny měr popřeć. „To je w prěnim rjedźe za tych myslene, kiž su wječor pozdźe přijěli a hišće njewědźa, hdy a kak za nich dale póńdźe.“
Krótkopowěsće (16.03.22)
Nagelowa wustaja w ministerstwje
Drježdźany. Wot dźensnišeho móža sej zajimcy personalnu wustajeńcu Maje Nageloweje na prěnim poschodźe w Drježdźanskim statnym ministerstwje za wědomosć, kulturu a turizm na tamnišej Wigardowej 17 wobhladać. Přehladka wostanje we wobłuku formata „Kunst im Gang“ hač do 15. junija přistupna.
Dalšich akterow zapřijeć
Budyšin. Z wulkoprojektom Serbski forum wědy na Lawskim arealu w Budyšinje zwjazuja wulku šansu, rozjimać nowe struktury a perspektiwy. Wo tym běchu sej čłonojo kulturneho wuběrka na swojim wčerawšim posedźenju přezjedni. Tam su hromadźe ze zastupjerjemi Załožby za serbsku lud, Serbskeho muzeja a Serbskeho instituta rozmyslowali, kak hodźeli so dalši akterojo do wuwića noweho domu zapřijeć.
Incidenca woteběrała
Policija (15.03.22)
Jědź w pjecy so smudźiła
Wojerecy. W bydlenju na Wojerowskej Löfflerowej je předwčerawšim wječor přizjewjak kura reagował. Na to informowaše susodka wohnjowu woboru. Jako kameradojo přijědźechu, so z bydlenja hižo kurješe. Wočiniwši durje woni zwěsćichu, zo podružnik doma njebě. Po wšěm zdaću bě wón zabył, zo měješe jědź w zapinjenej pjecy stejo. Tohodla bě cyłe bydlenje zakurjene. Zranił so na zbožo nichtó njeje.
Přemysłownišćo dale wućeža
Kulow (AK/SN). Wjacore ležownostne prašenja stejachu na dnjowym porjedźedźe zašłeho posedźenja Kulowskeje měšćanskeje rady. We wobłuku Brěžčanskeho přemysłownišća su dwě płoninje firmomaj předali a tak areal dale wućežili, kaž měšćanosta Markus Posch (CDU) wuzběhny. Jónu jedna so wo 1 462 kwadratnych metrow wulku ležownosć, z kotrejž docpě město 43 000 eurow dochodow. Dalša předata ležownosć je 1 480 kwadratnych metrow wulka a přinjese 44 000 eurow do měšćanskeje kasy. Kaž na posedźenju rěkaše, chce so tam firma zaměstnić a składowansku halu z běrowom a sanitarnym dźělom natwarić.
Třeća předata ležownosć nastupa 1 090 kwadratnych metrow wulki dwór Kulowskeje piwarnje. Glaabec swójba jako mějićel piwarnje chce dwór ponowić. Płonina pak słuša městu Kulowej. Dokelž chcedźa so za ponowjenje wo spěchowanske srědki starać, dyrbja mějićeljo piwarnje dopokazać, zo ležownosć jim słuša. „My jako město potrjechenu płoninu njetrjebamy“, rjekny měšćanosta. Předań ležownosće wunjese Kulowej dalše 19 000 eurow.
Wulki zajim za stary čapor był
Zběra medicinske produkty
Pěskecy. Štóž chce chorownjam na Ukrainje z medicinskimi wudźěłkami pomhać, móže so na Marion Althaus w Pěskecach wobroćić. Wona je minjene dny z transporterom tajke wudźěłki do jednoho klóštra w Premyślu při pólsko-ukrainskej mjezy dowjezła, zwotkelž dary dale ukrainskim chorownjam posrědkuja. Nětko přihotuje dalši transport. Trěbne su mjez druhim sylne srědki přećiwo bolosćam, material k zawobalenju zranjenjow, srědki přećiwo wysokemu ćišćej kreje, desinfekciske srědki, kompresy a sykawy. Nadrobniše informacije podawa Marion Althaus na Kamjenskej dróze 20 w Pěskecach.
Wustajeńca w centrumje
Budyšin. Składnostnje 70. narodnin poda Budyšanka dr. Sabine Kambach we wustajeńcy „Rjane časy“ dohlad do swojeho tworjenja. Přehladku wotewru pjatk, 18. měrca, w 17 hodź. w Budyskim žónskim centrumje na Kamjentnej 15. Literarno-hudźbny program wuhotuje jewišćowa dźěłarnička za pedagogow Němsko-Serbskeho ludoweho dźiwadła.
Čitaja za Ukrainu
Nadźijeja so spěchowanja
Prěni wotrězk planowanja nowotwara pěstowarnje zahajeny
Njeswačidło (JK/SN). Hižo dlěši čas Njeswačanscy gmejnscy radźićeljo wo tym rozmysluja, kak hodźi so nuznje trěbny nowotwar tamnišeje pěstowarnje zwoprawdźić. Za gmejnu je nowotwar wulke pjenježne wužadanje. Tohodla prócuja so wo wotpowědnje wysoke spěchowanje, zo by gmejnski podźěl poměrnje snadny wostał a so bjez přidatnych napinanjow zwjesć hodźał.
Prawniske kroki připowědźene
Njebjelčicy (SN/MWj). W interneće anonymnje wozjewjene pozdatne wěrnosće z Njebjelčanskeje gmejny su na zašłym posedźenju gmejnskeje rady razny protest wjacorych gmejnskich radźićelow wunjesli. Tak so Frank Domš wot wozjewjenjow distancowaše a porokowaše, zo jich awtorojo zmužitosć nimaja swoje wobličo pokazać. „Wumjetowanja škodźa gmejnskej radźe a cyłej Njebjelčanskej gmejnje“, wón rjekny. Dalšej radźićelej so tomu přizamknyštaj a zwurazništaj, zo čujetaj so wosobinsce ranjenaj. Zastupowacy wjesnjanosta Tomaš Klar připowědźi prawniske kroki.
Wjesnjanosta Tomaš Čornak (CDU) wobhladuje wozjewjenja jako difamowanje radźićelow a wobydlerjow. Tež wón připowědźi prawniske kroki. Zdobom je na to skedźbnił, zo w minjenymaj lětomaj při wšitkich přećiwo njemu zapodatych słužbnych pohórškach žanežkuli pokiwy namakali njejsu, zo je swoje słužbne winowatosće zanjechał abo přećiwo nim jednał. „Přiwšěm poskićam anonymnym wozjewjerjam składnosć so zamołwić“, Čornak podšmórny. Po jeho słowach so policija z padom hižo zaběra.
