Z nowej připrawu spjatnišćo wolóža
Škit před wulkej wodu ma tež w našim regionje dźeń a wjetši wuznam. Hižo wobstejace naprawy pak dyrbja runje tak wěste być, zo bychu dale fungowali. To nětko w Hodźiju zwoprawdźeja.
Hodźij (SN/MWj). Spjatnišćo za wulku wodu w Hodźiju dóstanje nowu připrawu, z kotrejž spjatu murju w nuzowym padźe wolóža a přepławjenju zadźěwaja. Z tym budźe spjatnišćo tež w tajkim padźe wěste dosć, kiž móže so statistisce jónu w běhu 500 lět stać. Kaž krajne zarjadnistwo rěčnych zawěrow (LTV) zdźěli, su předwčerawšim w Hodźiju dźěłać započeli, a to ma hač do oktobra 2022 trać. Swobodny stat Sakska a Zwjazk inwestujetej něhdźe 2,35 milionow eurow.
Ponowja „Jěchacych pachołow“
Wjace ludźom šćěpjenje zmóžnić
W Sakskej poskitk šćěpjenja pře koronu nětko na dalšich ludźi rozšěrja. Za to bu cyłkowny prioritny schodźenk 3 wotewrjeny. Nowe rjadowanja płaća za šćěpiwo Astrazeneca.
Drježdźany (SN/at). Ličba přećiwo koronawirusej šćěpjenych w Sakskej je minjene dny widźomnje přiběrała. Přisłušna ministerka Petra Köpping (SPD) rěči wo 1,09 milionach wudźělenych dozow seruma. Móžnosć, pře koronu so šćěpić dać, nětko na dalše kruhi wobydlerstwa rozšěrja. Kaž socialne ministerstwo wčera w Drježdźanach informowaše, płaći za přisłušnikow prioritneje skupiny 3 po šćěpjenskim postajenju Zwjazka, zo móža so wotnětka pola domjaceho lěkarja šćěpić dać. Wot dźensnišeho we 18 hodź. su wotpowědne terminy wot přichodneho dnja w šćěpjenskich centrumach knihujomne.
Krótkopowěsće (21.04.21)
Incidenca woteběrała
Budyšin. W Budyskim wokrjesu informowachu wčera wo 15 dalšich natyknjenych z koronu. Wot tuchwilu 1 567 schorjenych lěkuja 88 w chorowni. Tudyša sydomdnjowska incidenca na 100 000 wobydlerjow je po RKI dźensa 171,5. Wo 136 infekcijach rozprawješe wokrjes Zhorjelc. Tam zwěsćichu wčera dźewjeć dalšich padow z britiskej mutantu wirusa. Po RKI je incidenca dźensa 216,4.
Muzejowe myto wuwołane
Drježdźany. Muzeje swobodneho stata móža so wotnětka wo Sakske muzejowe myto powabić. Ministerstwo za wědomosć, kulturu a turizm w Drježdźanach spožči wuznamjenjenje lětsa wosmy raz. Nimo hłowneho myta w hódnoće 20 000 eurow přizwoli wosebitej po 5 000 eurach. Myto dóstałoj stej dotal mjez druhim Muzej zapadneje Łužicy w Kamjencu a Muzej Budyšin.
Dóstanu dalše pjenjezy
Rakecy. Leaderowy region Hornjołužiska hola a haty dóstanje hač do klětušeho dalše 3,6 milionow eurow za spěchowanje projektow w kónčinje. Prěnju namołwu, srědki požadać, su zamołwići wčera wozjewili. Rakečanski regionalny management tuchwilu spěchowansku dobu 2014–2020 wuhódnoća a přihotuje strategiju za lěta 2023 do 2027.
Ludźi k rozmyslowanju pohnuć
Wojerecy (KD/SN). Kulturne zarjadowanja, kotrež ludźi k rozmyslowanju pohnuwaja, hodźa so w času koronoweje pandemije lědma přewjesć. „Dźeń a nóc za tolerancu“ pak staj tele dny we Wojerecach dopokazałoj, kak móže tajke něšto fungować. Tak móžachu dźěći a młodostni rysowanki a fota na temu toleranca zapodać. To je hišće hač do 25. apryla w młodźinskim klubje Ossi abo e-mailnje pod móžno. „Za dobyćerjow mamy někotre myta přihotowane“, praji Cindy Paulick, kotraž je „Dźeń a nóc za tolerancu“ sobu přihotowała.
Z literarno-hudźbnym online-čitanjom je so na přikład Čornochołmčanski Krabatowy młyn wobdźělił. Tam skutkowaca kulturna pedagogowka Susann Vogel bě so ze swójskim tekstom z Jurja Brězanowym „Čornym młynom“ rozestajała. Mjez druhim zaběraše so wona z prašenjom, w kotrej měrje wjedźetej wěda k dopóznaćam a móc k swobodźe? Čitanje móža sej zajimcy na internetnej stronje www.krabatmuehle.de wobhladać. Hdyž budu prezencne zarjadowanja zaso móžne, chcedźa je w Krabatowym młynje zjawnje přewjesć.
Policija (20.04.21)
Towarstwo z nowym zaměrom
Po zwóńcy chcedźa nětko tež cyrkej saněrować
Bart (CS/SN). Po tym zo je nadawk, kiž bě sej zwony spěchowace towarstwo Bartskeje cyrkwje předewzało, ze saněrowanjom zwóńcy spjelnjeny, chcedźa čłonojo towarstwa nětko nowemu wužadanju wotpowědować. Přetož cyrkej sama dyrbi nuznje saněrowana być. Tohodla załožichu srjedź měrca na sobustawskej zhromadźiznje zwony spěchowaceho towarstwa nowe „spěchowanske towarstwo Bartska cyrkej“. Jeho předsyda je Friedrich Hesse. Towarstwu přisłuša tuchwilu 37 čłonow, wosom z nich w předsydstwje sobu skutkuje.
Wopominaja M. Rostoka
Huska. Hušćanska wosada wopomina jutře, srjedu, wučerja Michała Rostoka składnostnje jeho 200. narodnin. W 17 hodź. zahaji so nyšpor w cyrkwi. Přizamknje so postrowna hodźina z krótkimi přinoškami wo Rostoku. Swjatočnosć zakónči so na kěrchowje při wobnowjenym rowje Rostoka. Michał Rostok narodźi so w lěće 1821 w Bělšecach. Wot 1837 do 1841 wopyta Krajnostawski wučerski seminar w Budyšinje. Skutkowaše štyri lětdźesatki jako wučer w Drječinje. Wón wuwiwaše serbsku přirodowědomostnu terminologiju a běše insektowy slědźer europskeho wuznama. Rostok wumrě 1893 w Husce. 1997 postaji jemu Maćica Serbska nowy narowny pomnik na Hušćanskim kěrchowje.
Diskutuja online
Priwatne wohenje chcedźa dowolić
Kulow (AK/SN). Prastara tradicija chodojtypalenja dyrbi lětsa w Hornjej Łužicy znowa wupadnyć. To wobžaruja tohorunja w Hamorje, Łazu a Kulowje, kaž wottam na naprašowanje rěka. „W swojim hamtskim łopjenu za apryl smy wo tym informowali“, zdźěli Hamorski nawoda hłowneho zarjada Arian Leffs. Łazowski wjesnjanosta Thomas Leberecht (CDU) wujasnja, zo změje so gmejna po płaćiwych předpisach korony dla. A Kulowski měšćanosta Markus Posch (CDU) doda, zo z chodojtypalenjom runje tak wobchadźeja kaž loni. „To woznamjenja, zo žanoho zjawneho chodojtypalenja njebudźe. Porno tomu dowolamy wohenje na priwatnych ležownosćach, ale z wuměnjenjom, zo ludźo koronowe předpisy dodźerža.“
W Hamorskej gmejnje je chodojtypalenje kruće zakótwjene. Na dohromady 13 městnach hewak tajki woheń maja. Zwjetša so wohnjowa wobora, wjesne kluby a domizniske towarstwa wo nje staraja. Gmejna to po swojich móžnosćach podpěruje, praji Arian Leffs.
Časy testowanja rozšěrjene
Smochćicy (SN/MWj). Jedyn z koronowych testowanskich centrumow Budyskeho wokrjesa je w Smochčanskim kubłanišću swjateho Bena. Wo njón stara so hornjołužiska Caritas. Po dwěmaj tydźenjomaj tam zwěsćeja, zo je poskitk wot wobydlerjow derje přiwzaty. Kaž sobudźěłaćerka domu Martina Haschke zdźěli, su tam dotal wjace hač 500 ludźi testowali. Pola dweju z nich bě wuslědk pozitiwny. Wulkeje ličby naprašowanjow dla su so rozsudźili wotewrjenske časy rozšěrić.
Testowanje w Smochćicach je nětko móžne póndźelu, srjedu a pjatk stajnje wot 6 do 10 hodź, štwórtk wot 14 do 18 hodź. a sobotu wot 8 do 12 hodź. Přizjewić móža so zajimcy internetnje pod https://lkbz.de/testcenter-schmochtitz abo pod telefonowym čisłom 035935/ 220. Kóždy ma prawo na znajmjeńša jedyn test wob tydźeń. K terminej dyrbja ludźo swoju chipowu kartku chorobneje zawěsćernje sobu měć. Dalša testowanska stacija Carity je w Kamjencu na Zapadnej čo. 22. Tam testuja póndźelu wot 14 do 17 hodź., wutoru wot 8 do 13 hodź. a štwórtk wot 9 do 12 hodź.
