Wulka nopawa na puntach wotbyła
Wojerecy (SiR/SN). Waha bě minjene dny najwažniši utensil we Wojerowskim zwěrjencu. Tam su lětušu inwenturu přewjedli. Minjeny štwórtk bě najwjetši dźěl něhdźe tysac wjetšich a mjeńšich zwěrjatow waženych, měrjenych a posudźowanych. Pobrachowali su jenož hišće wulke nopawy. Štož zdaše so za zwonkastejacych komplikowana naležnosć być, bě na kóncu cyle jednore, přetož nopawa Bert jako najwjetša da so bjez problemow z tróšku sadom na wahu zwabić. Wona waži dokładnje 132,8 kilogramow a je tuž 2,5 kilogramow wotbyła.
Po njezbožu hrjebakow přińdźetaj jutře, wutoru, nowej hrjebakaj z Berlina do Wojerowskeho zwěrjenca, zo móhli z nimaj takrjec nowu swójbu wutwarić, informowaše nawoda zwěrjenca Eugène Bruins. Wón so nimo toho nadźija, zo budu twarske dźěła w nowej připrawje za mjedwjedźe hišće do jutrow wotzamknjene. Potom móhłoj so mjedwjedźej Björn a Bengt do Wojerec nawróćić. Rozžohnować budu so porno tomu z poslednjej pusćinowej lišku, kotraž do druheho zwěrjenca přećehnje. Tule družinu we Wojerecach hižo njezměja.
Podłu B 96 bórze twarja
Wulke Ždźary (AK/SN). Swój koncept wotwodźowanja wopłóčkow Łazowska gmejna dale krok po kroku zwoprawdźa. Hišće lětsa chcedźa ležownosće podłu zwjazkoweje dróhi B 96 přizamknyć. Na swojim zašłym posedźenju čłonojo Łazowskeje gmejnskeje rady wobzamknychu, zo ma nadawk we wobjimje 560 000 eurow Nišćanska twarska firma STB dóstać.
„Je to zhromadny projekt krajneho zarjada za dróhotwar a wobchad, Kamjenskeje EWAG a Łazowskeje gmejny. Zo njebychmy wobydlerjow přejara poćežowali, přewjedźemy naprawu w štyrjoch twarskich wotrězkach“, rozłoži Łazowski wjesnjanosta Thomas Leberecht (CDU). Wosebite wužadanje budźe, zo maja so časowe wotběhi dokładnje dodźeržeć. To ma inženjerski běrow z Mučowa z twarskej firmu wothłosować. Na zjawnej wobydlerskej zhromadźiznje 24. februara w 16 hodź. w awli Wulkoždźarowskeje zakładneje šule chce Thomas Leberecht wo twarskich wotrězkach a wo móžnym časowym planje informować.
Fuziju cofnyć njeje hižo tabu
Wuznam justicy jako dźěłodawar, korona, dołhi puć k elektroniskej akće a skónčnje hišće pohlad do wšědneho dnja sudnistwa stejachu w srjedźišću njedawneje nowinarskeje rozmołwy Zhorjelskeho krajneho sudnistwa w Budyšinje.
We wobłuku Lěta Zejlerja a Kocora so tež serbšćinarjo 9. lětnika ...
Krótkopowěsće (14.02.22)
Dźeń a wjace natyknjenjow
Budyšin/Zhorjelc. Incidency we wokrjesomaj Budyšin (1389,6) a Zhorjelc (1167,8) bližitej so po Roberta Kochowym instituće němskemu přerězkej. Krajnoradnej zarjadaj informowaštej pjatk – aktualniše ličby hač do redakciskeho kónca njepředležachu – wo 663 nowoinfekcijach a smjertnymaj padomaj w Budyšinje a wo 521 natyknjenjach a jednym smjertnym padźe w Zhorjelcu.
„Lětni hit“ w nowym šaće
Budyšin/Choćebuz. Łužiske popowe duwo Doro Farkašec a Jordan Henson je remix swojeho hita „This style“, zhotowjeneho wot wuměłca KVEN, na YouTube wozjewiło. Dotal bu widejo něhdźe 1 500 króć wotwołane. Z originalnym spěwom bě so duwo za němske předkoło lětušeho wubědźowanja European Song Contest požadało, jury pak namjet naposledk njewobkedźbowaše.
Matura w dwěmaj wersijomaj
Policija (11.02.22)
Garnitury za piwowy stan pokradnyli
Zemicy-Tumicy. Jeli so lětsa někajke wjetše swjedźenje wotměja, drje policija dokładnišo pohlada, hač je tam wšo w porjadku. W Čerwjenych Nosaćicach (Rothnaußlitz) pola Zemic-Tumic mjenujcy su njeznaći wuhotowanje za tajki swjedźeń ze składa pokradnyli. Zhubiło je so dwanaće garniturow za piwowy stan, piwo točenski nastroj, chłódźenska připrawa a zabawjenska elektronika. Rubizna ma hódnotu nimale 8 000 eurow. Paduši načinichu nimo toho 200 eurow wěcneje škody.
Šulerjow přizjewić
Budyšin. Kónc februara a spočatk měrca móža starši swoje dźěći do přichodneho 5. lětnika Serbskeje wyšeje šule Budyšin za šulske lěto 2022/2023 přizjewić. Dokładne terminy su 24. a 25. februara stajnje wot 8 do 12 hodź. kaž tež 28. februara a 1. do 3. měrca. stajnje wot 7 do 16 hodź. Komuž so tele dny njehodźa, móže sej swójski termin dorěčeć, a to pod telefonowym čisłom 03591/ 527 350 abo e-mailnje pod . Za přizjewjenje trěbne su wupjelnjeny přizjewjenski formular, kubłanske doporučenje, narodźenske wopismo, połlětna informacija wot 11. februara 2022 a dopokaz šćěpjenja pře wosypicy.
Z wohnjowoborneje gratownje nastawa zetkanišćo
Radwor (BB/SN). „Na kóncu mějachmy woprawdźite brjušebolenje, hač so dosć rjemjeslniskich firmow na wupisanju wobdźěli!“ Radworska wjesnjanostka Madeleine Rentsch (Minakałscy přećeljo domizny) bě wolóžena, jako móžeše předwčerawšim tamnišej gmejnskej radźe dźewjeć firmow prezentować. Wone wutwarja nětko něhdyše twarjenje Chelnjanskeje wohnjoweje wobory z lěta 1932 na wjesne zetkawanišćo. Wšitke twarske losy móžeše gmejnska rada firmam z blišeje wokoliny přepodać. W aprylu so prěnje dźěła zahaja, a hižo nazymu měł so nowy twar přepodać. Za to běše Radworska gmejna loni 170 000 eurow ze sakskeho spěchowanskeho programa „Witalne wjesne srjedźišća“ dóstała.
Přichodny tydźeń započnu blisko Konjec w gmejnje Ralbicy-Róžant ...
Alternatiwne financy za šulu
Podróšenje nuzuje gmejnu za hinašimi móžnosćemi pytać
Pančicy-Kukow (SN/MWj). Tuchwilne saněrowanje Šule Ćišinskeho je za gmejnu Pančicy-Kukow wulke pjenježne wužadanje. Tole wuwědomi so gmejnskim radźićelam znowa na jich wčerawšim posedźenju we Wotrowskej starej šuli. Tam woni tomu přihłosowachu, zo ma wjesnjanosta nadawk nastupajo zaćmiće woknow k najpřijomnišej płaćiznje wudźělić. Předwidźane bě to za 50 000 eurow, mjeztym su tónle wobłuk na 20 000 eurow redukowali. Přičina je, zo dyrbjachu při mnohich druhich pozicijach tójšto wjace pjenjez wudać hač spočatnje planowane. Znajmjeńša pak su elektrisku připrawu tak instalowali, zo móhli pozdźišo trěbne zaćmiće rumnosćow po potrjebje rozšěrić, wjesnjanosta Markus Kreuz (CDU) wčera rozłoži.
