Knižna premjera w Kamjentnym domje
Kónc měsaca rozsudźa
Kulow. (AK/SN). Wjac hač 3 000 eurow wot wulkeje wody potrjechenym w Bad Neuenahru stej frizerska mišterka Kerstin Tanneberger a mějićelka wobchoda za potrjebu ćěšenkam Birgit Bensch w Kulowje nazběrałoj. Předewzaćelce stej widejo widźałoj, kiž dokumentuje zapusćenja a kotryž bě bywša Kulowčanka swojej sotře pósłała. „Chcemy na městnje pomhać, bě tuž spontana ideja, a dóstachmoj njekomplikowanu pomoc“, Birgit Bensch rozprawja. Darowanskej boksy pola frizerki a w ćěšenkowym wobchodźe běštej započatk. Pozdźišo stej k wšelakim přiležnosćam napoje a jědźe za dobry skutk předawałoj. „Běchu to dary tudyšich firmow. Jim słuša wutrobny dźak!“ Kotre jednotliwe projekty na městnje z pjenjezami podpěruja, iniciatorce zhromadnje z kontaktnymi wosobami w Bad Neuenahru nětko kónc septembra rozsudźa.
Maja noweho nawodu
Njesmě wjace sobu rozsudźeć
Njebjelčanski wjesnjanosta w twarskich naležnosćach gmejny zajaty
Njebjelčicy (SN/JaW). Hotowy posedźenski marathon su gmejnscy radźićeljo Njebjelčic minjeny štwórtk zmištrowali. Nimale 20 dypkow steješe na dnjowym porjedźe wuradźowanja w Njebjelčanskim gmejnskim centrumje.
Šupa a šwinca do pasli dóstać
Po sakskim hońtwjerskim zakonju ma kóždy wobsedźer abo wužiwar ležownosćow prawo, dźiwje zwěrjata popadnyć.
Budyšin (mwe/SN). Něchtóžkuli so jara hněwa, hdyž jemu šup w nocy zahrodku přerywa, liška po kokoše chodźi abo kunjace psy swoje slědy zawostajeja. K tajkim njeluboznym „hosćom“ słušeja tohorunja šwincy, nutrije a dźiwje nukle. Štóž pak chce je popadnyć, měł zwěrinoškita dla žiwjenske pasle wužiwać a je do schadźenja słónca kontrolować. Při tym wšak hdys a hdy k tomu dochadźa, zo spłóšena domjaca kóčka bojazliwje z tajkich pasli wudźěra. Tež tón abo tamny jěžik sej rady do nich zalěze.
Dosahnjene dźiwje zwěrjata zatřělić je jenož wěcywustojnym wosobam přewostajene, štož je bjezpłatne. K nim słušeja rewěrowi hajnicy, skótni lěkarjo abo rěznicy. Wot lěta 1978 je Jurij Lukaš z Worklec hajnik-hońtwjer, za čož ma wotpowědne wopismo. „Jako běch tehdy w swojim rewěrje prěnjeho šupa zatřělił, so w Jědlicy žónska do mnje da, kak móžu tajke šikwane zwěrjatko morić. Dźesać lět pozdźišo samsna wosoba na mnje swarješe, hdy da skónčnje přijědu a šupa zatřělu“, so Jurij Lukaš dopomina.
Wosadny farar wosady swjateju Symana a Judy Měrćin Deleńk je wčera ...
Wid woporow a swědkowdale pohłubšić
Wojerecy (AK/SN). Město Wojerecy chce wopory prawicarskeje namocy 1991 dale ofensiwnje wopominać. Zawjazać chcedźa tež dalšich časowych swědkow, kotřiž so ze šulskimi rjadowanjemi rozmołwjeja. To zawěsći Wojerowski wyši měšćanosta Torsten Ruban-Zeh (SPD) minjeny štwórtk na nowinarskej rozmołwje we Wojerecach. Při tym zhladowaše na dopominanski kónc tydźenja, wotměty wot 17. do 19. septembra pod hesłom „Wojerecy 1991: Dopomnjenki – Dohlady – Perspektiwy“. Z podijowymi diskusijemi, wustajeńcu „Nazyma‘91“, z fotowej pokazku „Běchmy kolegojo“, z kritiskim historiskim měšćanskim wodźenjom, z rozmołwnym wječorkom „To njejsym wědźał“, z wopomnjenskimi kemšemi a knižnym čitanjom je město nad Čornym Halštrowom na podawki nazymu 1991 dopominało. Swědcy su w šulach z wuknjacymi rěčeli, na přikład David Macau na Leóna Foucaultowym gymnaziju. „Chcemy na to nawjazać“, Ruban-Zeh wuzběhny. Předstajomne tohorunja je pomnik „Wojerecy 1991“ na Dr. Külzowej hasy z tafličkami, kotrež pokazuja na wopory a časowych swědkow wudospołnić.
Krótkopowěsće (27.09.21)
Nětko rjadowanje 3G płaći
Budyšin. W mnohich wobłukach płaći wot wčerawšeho w Budyskim wokrjesu rjadowanje 3G. Poskitki smědźa jenož testowani, wustrowjeni abo šćěpjeni wužiwać. Nimo toho wobsteji winowatosć zwěsćenja kontaktow. We wokrjesu bě hač do pjatka pjeć dnjow za sobu kritiska hódnota 35 překročena. Drobne wikowanje je z toho wuwzate. Roberta Kochowy institut je dźensa za Budyski wokrjes incidencu 60,1 a za Zhorjelski 36,7 podał.
Nowa čłonka w předsydstwje
Budyšin. Čłonojo Serbskeho młodźinskeho towarstwa Pawk su sobotu na hłownej wólbnej zhromadźiznje w Budyšinje Luizu Winarjec za nowu čłonku do předsydstwa wuzwolili. Jakuba Wowčerja wobkrućichu jako předsydu. Po wosom lětach w předsydstwje, z toho štyri jako předsydka, rozžohnowachu Francisku Grajcarekec z gremija. Towarstwu přisłuša tuchwilu 17 młodostnych.
Praha – najrjeńše město
Podpěruja sportowe towarstwo
Delanska gmejna nałoži dźěl pawšale za ponowjenje trawersow
Róžant (JK/SN). Samo na sebi chcyše gmejnska rada Ralbicy-Róžant na swojim wčerawšim posedźenju zaso simultanu techniku zasadźić. Dokelž pak njeběchu najebać wulke prócowaje tołmačerja namakali, su posedźenje bjez přełožka přewjedli. Přiwšěm chcedźa simultany přełožk za němskeho radźićela kaž serbšćinu njewobknježacych hosći přichodnje zawěsćić. Za to so z hižo nazhonitej tołmačerku dorozumja a wužiwaja za jeje dźěło pawšalu k spěchowanju dwurěčnosće w gmejnje.
Lětušu pawšalu we wobjimje 70 000 eurow za sylnjenje wjesneho ruma chce komuna za wšelake naprawy zasadźić. Tak su so wčera dojednali, nałožić 24 000 eurow za to, skrućić lětuši hospodarski plan. Dalše 25 000 eurow dóstanje sportowe towarstwo Sokoł Ralbicy/Hórki za ponowjenje trawersow w Stadionje přećelstwa.
Klětu nazymu započnu saněrować
Łužiska a srjedźoněmska towaršnosć hórnistwoweho zarjadnistwa (LMBV) dosaněrowanje južneho brjoha při Slěbornym jězoru wo lěto přestorči.
Łaz (AK/SN). Južny brjóh Slěborneho jězora při Bjedrichečanskim přibrjohu (Friedersdorf) saněrować budźe prawdźepodobnje lěto dlěje trać. To podšmórny Łazowski wjesnjanosta Thomas Leberecht (CDU) na minjenym posedźenju tamnišeje gmejnskeje rady.
„Tak mjenowanu testowu płoninu chcedźa w oktobrje 2022 twarić započeć, a to ze strony jězora“, Leberecht rozłoži. Testowa faza traje wot oktobra 2022 hač do apryla 2023. Poprawne saněrowanje Slěborneho jězora slěduje potom wot oktobra 2023 hač do apryla 2025. Planowane dosaněrowanje brjoha je tuž wo cyłe lěto přestorčene. Campingowu a kupansku sezonu w lětomaj 2022 a 2023 při Slěbornym jězorje pak móža tam bjez wobmjezowanjow a kaž planowane wotměć.
Policija (24.09.21)
Pjany z kolesom po puću był
Wjazońca. Policija je wčera we Wjazońcy napadneho kolesowarja lepiła. Kontrola wujewi pola 37lětneho alkoholowu hódnotu 1,66 promilow, a policija wozjewi jeho wopojenosće we wobchadźe dla.
