Budyšin (SN/JaW). Hłowni kantorojo a zamołwići křižerskich procesionow su wčera wo jutrach 2021 wuradźowali. W přitomnosći Radworskeho fararja Bena Jakubaša je Budyski tachantski farar Wito Sćapan wo swojej njedawnej rozmołwje ze sakskej statnej kencliju nastupajo křižerske procesiony „rysował předstawy kenclije a na čo měli my dźiwać. Zasadnje móžeše wón rjec, zo směmy samo­zrozumliwje jěchać a zo směmy tež spěwać. Přiwšěm pak móže njelubozne wuwiće nastupajo koronu krótko do jutrow to zaso na hrački stajić. To su dekanej Sćapanej jasnje prajili“, zdźěli na naprašowanje farar Jakubaš. Kaž dekan Sćapan wčera informowaše, su so přitomni dojednali, zo ma „zamołwity Drježdźansko-Mišnjanskeho biskopstwa za serbske naležnosće dekan Sćapan hygienisko-škitne naprawy a koncept wotpowědnemu zarjadej Budyskeho wokrjesa zapodać“. Zdobom ma kóždy křižerski procesion za sebje hygieniski koncept za jutry zdźěłać. Wšako su wuměnjenja na městnje chětro rozdźělne. Mjez druhim njebudu w Ralbicach a Kulowje žane zhromadne kemše a nyšpory křižerjow móžne.

Karantena podlěšena

Budyšin/Zhorjelc. Karantena za pozitiwnje na koronu testowanych podlěši so wot dźesać na 14 dnjow – runja telko kaž za tak mjenowane kontaktne wosoby. W Budyskim wokrjesu potrjechi to aktualnje 780 ludźi. Hač do wčerawšeho zwěsćichu tu 30 dalšich natyknjenych, incidenca wu­činješe 84,66. W Zhorjelskim wokrjesu běchu to 30 infekcijow a štyri smjertne pady, incidenca tam bě 76,76.

Planuja wulět ze swjedźenjom

Drježdźany. Na wulět srjedź awgusta do Čornochołmčanskeho Krabatoweho młyna su so wobdźělnicy njedawneho Serbskeho blida towarstwa Stup dale internetnje dorozumili. W Čornym Chołmcu chcedźa Drježdźanjenjo wuhotować za sebje a za zajimcow mały swjedźeń poezije, ze serbskimi awtorkami a awtorami kaž tež z rejkami Drježdźanskich dźěći w narodnej drasće.

Loni wjele mjenje hosći měli

Běła Woda (AK/SN). Drjewjany móst nad Brusnikom (Braunsteich) w Běłej Wodźe dyrbja saněrować. Za to je so njedawno měšćanska rada wuprajiła. Jednohłósnje hłosowachu tam radźićeljo za próstwu frakcije Klartext, financne srědki z etata přewostajić za zwěsćenje kóštow. Tak sćěhuja radźićeljo poručenja hłowneho a socialneho wuběrka kaž tež wuběrka za twarstwo a hospodarstwo z januara. Měšćanska rada je zarjadnistwu nadawk dała, w lětušim etaće za to 10 000 eurow zaplanować. Zdobom ma wone pruwować, hač móhli wěcywustojneho ze spěchowanskich srědkow zapłaćić. Hižo před lětomaj běše rěč wo tym, móst wobnowić. Wyši měšćanosta Torsten Pötzsch (Klartext) pak bě tehdy podšmórnył, zo budźe móst hakle pozdźišo saněrowany.

Cybercop prašany

Zhorjelc. Kriminalita w interneće, tak mjenowana cybercrime je tema, kotraž zastojnikow policije dźeń a bóle zaběra. Hač do kónca apryla móža so pola njeje zajimcy přizjewić, kotřiž chcyli digitalnje za kriminelnymi slědźić. Trěbny za to je studij na přikład informatiki, hospodarskeje informatiki abo komunikaciskeje techniki.