Policija (29.01.21)
Wopity ze skóncowanej swěcu jěł
Budyšin. Chětro hłuboko do piwoweje škleńcy hladał a na to z kolesom domoj jěł je předwčerawšim 43lětny muž w Budyšinje. By-li jeho zadnja swěca fungowała, njeby to najskerje žadyn problem był. Ale tak staj jeho policistaj na Becherowej zadźeržałoj a hnydom pytnyłoj, zo bě wón tójšto pił. Naměriłoj staj pola njeho wjace hač dwaj promilej. Muž dyrbješe swoje koleso stejo wostajić a ze zastojnikomaj sobu jěć, zo bychu jemu krej wotewzali.
Twarska firma spěchuje hwězdarnju
Budyšin (SN). Wospjet je Budyske twarske předewzaće Hentschke Bau tudyšu šulsku hwězdarnju „Johannes Franz“ podpěrało, tónraz z 50 000 eurami. Dar zmóžnja dalše wobhospodarjenje najstaršeje šulskeje hwězdarnje Němskeje, kotraž je runje we wuchodosakskim regionje mjez šulerjemi a studowacymi jara woblubowana, rěka w nowinskej zdźělence firmy Hentschke Bau. Pjenjezy wužiwaja za personalne wudawki runje tak kaž za wěcne srědki, kotrež wosebje hódny pedagogiski koncept šulskeje hwězdarnje podpěruja.
Darjena suma zawěsća dźěło astronomiskeje institucije hač do kónca lěta 2021. W minjenych lětach je firma Hentschke hižo wjacekróć wjetše sumy Budyskej šulskej hwězdarni dariła. „Chcemy tak k atraktiwnosći regiona, k dźěćacemu a młodźinskemu kubłanju a k sposrědkowanju přirodowědnych dopóznaćow přinošować“, wuswětla jednaćel twarskeho zawoda Jörg Drews. Dar zmóžnja, zo ma hwězdarnja dale kruće přistajeneho sobudźěłaćerja, kiž profesionalne dźěćace a młodźinske dźěło zaruča. Nimo toho financuja z pjenjezami interaktiwnu medijowu sćěnu.
Holocaust lětsa hinak wopominali
Krótkopowěsće (29.01.21)
Incidenca pod hódnotu 200
Budyšin. Prěni raz po oktobrje 2020 leži sydomdnjowska incidenca koronawirus nastupajo w Budyskim wokrjesu pod hódnotu 200. Tudyši krajnoradny zarjad mjenowaše wčera ličbu 177. Zdobom informowaše wo 82 dalšich natyknjenjach a štyrjoch smjertnych padach. Kaž zarjad dale zdźěli, postupi cyłkowna ličba w zwisku z koronu zemrětych na 500.
Wjace bjezdźěłnych sezony dla
Budyšin. We wuchodnej Sakskej je w januarje 19 708 bjezdźěłnych, 1 573 resp. 8,7 procentow wjace hač loni w decembrje. Bjezdźěłnostna kwota wučinja 7,1 procent. Kaž Budyska wotnožka dźěłoweje agentury dźensa informuje, zepěraja so zawody dale na pjenjezy za krótkodźěło, zo bychu zadźěłanych fachowcow dźerželi. Rozrost bjezdźěłnosće ma sezonalne přičiny.
Nawi přichoda wotprajeny
„Lišču jamu“ tež w lěću wočinić
Běłowodźanska měšćanska rada zasadnje rozsudźiła
Běła Woda (AK/SN). Lubowarjo lodoweho sporta budu Běłowodźansku lišču jamu po móžnosći tež w lěću wužiwać móc. K tomu wuzna so tamniša měšćanska rada na swojim wčerawšim posedźenju. Z jednym wzdatym hłosom radźićeljo wobzamknychu, zo ma so lód sčasom přihotować. Přidatne kóšty chcedźa z dochodami wurunać. W kotrym času dokładnje budźe lodowa arena wočinjena, chcedźa na posedźenju parlamenta w měrcu rozsudźić.
„Pandemije dla smy wjele časa za dorost zhubili. To wohroža našu eksistencu“, rjekny přesyda lodosportoweho towarstwa Bernard Stefan. Wšelake treningowe časy chcedźa nětko po móžnosći wot 1. junija 2021 nachwatać. Dypkowe hry jednotliwych lodohokejowych mustwow maja so wot 31. junija zahajić. „Smy so wšitke wólnočasne towarstwa a potencielnych wužiwarjow naprašowali a wjele pozitiwneho wothłosa žnjeli“, rozprawješe wčera nawoda lodoweje areny Milton Tauche.
Policija (28.01.21)
Tójšto rubizny namakali
Běła Woda. 40 akutočakow, wjacore kolesa, tak mjenowany pocketbike, wšelake družiny drogow kaž ecstasy a crystal, wjetšu ličbu brjendow (Sägeblätter) kaž tež nahladnu sumu pjenjez je policija předwčerawšim při kontroli zahrodoweje chěžki a dweju bydlenjow w Běłej Wodźe namakała. Nimo toho zawěsćichu tam zastojnicy wjacore brónje małeho kalibra, pistole, trašawki, nože a dalše nastroje. Při tym je so zasadźenje poměrnje njespektakularnje započało, jako chcychu 34lětneho wodźerja Seata zadźeržeć. Tón drje najprjedy zasta, na to pak pěši do zahrodoweje chěžki twochny. Tam jeho zastojnicy lepichu. W domčku napadnychu jim wjacore kolesa, kotrež běchu po wšěm zdaću pokradnjene. Zahroda słušeše 33lětnemu. Na přikaz statneho rěčnistwa zahrodu kaž tež bydleni wobeju muži přepytachu. Hač su namakane brónje kmane někoho zranić, abo hač jedna so wo imitacije, to budu nětko fachowcy zwěsćić dyrbjeć.
Do lěsa radšo njechodźić
Budyšin. Sněha minjenych dnjow dla knježi w lěsach Budyskeho wokrjesa dźeń a wjetši strach, zo so tam hałzy abo wjerški štomow wotłamaja. Předewšěm w hórkatej a hórskej krajinje tomu tak je. Za přichodne dny wjedrarjo dalše spadki w formje sněha připowědźeja. Tohodla móhła so situacija předewšěm kónc tydźenja dale přiwótřić. Wuchodźowanki po lěsach móhli potom strašne być. Tež bjez wětřika móhło so stać, zo so njejapcy a bjez předznamjenjow hałzy a wjerški wotłamaja. Tohodla Budyski krajnoradny zarjad napomina, do lěsow radšo njechodźić. Nimo toho je wjele lěsnych pućikow w špatnym stawje, dokelž su minjeny čas na mnohich městnach wot skórnika wobškodźene štomy z lěsa wotwozyli a při tym ćežku techniku zasadźili. W nuznym padźe bychu tež wuchowanske awta jeno ćežko městno njezboža docpěli.
Parcours štomikow so pominje
Hdyž so swjedźeń swěčk Marje bliži, je w katolskich Serbach ...
Budyske nalěćo w septembru
Budyscy měšćanscy radźićeljo su wčera prěni króć w sportowni na Budyskim Třělnišću wuradźowali.
Budyšin (CS/SN). Budyska měšćanska rada rozžohnowa wčera wjelelětneho čłona Matthiasa Knaaka (CDU). Wón je w Budyskim krajnoradnym zarjedźe nawodnistwo šulskeho zarjada přewzał a njemóže funkciju měšćanskeho radźićela tuž dale wukonjeć. Jeho městno w radźe přewozmje Bodo Thiemann, kotrehož su wčera spřisahali.
Dokelž běše Knaak zdobom z čłonom dźěłoweho kruha za serbske naležnosće kaž tež hłowneho a financneho wuběrka města Budyšina, dyrbjachu tam tohorunja nowych čłonow powołać. Nastupajo dźěłowy kruh njebě žanych ćežow. Do njeho su měšćanscy radźićeljo jednohłósnje Heinricha Schleppersa powołali. Nastupajo hłowny a financny wuběrk pak běchu napřećiwne hłosy. Naslědnika do wobeju gremijow dyrbja tuž wolić, štož chcedźa přichodny měsac činić.
Krótkopowěsće (28.01.21)
Wuwiće do praweho směra
Budyšin. Natyknjenja z koronawirusom minjenych sydom dnjow na 100 000 wobydlerjow tež w Hornjej Łužicy dale woteběraja. W Budyskim wokrjesu spadny incidenca wčera na 219 (wutoru 239), w Zhorjelskim na 172,52 (do toho 188,35). W Budyskim wokrjesu zwěsćichu 126 dalšich infekcijow a štyri smjertne pady. W Zhorjelskim bě 101 nowonatyknjenje, 17 pacientow je zemrěło.
Serbska app dale woblubowana
Budyšin. Hornjoserbsku aplikaciju „Serbsce lochko“ je sej dotal 3 000 zajimcow, kotřiž chcedźa serbsku rěč słyšeć a ju wšědny dźeń nałožować, na swojim šmóratku instalowało. Něhdźe 900 ludźi po wšej Němskej app, zestajenu lěta 2014 w pedagogiskim wotrjedźe Rěčneho centruma WITAJ, aktiwnje wužiwa, zdźěli lektorat RCW. App je onlineowa wersija CDjow „Serbsce lochko“, kotrejž stej tež w Smolerjec kniharni na předań.
Wotškódnja swójbu zatřěleneho
