Dawaja přehlad wo domjacej zwěrinje a rostlinach
Dźěwin (AK/SN). Z informaciskimi taflemi w formje přirodoweje wučbneje šćežki su loni teren wokoło Dźěwinskeho lěsneho jězora polěpšili a jemu wjetšu kwalitu dali. Na to skedźbnja Slepjanske wudźerske towarstwo w swojim zhladowanju na lěto 2020. Natwarili su tafle wo domjacych reptilijach a amfibijach, wo štomach, wo domjacych spěwatych ptačkach, wo zwěrinje na wodźe a při njej kaž tež wo domjacych brukach a mjetelach. Spěchowany bu projekt ze srědkami załožby Doma w Slepom.
Nawodnica hłowneho zarjada Slepjanskeje gmejny Marion Mudrina je předewzaće skutkownje podpěrała. Wo techniske zwoprawdźenje staraše so Knut Olbrich z Běłowodźanskeje wabjenskeje firmy. Nastajili su tafle čłonojo wudźerskeho towarstwa. „Dźakować chcu so našemu wudźerskemu zwjazkej Połobski Florenc za grafiki rybjacych wobrazow a za wučbnu taflu wo wudźenju. Hdyžkuli mějachmy prašenja, su nam pomhali“, praji předsyda Slepjanskeho towarstwa André Krupper.
Policija (07.01.21)
Sćěna pomórana była
Rakecy. Při bywšim nakupowanišću na Nowowjesnjanskej dróze w Rakecach su njeznaći sćěnu z barbu pomórali. Na pismo podobny wobraz ćehnješe so po dołhosći dwanaće metrow. Wobsadka policajskeho awta je wěcne wobškodźenje předwčerawšim připołdnju wuhladała. Dokelž barba hišće dospołnje sucha njebě, wuchadźeja zastojnicy z toho, zo běchu skućićeljo hakle krótko do toho tam „podźěłali“. Kelko škody woni ze swojim móranjom na prózdnym twarjenju načinichu, njehodźi so dotal wobličić.
Změny w protyce
Budyšin. W poslednje dny stareho lěta připósłanej wotpadkowej protyce Budyskeho wokrjesa su so zmylki zadobyli. Kaž krajnoradny zarjad zdźěli, potrjechi to nimo Biskopic tež gmejny Halštrowska Hola, Bukecy, Rakecy a Wóspork. Tak změnja so na přikład za Halštrowsku Holu terminy wotwožowanja čorneho wotpadkoweho sudobja, w Bukecach žołteho sudobja a w Rakecach módreho sudobja za staru papjeru. Aktualizowanu protyku w potrjechenych komunach žanu njedóstanu. Změny zdźěla přez hamtsku nowinu wokrjesa. Terminy we wotpadkowej app su prawe.
Pytaja wobrazy za kalender
Wojerecy. „Moje najlubše městno we łužiskej jězorinje“ rěka hesło fotoweho wubědźowanja tamnišeho Leaderoweho regiona, kotrež su tele dny zahjili. Wubědźowanje traje hač do awgusta. Zaměr je, zestajeć wobrazowu protyku wo łužiskej jězorinje za přichodne lěto. 13 najrjeńšich wobrazow mytuja. Zajimcy njech sćelu swój foto na adresu .
Rěpu do Čěskeje wozyli
Lěpši datowy škit trěbny
Po kontrowersnej debaće rozdźělne měnjenja w gmejnskej radźe
Trjebin (AK/SN). Přichodnje změje Trjebinska gmejna eksterneho społnomócnjeneho za datowy škit. To je wčera wjetšina jeje radźićelow rozsudźiła. Nadawk přewozmje Lipšćanska prawizniska towaršnosć KSMD, zastupjena přez prawiznika dr. Sebastiana Schmucka. Z nim su pawšalny měsačny honorar 190 eurow dojednali.
Po słowach wjesnjanosty Waldemara Locke (CDU) běchu dotal z datowym škitom salopnje wobchadźeli. Nastork bě jemu posedźenje radźićelow w decembru. Tehdy wón namjetowaše, zo měła gmejna Trjebin z Łužiskeho kruha wustupić, štož parlamentownicy na kóncu wotpokazachu. Do toho běchu woni list rěčnikow kruha dóstali z próstwu, přećiwo tomu hłosować. Locke pak wo tym ničo wědźał njeje. „Sposrědkować daty gmejnskich radźićelow bjez přihłosowanja kóždeho jednotliwca njeje dowolene a woznamjenja zranjenje wosobinskich prawow“, wjesnjanosta wčera argumentowaše. Tohodla wabješe wón za społnomócnjeneho za datowy škit.
Z Trabijom za jolku 2.0 wabili
Nukničanska jolka je kóžde lěto prěni wjeršk zabawnych serbskich swjedźenjow. Lětsa pak je tež wón wot pandemije potrjecheny, a wšitko budźe hinak. Tež njedawne wabjenje bě njezwučene.
Nuknica (mdź/SN). Lětsa su přihoty na jolku tróšku hinaše. Prawidłownje so organizaciski team online schadźuje – a to hižo někotre tydźenje. Zhromadne zetkanja dźě tuchwilu móžne njejsu, digitalny puć přihotow je tuž dobra alternatiwa. „Mamy tójšto dźěła“, praji sobuorganizator Jakub Brězan z Prawoćic. „Na njedawnym zetkanju smy wo tym rěčeli ludźom wuwědomić, zo so jolka-swjedźeń přiwšěm wotměje, jenož na hinaše wašnje. A zo dyrbimy za prěni wulki serbski podawk lěta wabić.“ Tak je mjez druhim ideja nastała, z wabjenskim Trabijom po Łužicy jězdźić, k tomu z připowěšakom, na kotrymž stej wulkej tafli z datumom a napisom „jolka“ čitać byłoj. Samo serbska chorhojčka z nabóčneho wokna hladaše. Na swojej silwesterskej jězbje bě Jakub Brězan 50 kilometrow po Serbach z „jolka-trabijom“ po puću.
W Chrósćicach běchu wěriwi přeprošeni, na wčerawšim ...
Hišće žane indiwidualne šćěpjenja
Wokrjesnej šćěpjenskej srjedźišći w Kamjencu a Lubiju stej přihotowanej, wot póndźele maja tam dźěłać.
Drježdźany/Kamjenc/Lubij (SN/at). Šćěpjenja přećiwo chorosći kowid-19 su so w zamołwitosći Němskeho čerwjeneho křiža (DRK) Sakskeje na kóncu stareho lěta tež w Budyskim a Zhorjelskim wokrjesu zahajili. Kaž nowinski rěčnik sakskeho DRK dr. Kai Kranich wobkrući, stejachu tam dotal starownje a hladarnje w srjedźišću. „Slěd šćěpjenjow je w prawniskim postajenju zwjazkoweho ministerstwa za strowotnistwo rjadowany, kotrež złožuje so na poručenje stajneje šćěpjenskeje komisije Roberta Kochoweho instituta.“ Dr. Kranich na to skedźbni, zo „šćěpja w kóždym padźe wobydlerki a wobydlerjow kaž tež dospołny personal. Wězo jenož, hdy su tomu přizwolili.“
Krótkopowěsće (07.01.21)
Dalše 35 smjertnych padow
Budyšin. Z wčera zwěsćenymi 428 nowymi koronanatyknjenjemi je so incidenca w Budyskim wokrjesu na 440 zwyšiła. Dźesać pacientow w starobje 76 do 88 lět je zemrěło. Aktualnje je 2 508 ludźi inficěrowanych (+326), 138 (+15) z nich w klinice lěkuja. Wokrjes Zhorjelc rozprawješe wčera wo 392 dalšich infekcijach a 25 smjertnych padach w zwisku z koronu. Indicenca tam je 399,64.
CDU zjězd znowa přestorči
Budyšin. Wokrjesny zwjazk CDU Budyšin za sobotu planowany zjězd, na kotrymž chcedźa kandidata za wólby zwjazkoweho sejma nominować, znowa přestorči. To je amtěrowace předsydstwo hromadźe z mandatnymi nošerjemi a předwidźanym kandidatom Rolandom Ermerom wčera rozsudźił, kaž wokrjesny jednaćel CDU Filip Wjerš zdźěli. Přičina je podlěšenje lockdowna.
Seniorojo namołwjeni pisać
Policija (06.01.21)
Kołp na awtodróze
Budyšin. K njewšědnemu zasadźenju wołachu policiju wčera něhdźe w 4 hodź. na awtodróhu A 4 mjez Budyšinom a Wósporkom. Tam bě so mjez srjedźnym wobhrodźenjom kołp zabłudźił. Zo njeby k někajkemu njezbožu dóšło, policisća městno zawěsćichu. Jako so woni wulkemu ptakej bližachu, tón mócnje a agresiwnje na policistow porchaše (fauchen), kaž w jich rozprawje rěka. Z pomocu sobudźěłaćerjow awtodróhoweje mištrownje zwěrjo skónčnje z pomocu saka popadnychu a je daloko dosć preč wo awtodróhi donjesechu. Wottam kołp njezranjeny wotleća.
Z praskotakom škodu načinili
Běła Woda. Po wšěm zdaću ze silwesterskim praskotakom su njeznaći w Běłej Wodźe w nocy na póndźelu škleńčanu fasadu twarjenja wobškodźili. Po prěnim trochowanju wučinja škoda něhdźe 400 eurow. Policija pad nětko přepytuje.
Ilegalnych zadźerželi
