Za plahowanje howjadow wužiwa ratar Alojs Šěrak z Łusča modernu ...
Wuchadźejo z toho, zo infekcije z koronawirusom na wysokim niwowje ...
Krótkopowěsće (19.11.21)
Natyknjenja njepopušćeja
Budyšin. Docpěteho schodźenka přećeženja w sakskich chorownjach dla płaći wot dźensnišeho w mnohich wobłukach rjadowanje 2G. Incidenca po RKI wučinja w Budyskim wokrjesu 804. Tam su wčera za minjenej dnjej wo 1 923 natyknjenjach z koronawirusom informowali. We wokrjesu Zhorjelc běchu w samsnym času 442 infekcijow a dwaj smjertnej padaj. Incidenca po RKI je tam dźensa 334,9.
Dobyćerjej wurisanja Kocor 2.0
Budyšin. W kompozitoriskim wurisanju Kocor 2.0 Towaršnosće za spěchowanje Serbskeho ludoweho ansambla je jury dobyćerjow pomjenowała. Prěnje myto spožča Kulowčanej Lukasej Čórlichej za twórbu „Njesmjertnosć“ za orchester a sopran-solo, třeće myto Dennyjej Hozmanej z čěskich Liběšic za twórbu „Nadźija, lubosć, wěra“, spisanu za solo-spěw z klawěrnym přewodom. Druhe myto jury njespožča.
Wo čěskich Němcach
Prominentnych přeprosyć budźe přichodnje ćešo
Wojerecy (SiR/SN). Wot lěta 1998 je Ralf Gerstmann tójšto prominentnych hosći do Wojerec přiwabił a z nimi tu najwšelakoriše zarjadowanja organizował. Zahajił je wón swoje kulturne aktiwity w měsće ze staroměšćanskimi turami, pozdźišo su znaći wuměłcy z časa NDR w hosćencu „Hackerstübel“ wustupili.
Tam na přikład bě raz Dorit Gäbler z hosćom. Dale móžachu we Wojerecach hižo Herberta Köfera, Edgara Külowa, Reginu Thoss, skupinu MTS, Hansa Georga Stengela, Lutza Jahodu a mnohich dalšich witać. Wěsty čas je Ralf Gerstmann tajke formy małeho wuměłstwa tež w Spalowskim „Starym konsumje“ zarjadował. Wot lěta 2017 je wón gastronomiski nawoda Wojerowskeho zwěrjencoweho hosćenca „Sambesi“, hdźež tohorunja najwšelakoriše wječory organizuje. Njezapomnity wostanje jemu wopyt prěnjeho Němca w swětnišću Sigmunda Jähna. Wulkeho zajima dla dyrbjachu tehdy na žurlu w hrodźe přećahnyć. Na kóncu přepoda Gerstmann swojemu hosćej wobraz molerja Kurta Klinkerta, kotryž bě tón ekstra za Jähna molował.
Na kachlowej ławce čitali
Přehladka dale přistupna
Kamjenc. Wustajeńca wo česćowanju swj. Bosćana w Chróšćanskej wosadźe wostanje hišće hač do njedźele, 30. januara 2022, w Kamjenskim sakralnym muzeju Hanineje cyrkwje přistupna. Boži dom je wot póndźele do pjatka stajnje wot 10 do 18 hodź. kaž tež sobotu a njedźelu wot 11 do 16 hodź. wotewrjeny.
Klětu swoju nawjes ponowja
Němcy. Z přizwolenjom spěchowanja we wobjimje 75 procentow cyłkowneje inwesticiskeje sumy 480 000 eurow móža w Němcach swoju nawjes znowa wuhotować. Kaž Wojerowske měšćanske zarjadnistwo zdźěli, ma teren wokoło twarjenja wjesneho zarjadnistwa, wohnjoweje wobory a młodźinskeho kluba nowy napohlad dóstać. Zaměr je, zo nastanu městnosće, kotrež móža ludźo wšelakich starobnych skupin wužiwać, mjez druhim za wjesne swjedźenje, ale tež młodostni za grilowanske wječory a wohnjowi wobornicy. Nowinska rěčnica Corinna Stumpf informuje, zo chcedźa projekt klětu zwoprawdźić.
Policija (18.11.21)
Błyskač skóncowali
Smělna-Póckowy. Z wulkej namocu su njeznaći na Drježdźanskej dróze w Smělnej-Póckowach (Schmölln-Putzkau) stacionarny błyskač skóncowali. W nocy na minjenu póndźelu rozbichu woni škitnu škleńcu optiki a tyknychu praskotak do nastroja. Wěcna škoda wučinja sumu w šěsćcyfrowym rozměrje.
Adwentne wiki dale njewěste
Runje dźens tydźenja su w Budyšinje zjawnosć wo lětušich adwentnych wikach informowali. Mjeztym je so situacija změniła. Hač so wiki scyła wotměja, je wšo druhe hač wěste.
Budyšin (SN/MWj). Poprawom chcychu 638. Budyske Wjacławske wiki wot 26. nowembra hač do 22. decembra wotměć. Za nje měješe město hygienowy koncept, kotryž je strowotniski zarjad wokrjesa wobkrućił. Mjeztym pak słyšiš ze sakskeho knježerstwa signale, hodowne wiki w swobodnym staće lětsa dospołnje wotprajić. Zo móhli móžne rozsudy z Drježdźan wočaknyć, je so Budyske měšćanske zarjadnistwo rozsudźiło, započatk Wjacławskich wikow wo tydźeń wot 26. nowembra na 3. december přestorčić. Hač do toho nadźija so zawjazowacych wuprajenjow, hač hodźa so wiki přewjesć abo nic, pisa město w nowinskej zdźělence. „Pod tuchwilnymi wuměnjenjemi a hladajo na wuprajenja ministerskeho prezidenta njeje přicpěwajomne, wiki natwarjeć započeć“, rěka w zdźělence, a dale: „Město sej žada, jasne rjadowanja wo přewjedźenju adwentnych wikow wozjewić. Rozsud njemóžemy a njesměmy komunam přewostajić.“
Wuznaće k jubilejej města
Wjele idejow za róčnicu zběrali, dźěło pak so nětko hakle započina
Kamjenc (UM/SN). K 800. róčnicy wobstaća Kamjenca w lěće 2025 su wobydlerjo za to wutworjenej dźěłowej skupinje 114 idejow zapodali. „Wothłós je přemóžacy“, praji wyši měšćanosta Roland Dantz (njestronjan). „Wón wotbłyšćuje, zo su ludźo z městom wusko zwjazani a zo chcedźa jubilej hódnje woswjećić.“ Z dźěłoweje skupiny, kotraž je ideje zběrała a kategorizowała, wutworja tuž swjedźenski komitej. To chce Dantz spočatk přichodneho lěta měšćanskej radźe namjetować. Prěni nadawk komiteja budźe, z tymi rěčeć, kotřiž su namjety zapodali. Přetož njeńdźe wo to, někajke přeća zwuraznić, ale so sam sobu gratu přimać. Pozdźišo dyrbja tež wo tym rěčeć, kak projekty financuja a w kotrym wobjimje jubilej woswjeća, hač cyłe lěto abo w jednotliwych wotrězkach.
Krótkopowěsće (18.11.21)
Wojacy z Bayerskeje pomhaja
Budyšin. Z hódnotu 966 je incidenca po Roberta Kochowym instituće dźensa w Budyskim wokrjesu druhi dźeń za sobu pod tysac. Za wokrjes Zhorjelc poda RKI dźensa 561,9. Mjeztym pomhaja wojacy Zwjazkoweje wobory w Budyskim krajnoradnym zarjedźe kontakty z koronawirusom natyknjenych zwěsćić. Předwčerawšim informowachu tu wo 627 natyknjenjach a wo jednym smjertnym padźe, w Zhorjelskim wokrjesu bě 355 infekcijow.
Namjet za dwurěčne tafle
Budyšin. Domowina wita informaciju zwjazkoweho zarjada za kartografiju, zo chce stajny wuběrk za geografiske pomjenowanja zwjazkowemu ministerstwu za wobchad namjetować, tafle na awtodróhach w sydlenskim rumje Serbow přichodnje dwurěčnje, němsce a serbsce, pomjenować. Namjet chce zarjad podać, ručež budźe nowe zwjazkowe knježerstwo wutworjene.
Druha dźěćaca kniha Źilki
