Łaz (AK/SN). Za přichodne wužiwanje terena­ bywšeje Běłochołmčanskeje za­kładneje šule chce Łazowska gmejna klětu­ twarski plan nastajić a w samsnym lěće wotzamknyć. To je twarski nawoda gmejny Wolfgang Tietze gmejnskim ­radźićelam na jich zašłym posedźenju rozłožił.

Daniel Scholze z Wojerec chce w Běłym Chołmcu inwestować. Nastać ma sportowy hotel za młode swójby, za pućo­wanske a dowolowe skupiny, za lubowarjow přirody kaž tež za přećelow sporta a wody. Hłowny dom bywšeje šule­ chce inwestor energetisce saně­ro­wać a při tym ekologiske twaršćizny za nowu fasadu wužiwać. Z wobstejaceho třipo­schodoweho twarjenja ma hotel ze 60 łožemi nastać. Wuchodnje hłowneho twarjenja je dwuposchodowy nowo­twar předwidźany. W nim budu wellnessowy a fitnesowy wobłuk kaž tež bistro a kofejownja zaměstnjene. Tež najwšelakoriše zarjadowanja a seminary maja tam móžne być. Za pře­nocowanja chce inwestor tohorunja dowolowe domčki natwarić. W sewjernym dźělu cyłkowneje připrawy je parkowanišćo planowane.

Wot januara změja šulerjo we Worklecach hinaše zastanišćo

Worklecy (JK/SN). Bus dawa wuknjacych Worklečanskeje zakładneje a wyšeje šule tuchwilu na zastanišću při gmejnskim zarjedźe wu- a zalězć. Dokelž pak su so tam w minjenym času kritiki a wobmyslenja zadźerženja šulerjow dla kopili, je so­ busowe předewzaće Regiobus rozsudźiło zastanišćo přepołožić. Wot 1. januara budźe wone wosrjedź wsy blisko Šlapec pjekarnje. Na minjenym posedźenju gmejnskeje rady zdźěli to wjesnjanosta Franc Brusk (CDU) radźićelam. Zdobom pak skedźbni na móžne sćěhi tajkeho noweho rjadowanja. Brusk naspomni dlěši puć šulerjow hač k šuli a wot šule zaso na zastanišćo. Tu liči z kritiku a interwenciju ze stron staršich. Dlěši puć je dźě­ tež z wjetšim strachom zwjazany. A hač budu so šulerjo při nowym za­stanišću disciplinowanišo zadźeržeć, tež wěste njeje.

Runja mnohim druhim zjawnym zarjad­nišćam tež na Rownjanskim Njepilic­ statoku lětsa wjele zarjado­wanjow přewjesć njemóžachu. Nětko nadźijeja so na lěpše časy klětu.

Rowno (JoS/SN). Prěni sněh tohole lěta je njedawno tež Njepilic statok w Rownom z tróšku běłej pychu pokrył a zaćišć zawostajił, zo je tam wšo w adwentnej ćiši­nje. Cyle tak měrne pak tam scyła njeje. W kuchni wuprudźachu stare kachle přijomnu ćopłotu. Kulturna managerka Njepilic statoka Petra Schubertowa pa­kowaše tam hodowne pakćiki za čłonow spěchowanskeho towarstwa. Dokelž žanu adwentničku přewjesć njemóža, maja woni nětko swój hodowny postrow z póštu dóstać.