Tójšto namjetow zapodali
Fontena w gondlowym haće najčasćišo mjenowana
Wojerecy (AK/SN). Wobydlerski etat 2022 za město Wojerecy a jeho dźěle Brětnja-Michałki, Němcy, Hórnikecy, Čorny Chołmc a Ćisk poněčim konkretne formy nabywa. Kaž nowinska rěčnica Corinna Stumpf informuje, skónči so 14. nowembra pjeć tydźenjow trajaca doba, zo móžachu wobydlerjo namjety zapodać. „Dóšło je 137 idejow wot 116 wosobow. 72 procentow wšitkich zapodawarjow měješe jedyn namjet, 19 procentow dwaj a něhdźe dźewjeć procentow samo tři.
Město wikow swjedźeń swětła
Runje tak kaž loni su tež lětsa nimale wšudźe adwentne wiki wotprajene. W Grodku pak su sej zajimawu alternatiwu wumyslili, a ta žněješe minjeny kónc tydźenja přewšo dobry wothłós.
Grodk (Jos/SN). W Grodkowskim nutřkownym měsće bě minjeny kónc tydźenja wjele ludźi na nohach, kotřiž njejsu hišće nadźiju spušćili, zo tež zaso lěpše časy hač tuchwilu dožiwja. Derje, zo bě jich poměrnje wjele. Měšćanski wabjenski kruh a měšćanske zarjadnistwo běštej na prěni swjedźeń swětła z wočinjenymi wobchodami přeprosyłoj. Tón poskitk mnozy wobydlerjo rady přiwzachu a na te wašnje pokazachu, zo maš w tychle časach nimo hodownych wikow tež hišće lěpšich rozrisanjow.
W rěčnišću Sprjewje blisko Budyskeje Sprjewineje hasy maja ...
Wulka hala zawoda so paliła
Krótkopowěsće (30.11.21)
Dźewjeć schorjenych zemrěło
Budyšin. Incidenca 1 791,2 po Roberta Kochowym instituće dźensa w Budyskim wokrjesu je třeća najwyša po cyłym Zwjazku. Krajnoradny zarjad informowaše tam wčera wo 1 667 natyknjenjach z koronawirusom a dźewjeć smjertnych padach. Gmejna Ralbicy-Róžant steji z 94 potrjechenymi na tysac wobydlerjow na čole. We wokrjesu Zhorjelc bě wčera 37 infekcijow, incidenca po RKI je 1 284,3.
Kwota zaso pod šěsć
Budyšin. We wuchodnej Sakskej bě w nowembrje 16 213 bjezdźěłnych, 314 mjenje hač w oktobrje. Z tym leži kwota bjezdźěłnosće pola 5,9 procentow a je dźakowano nazymskemu wožiwjenju prěni raz po lěće 2019 pod šěsć procentow padnyła, to Budyska wotnožka zwjazkoweje agentury za dźěło dźensa zdźěli. Kaž dale rěka, pak ludźo ze zbrašenjemi ćešo zaso přistajenje namakaja.
W zastojnstwje wobkrućenaj
Policija (29.11.21)
Z woknom třělał
Budyšin. Starosćiwa wobydlerka so minjeny pjatk wječor pola policije přizjewi a zdźěli, zo je na Budyskej Hasy Liselotty Herrmann něchtó z wočinjenym woknom wjacore razy třělał. Hnydom zasadźeni zastojnicy najprjedy wokolinu bydlenskeho domu zawěsćichu. Na to su so z pomocu kolegow hotowostneje słužby z woknom do bydlenja dóstali a podhladneho skućićela dosahnyli. Prěni drogowy test reagowaše pola 37lětneho pozitiwnje na amfetaminy. Na blidźe wuhladachu policisća trašawku a něhdźe 90 patronow. Při přepytanju bydlenja zwěsćichu wjacore nože a wšelake drogi. Kriminalna policija so z tymle padom nětko nadrobnišo zaběra.
Zhromadnje adwent zahajili
Škotowy turněr njebudźe
Budyšin. Za jutřišu wutoru w Budyšinje , planowany škotowy turněr serbskich seniorow znatych přičin dla wupadnje. Kaž hłowny organizator Měrćin Nowak zdźěli, chcedźa jón 14. abo 21. decembra nachwatać, jeli to koronowe połoženje potom dowoli. W tym padźe zajimcow sčasom informuja.
Adwentnička wupadnje
Pančicy-Kukow. Předsydstwo Domowinskeje skupiny Pančicy-Kukow skedźbnja na to, zo skupinska adwentnička, kotraž bě hewak stajnje srjedu po prěnim adwenće, lětsa koronoweje pandemije dla njebudźe. Ručež budu zarjadowanja zaso móžne, dóstanu skupinarjo přeprošenje.
Přinoški kóžde lěto pruwować
Gmejnska rada so z přinoškami za žłobik a pěstowarnju zaběrała
Njebjelčicy (JK/SN). Pod krutymi postajenjemi 1G a wotpowědnje płaćiwym postajenjam hygieny wotmě so minjeny štwórtk wječor posedźenje Njebjelčanskeje gmejnskeje rady. Hłowna tema wuradźowanja běchu tamniša pěstowarnja, jeje poskitk zastaranja a staršiske přinoški. Wobjim popłatka staršich postajeja mjez druhim wobhospodarjenske kóšty pěstowarnje a płaćiwe postajenja Swobodneho stata Sakskeje za dźěćace dnjowe přebywanišća.
Nowe rěčnišćo nimale dotwarjene
Bórkhamor (JoS/SN). Po wšěm zdaću w druhim kwartalu 2022 budźe wutwar Małeje Sprjewje mjez Bórkhamorom a Sprjejcami wotzamknjeny. To zdźěli Thorsten Mummert z twarskeje firmy za wobswětowu techniku HAGN. Wokomiknje je Mała Sprjewja na 5,4 kilometry dołhim wotrězku tak derje kaž hotowa. Zaměr jeje wutwara wot Bórkhamora hač k wuliwej do wulkeje Sprjewje bě, zo móhło wjace wody po rěčnišću ćeć, docpěć něhdźe sydom kubiknych metrow na sekundu. Při tym su zerzawe błóto wotstronili a po kilometer dołhim wotrězku małe kupy, rohodźowe płoniny a rozdźělne skłoniny zapołožili. Tuchwilu so tam na zbywace dźěła koncentruja.
Posledni dźěl wutwarneho wotrězka wopřijima něhdźe 30 metrow před mostom statneje dróhi S 130 w Bórkhamoru. Tón dźěl chcedźa klětu w prěnim kwartalu dotwarić a so při tym tež přirodoškitnym nadawkam wěnować. Mjez druhim wutworja hnězdźenske móžnosće za rybačka (Eisvogel). W druhich wotrězkach dyrbja hišće stare medijowe roły wotstronić, zo móhli tež tam twarske dźěła dokónčić.
