Domizniska stwa w nowej pyše
Z wobydlerskim etatom dalši projekt zwoprawdźili
Brětnja (SN/MWj). Nowowuhotowanu domiznisku stwu w Brětnjanskim wobydlerskim domje su spočatk tohole tydźenja zjawnosći přepodali. Tamniša wustajeńca bě hižo trochu zestarjena, a wustajenske rumnosće trjebachu nowy napohlad, rěka w nowinskim wozjewjenju Wojerowskeho měšćanskeho zarjadnistwa. „Bě to naročny projekt, kotryž móžachu z pomocu lětušeho wobydlerskeho etata nastorčić a dźakowano mnohim čestnohamtskim pomocnikam zwoprawdźić“, zdźěli nowinska rěčnica města Wojerec Corinna Stumpf.
Nowowuhotowanje domizniskeje stwy nastorčili běchu na posedźenju Brětnjanskeje wjesneje rady lětsa spočatk meje. Předewšěm nowy wustajenski koncept dyrbjachu zdźěłać. Spočatnje je to Wojerowski měšćanski muzej podpěrał. Spěšnje pak so wukopa, zo předwidźane 4 000 eurow njedosaha projekt zwoprawdźić. Tak Wojerowscy měšćanscy radźićeljo loni nazymu rozsudźichu, zo hodźa so zalutowane srědki wobydlerskeho etata 2019 we wobjimje 2 000 eurow tohorunja za Brětnjansku domiznisku stwu zasadźić.
Na jubilejny koncert
Šunow. Serbski muski chór Delany přeproša njedźelu, 14. nowembra, w 16 hodź. na koncert składnostnje 50. róčnicy wobstaća cyłka do Šunowskeje Fabrikskeje hospody. Wot 15 hodź. poskića korčmar Tomaš Wowčerk kofej a tykanc. Zastupne lisćiki dóstanu zajimcy w předpředani za šěsć eurow pola Daniela Wjesele w Ralbicach. Při koncertnej kasy płaća wone dźewjeć eurow, za dźěći jedyn euro. Za koncert płaći aktualne koronowe postajenje 2G. Tak maja jeničce šćěpjeni a wustrowjeni přistup. Organizatorojo nadźijeja so bohateho wobdźělenja.
Dźěćacy casting
Policija (12.11.21)
15lětny so ćežko zranił
Budyšin. Při wobchadnym njezbožu předwčerawšim w Budyskej Strowotnej studni je so 15lětny hólc ćežko zranił. 85lětna wodźerka VW Golfa bě na Wobkruhu Strowotna studnja po puću. Krótko za wotbóčku na Wilhelma Ostwaldowu dóńdźe k zražce z młodostnym, kiž runje pěši dróhu přeprěči. Jeho dowjezechu ćežko zranjeneho do chorownje. Na wosobowym awće nasta něhdźe 500 eurow wěcneje škody.
Adwentne wiki chcedźa přewjesć
Budyšin (CS/SN). Po tuchwilnym stawje maja so Budyske Wjacławske wiki wot 26. nowembra hač do 22. decembra přewjesć. Tole praješe wyši měšćanosta Alexander Ahrens (SPD) wčera na nowinarskej rozmołwje. Njewěstosće pak wostawaja, dokelž móhli so zakonske postajenja hač do toho změnić.
Wiki drje budu w blišej wokolinje jeničke. Ćim wažniše je, zo so wone tež wotměja. Wšako ma město wothłosowany hygienowy koncept. Tak dźěla je do přebywanskeho wobłuka na Žitnych wikach a Hłownym torhošću, hdźež poskićeja jědźe a napoje, kaž tež do dundanskeho areala na Bohatej hasy, hdźež budu wšitke dalše předawanišća. „Apelujemy na zamołwitosć wopytowarjow, zo bychu wotstawki dodźerželi“, Ahrens wuzběhny. Dyrbjało-li pak krajne knježerstwo wuměnjenja přiwótřić a prawidło 3G, 2G abo samo 1G zawjesć, bychu hodowne wiki wotprajić dyrbjeli. Wotstawkow dla je mjeztym hižo lodowa čara na Butrowych wikach wotprajena. Měšćanske zarjadnistwo wočakuje lětsa mjenje wopytowarjow z Čěskeje a Pólskeje. Tam su tež mjenje wabili.
Podpěruja šulskich nowačkow
Serbski muzej „na njewěsty čas“ njepřistupny
Budyšin (SN/bn). Serbski muzej w Budyšinje je jenož hišće hač do njedźele přistupny. Póndźelu wustajenišćo nachwilnje zawru, kaž za zjawnostne dźěło domu zamołwita Mónika Ošikowa zdźěli, prajo: „Wustajeńcy Serbskeho muzeja su jenož hišće tónle kónc tydźenja přistupne. Wužiwajće tuž składnosć, sej wosebitu přehladku ‚5 x Němska po wšěm swěće – W špihelu migracije‘ wobhladać. Wot póndźele, 15. nowembra, wostanje Budyski Serbski muzej na njewěsty čas zawrjeny.“ Přičina toho je, zo su „wšitcy sobudźěłaćerjo muzeja do strowotniskeho zarjada wokrjesa Budyšin powołani“, hdźež maja w zwisku z koronapandemiju personal zesylnić.
Tež w Zhorjelskim wokrjesu je dohromady 150 sobudźěłaćerjow zjawnych institucijow k tomu zawjazanych, tamniši strowotniski zarjad podpěrać a so wo slědowanje kontaktow starać. Nimo toho su znowa Zwjazkowu woboru wo wotpowědnu pomoc prosyli. Incidenca we woběmaj wokrjesomaj (hlej krótkopowěsće) je na rekordnym niwowje.
Krótkopowěsće (12.11.21)
Žanežkuli wotpjeće
Budyšin/Zhorjelc. W Budyskim wokrjesu je so dalšich 627 ludźi z koronawirusom natyknyło. Dwaj schorjenej staj zemrěłoj. Incidenca po Roberta Kochowym instituće je tu 823,5. W Zhorjelskim wokrjesu zwěsćichu 466 nowych infekcijow a dwaj smjertnej padaj. Incidenca tam wučinja 622,2.
Jewišćowy bal wotprajeny
Budyšin. Němsko-Serbske ludowe dźiwadło přesunje „na nuznu próstwu Budyskeho krajnoradneho zarjada“ jutře a zajutřišim planowany jewišćowy bal. Přihotowany swjedźenski program „Sherlock Holmes und der Theatergeist“, wuhotowany wot cyłeho hrajerskeho ansambla domu a wot baleta Serbskeho ludoweho ansambla, přiwšěm pokazaja, a to wobaj dnjej w 19.30 hodź.
Čěska pyta „narodneho ptaka“
Praha. Nimo chutnych dypkow namakaš w programatiskim wozjewjenju noweje čěskeje knježerstwoweje koalicije tež jedyn trochu směšny. Po nim měł sej kraj (po přikładźe ameriskeho worjoła, galiskeho honača abo jendźelskeho ročka) tež swójski ptači symbol wuzwolić. Wuběrk maja ornitologojo přihotować, wo wuslědku pak měli wuknjacy zakładnych šulow rozsudźić.
Z pisanych kneflow nastawaja wuměłske twórby
Budyšin (CS/SN). „Wuměłstwo z kneflemi“ rěka nowa wustajeńca, kotraž budźe wot jutřišeho hač do meje 2022 w Budyskej měšćanskej bibliotece widźeć. Michael Voigt z Nowosólca-Hródka (Neusalza-Spremberg) pokaza tam na jednym boku swoju zběrku kneflow, ale tež wuměłske twórby, kotrež su jeničce z kneflow zhotowjene. Wuslědki su jónkrótne, kaž móža so wopytowarjo přeswědčić.
Swojeje zahoritosće za historiske knefle dla je Voigt na čaporowych wikach nimo jednotliwych eksemplarow tež wjetše mnóstwa kneflow našoł. Z toho zrodźi před dźesać lětami ideju, z nimi wuměłske twórby zhotowić. Ze swojimi wobrazami a dalšimi dźěłami je wón mjeztym wjacore zajimawe wustajeńcy wuhotował, mjez druhim w Njeswačanskim baroknym hrodźe. Žana přehladka pak so druhej njeruna, dokelž stajnje nowe twórby nastawaja. Tak su tež te w Budyšinje wustajene cyle nowe. Zběrka w měšćanskej bibliotece rozpřestrěwa so po třoch rumnosćach a wopřijima portrety runje tak kaž krajiny a křesćanske motiwy.
Přesydlerjo móža sobu rěčeć
Prěni wobydlerjo Miłoraza hišće lětsa do Slepjanskeje gmejny přećahnu. Tohodla su čłonojo tamnišeje gmejnskeje rady nětko jeje hłowne wustawki změnili a wobzamknyli.
Slepo (CK/SN). Trjebinski wjesny dźěl Miłoraz (Mühlrose) bywa dźeń a mjeńši. Wottorhanje wopušćenych domow postupuje. To wobkrući wjesny předstejićer Detlef Rölke. Na přesydlenskej městnosći na sewjernej kromje Slepoho porno tomu nowe jednoswójbne domy kaž hriby ze zemje šuskaja. Kaž nawodnica hłowneho zarjada Marion Mudra na zašłym posedźenju Slepjanskeje gmejnskeje rady rozłoži, drje hišće 2021 prěnje přećahowanske nakładne awta přijědu, a přesydlerjo z nětčišeho Miłoraza so potom za nowy Miłoraz přizjewja. Za to je trjeba hłowne wustawki Slepjanskeje gmejny změnić, zo by so w nich nimo Slepoho, Rownoho a Mułkec tež wjesny dźěl Miłoraz jewił.
Policija (11.11.21)
Awto, mjaso a pjenjezy fuk
Wojerecy. Předawanske awto za mjaso a kołbasu su njeznaći w nocy na wutoru z terena firmy we Wojerecach pokradnyli. Škoda wučinja po informacijach policije dohromady něhdźe 100 000 eurow. Pokradnjeny Fiat Ducato bě dwě lěće stary, z chłódźenskej techniku wuhotowany a zdźěla z rězniskimi tworami pjelnjeny. Z jězdźidłom zhubi so tohorunja něšto stow eurow. Policija nětko mjezynarodnje za awtom pyta.
