Njepřicpějomne poćeženja

wutora, 03. měrca 2020 spisane wot:

Protesty we wokrjesnym sejmiku přećiwo planowanej nowej hródźi

Zhorjelc (AK/SN). Plany, w Rosenbachu pola Lubija nowu hródź za ně­hdźe tysac dejkow natwarić, zbudźeja wulke protesty. To wujewi posedźenje Zhorjelskeho wokrjesneho sejmika minjenu srjedu. „Hranica poćeženja ratarskich připrawow dla je dawno docpěta“, podšmórny zastupnica wobydlerskeje iniciatiwy Žiwjenjahódny Rosenbach Ramona Schliebitz. „W samsnym wobłuku plahuja hižo 10 000 swini kaž tež 510 kruwow a jałojcow. Přidatnje maja tam dwě biopłunowej připrawje, jednu tepjernju, silažowu připrawu, měšawu za picu a sušernju za žito. Tuchwilu nastawatej přidatnje hišće dwě jamje za něhdźe 13 500 kubiknych metrow hnójnicy. Naša žiwjenska kwalita je hižo masiwnje wobtřihana, a chceće to hišće dale přiwótřić.“

Krótkopowěsće (03.03.20)

wutora, 03. měrca 2020 spisane wot:

Z nowym předsydstwom

Ralbicy. Cornelia Hempelowa je nowa předsydka Ralbičanskeho cyrkwinskeho chóra Lilija. Wčera su ju na Radlubinje jednohłósnje do za­stojnstwa wuzwolili. Konječanka naslěduje Hrańčana Józefa Jurka, kiž je towarstwo dlěje hač 20 lět nawjedował. Dalši čłonojo předsydstwa su Chrystina Pašcyna, Bettina Lipičowa, Diana Mati­kowa, Bernadet Šołćina, Michał Matješk a Frank Hejduška.

Wuspěšnu bilancu předstajił

Picnjo. Čłonojo towarstwa Serbski kulturny turizm (SKT) su so wčera w Picnju schadźowali. Předsyda SKT Pětr Brězan předstaji lońšu wuspěšnu bilancu. Tak je ličba čłonow w běhu lěta wot 15 na 33 rozrostła. Dale skedźbni wón na stronu SKT w socialnej syći Facebook, hdźež tohorunja dobry wothłós wužiwarjow žněja.

Netflix-seriji wuznamjenjenej

Policija (02.03.20)

póndźela, 02. měrca 2020 spisane wot:

Nadźija na zymski sport

Běła Woda. Byrnjež na zymske wjedro najprjedy raz žane wuhlady njebyli, su so njeznaći w Běłej Wodźe ze zymskim wuhotowanjom zastarali. Z jedneje garaže pokradnychu woni mjenujcy poraj sněhakowarskich čriji, tři pory sněhakow a wotpowědne kije. Cyłkownu hódnotu trochuje wobsedźer po informacijach policije na něhdźe 1 500 eurow.

Emuwa tež w Pěskecach widźeli

póndźela, 02. měrca 2020 spisane wot:
Něhdźe 1,60 metrow wulkeho emuwa su wčera připołdnju při awtodróze A 4 pola Porchowa popadnyć spytali. Dokelž pak móže eksotiski ptak hač do 120 km/h spěšnje běhać, njemějachu wobornicy žanu šansu. Zwotkel ptak je, nichtó njewě. Sobotu běchu jeho blisko Pěskec wuhladali, pozdźišo tež pola Halštrowa. Emu ma wótry pysk a panochty a móže čłowjeka zranić, hdyž so wohroženy čuje. Tohodla je lěpje policiju zazwonić, hdyž jeho něchtó wuhlada. Foto: Rocci Klein

Ruski swjedźeń tež we Łužicy

póndźela, 02. měrca 2020 spisane wot:
Tak kaž w Ruskej kónc februara/spočatk měrca swoje wosebite póstnicy maslenica swjeća, činja to mjeztym hižo pjeć lět tež w Běłej Wodźe. Tam je towarstwo „My smy my“ iniciatiwu přewzało. Sobotu předstajichu w swojich rumnosćach při měšćanskim bulwarje pisany program ruskeje folklory, kotryž su sej tež mnozy zajimcy z města wobhladali. Do toho běchu sej akterojo kostimy zešili, zo móhli prawje lóštnje hejsować. Blinije, kaž ruske plincy mjenuja, wězo njepobrachowachu. Něhdy běchu­ w Ruskej maslenicu cyły tydźeń swjećili a z njej zymu wućěrili. Dźensa je ruski­ karnewal tež w maćernym kraju zaso popularny. Foto: Joachim Rjela

Hotowarniče so zetkaja

póndźela, 02. měrca 2020 spisane wot:

Chrósćicy. Župa „Michał Hórnik“ přeproša na zetkanje hotowarničow serbskeje katolskeje narodneje drasty, kotrež budźe štwórtk, 5. měrca, w 19 hodź w nowym Chróšćanskim gmejnskim a kulturnym centrumje na Hórnikowej 34. Zawodny přednošk pod hesłom „Kaž we swěće moda je“ poda Andrea Pawlikowa z Budyskeho Serbskeho muzeja. Přizamknje so diskusija.

Stajne blido Zelenych

Kamjenc. Přichodne stajne blido Zelenych wotměje so jutře, wutoru, wot 19 hodź. w Kamjenskim hosćencu „La Piazza“ na Zwingerowej. Z hosćom budźe zapósłanc krajneho sejma Valentin Lippmann, zastupowacy předsyda frakcije Zwjazka 90/Zelenych. Z nim chcedźa so předewsěm wo tym rozmołwjeć, kak hodźało so w Swobodnym staće Sakskej wěstotne połoženje polěpšić.

Regionalne wolije sej zbližić

Wojerecy. Rěpik, len a dalše rostlinske wolije steja w srjedźišću přichodneho zarjadowanja „Klewernje a kreatiwnje warić“ srjedu, 4. měrca, w 19 hodź. na Wojerowskej dźěćacej a młodźinskej farmje. Zežiwjenska wědomostnica Elžbjeta Hojerjowa­ tam rozłoži, kak wolije skutkuja a kak hodźa so w kuchni wužiwać.

Wola noweho wyšeho měšćanostu

póndźela, 02. měrca 2020 spisane wot:

Wojerecy (AK/SN). 6. septembra 2020 wola wobydlerjo města Wojerec noweho wyšeho měšćanostu. Dyrbjał-li druhi wólbny přechod z rozsudnymi wólbami trěbny być, wotměje so tón 20. septembra. Na to su so tamniši měšćanscy radźićeljo na swojim zašłym posedźenju dojednali a su terminowy plan za přihoty wólbow kaž tež za wu­tworjenje wólbnych wobwodow a wólby čłonow wólbneho wuběrka schwalili.

Wyši měšćanosta Stefan Skora (CDU) w septembru hižo njenastupi. Po dwěmaj wólbnymaj dobomaj wot lěta 2006 ma so jeho hamtski čas 31. oktobra 2020 skónčić. To wšak bě wón hižo loni w nowembru zdźělił. „Wojerecy trjebaja młodeho čłowjeka, kiž rozsudźa. Wo tym sym přeswědčeny“, praji Skora, kiž swjeći 25. apryla šěsćdźesaćiny. Jeho naslědnik ma so bjez časoweho ćišća wužadanjam strukturneje změny a digitalizacije wěnować.

Pjenjezy za „Krónu“ schwalene

póndźela, 02. měrca 2020 spisane wot:

Budyšin (CS/SN). Prjedy hač je Budyska měšćanska rada na swojim zašłym posedźenju etat 2020 we wobjimje 86 milionow eurow wobzamknyła, diskutowachu radźićeljo wo třoch změnach. Za nje wuprajichu so frakcije Wobydlerskeho zwjazka, FDP, CDU a AFD. Dohromady jedna so wo 110 000 eurow. Z toho ma so 50 000 eurow spěchowanskemu towarstwu „Króny“ za probowe wobhospodarjenje měšćanskeje žurle přewostajić.

Tak bě tójšto wobydlerjow přišło, kotřiž zachowanje „Króny“ podpěruja. Mjez nimi bě zamołwity za młodźinsku swjećbu Jürgen Lublow. Wón apelowaše, zo njesměli při tejle temje jeničce wičnohospodarsce myslić, ale dyrbjeli tež přećam wobydlerjow wotpowědować. K tomu rjekny wyši měšćanosta Alexander Ahrens (SPD), zo je so mjeztym k tomu předrěł pospytać, hač to funguje. Mjeztym zo staj so Matthias Knaack a Heiner Schleppers (wobaj CDU) za Budysku měšćansku žurlu wuprajiłoj, mjenowaše Roland­ Fleischer wone 50 000 eurow „won mjetane pjenjezy“. A radźićel Zelenych Claus Gruhl měnješe, zo njeznaje nikoho młódšeho hač 40 lět, kiž by so za „Krónu“ zajimował.

Pišćele nětko zaso klinča

póndźela, 02. měrca 2020 spisane wot:

Poprawom mějachu pišćele Łazowskeje cyrkwje hižo loni hody hotowe restawrowane być. Dokelž pak dyrbjachu tež někotre njepředwidźane dźěła přewjesć, je wšitko trochu dlěje trało.

Łaz (SiR/SN). Wulke wjeselo knježeše wčera dopołdnja we Łazowskej ewangelskej cyrkwi. Přičina bě poswjećenje restawrowanych pišćelow, kotrež su dlěši čas mjelčeli, dokelž běchu je wobšěrnje ponowili. Čas bě na nich swoje slědy zawostajił. Na instrumenće z lěta 1872 dyrbjachu tójšto naprawow přewjesć, zo bychu wone zaso z originalnym zwukom klinčeli. Tak su pišćele porjadnje wurjedźili, znowa wobarbili a na skóncowanych městnach sporjedźeli. Na kóncu su instrument z twornje Ladegast-Rühlmann hłosowali, prjedy hač wone wčera na swjedźenskich kemšach z fararjom Matthiasom Gnüchtelom prěni raz zaklinčachu.

Krótkopowěsće (02.03.20)

póndźela, 02. měrca 2020 spisane wot:

Literarna dźěłarnička wo basni

Budyšin. W małym kole pjeć wobdźělnikow wotmě so sobotu w Budyskim Serbskim domje cyłodnjowska literarna dźěłarnička z Lubinu a Dušanom Hajduk-Veljković. Druhi raz stej Załožba za serbski lud a Ludowe nakładnistwo Domo­wina spěchowanske zarjadowanje za serbski pisacy dorost wuhotowałoj. W srjedźišću stejachu tónraz basnje.

Tobials Bilz nowy krajny biskop

Drježdźany. Teologa Tobias Bilz je nowy­ biskop Ewangelskeje krajneje cyr­kwje Sakskeje. 55lětny móžeše so sobotu w Drježdźanach w třećim wólbnym kole jasnje přesadźić. Bywši krajny młodźinski farar zdoby sej 48 hłosow. Sobupožadarjej Andreas Beuchel (56) a Ulrike Weyer (46) dóstaštaj 15 a 16 hłosow. Bilza chcedźa 25. apryla oficialnje zapokazać.

Jung wostanje měšćanosta

Serbska debata

nowostki LND