Dźećel na pólnej mjezy wužiwać
Ignac Wjesela z inowatiwnej ideju wuspěšny był
Chrósćicy (SN/MiR). Ignac Wjesela je znaty za to, zo ze stajnje nowymi a inowatiwnymi idejemi swoje bioratarstwo wobohaća. Tak zaběraše so w minjenym času z rostlinu, kotruž zahrodkarjo rady njewidźa. Ratarjo pak móhli z njeje po ideji Wjesele wulki wužitk měć. Wšako hodźi so z na polu plahowaneho dźećela něštožkuli wuzbytkować.
Tak widźi młody bioratar dźećel perspektiwisce wobswětej tyjacu, wudobrjenu (veredelt) dobrotu. A za to přija myto we wubědźowanju „eku – myto přichoda 2021“ sakskeho ministerstwa za energiju, škit klimy, wobswět a ratarstwo, w kategoriji „předewzaća“. Dobyte 5 000 eurow móže nětko nałožić za nowu proceduru prebiotiskeje fermentacije na pólnych mjezach. Prebiotika su substraty, kotrež mikroorganizmy wužiwajo strowotny wužitk posrědkuja. Při fermentaciji ze selu pokryte produkty kisaja.
Wuměnjenja so chětro polěpša
Dypkownje do hód a do žadosćiwje wočakowaneho sněha je gmejna Ralbicy-Róžant nětko swój nowy traktor, takrjec jako swójski dar k hodam, dóstała. Skónčnje, drje nětko mnozy měnja. Wšako běchu wo nakupi noweje mašiny w gmejnskej radźe horco diskutowali a wobzamknjenje wjacore razy přestorčili.
Ralbicy/Róžant (aha/SN). Mjeztym dlěje hač dwaj lětdźesatkaj wědźa sej w Delanach agilneho a přećelneho gmejnskeho dźěłaćerja Pětra Koklu wažić. Paleta jeho dźěłowych nadawkow je jara wobšěrna. Tak ma so běžnje starać wo rjedźenje a hladanje hrjebjow, kotrež wučinjeja w Ralbičansko-Róžeńčanskej gmejnje cyłkownu dołhosć 30 kilometrow. Tež zaručenje mjeńšich reparaturow w gmejnskich bydlenjach a při potrjebje pomoc w šuli, pěstowarni a na sportnišću wot gmejnskeho dźěłaćerja wočakuja. We wšěch wosom wjesnych dźělach komuny maja wobydlerjo za samozrozumliwe, zo su trawniki stajnje porjadnje hladane. Samsne wočakowanja stajeja na gmejnske puće, hdźež ma trawa na kromach wotsyčena, dźěry a škałoby po potrjebje zapłatane a wosebje w zymje běžnje sněh zrumowany być.
Wčera popołdnju su Helena Hejduškec, Sophie Hejduškec, Fabian ...
Hodowne postrowy před dźiwadłom
Hladanskim słužbam so dźakowali
Krótkopowěsće (23.12.21)
Dotal žadyn omikron-pad
Budyšin. W Budyskim wokrjesu njeje dotal žadyn pad z omikron-wariantu koronawirusa znaty, zdźěli krajnoradny zarjad wčera na naprašowanje. Tam rozprawjachu wutoru wo 608 natyknjenjach a pjeć smjertnych padach, incidenca wučinješe po RKI 422,8. We wokrjesu Zhorjelc bě incidenca 449,8. Tam informowachu wčera wo 241 infekcijach. Ličba zemrětych pacientow bě dźesać.
Deklaracija intendantow
Drježdźany. Sakska ministerka za kulturu Barbara Klepsch (CDU) je zhromadnje z intendantami dźiwadłow z Budyšina, Freiberga a Drježdźan deklaraciju za wjace empatije, solidarity a čłowjeskosće w času koronapandemije wozjewiła. Tak podpisarjo namołwjeja so šćěpić dać a so po korona-naprawach měć. Woni zasudźeja kóždužkuli formu hidy a namocy. Dalši akterojo su witani so deklaraciji přizamknyć.
Digitalna sćěnowina z idejemi
Policija (22.12.21)
Drohi Hyundai pokradnyli
Budyšin. Wobsedźer wosoboweho awta marki Hyundai so póndźelu njemało dźiwaše. Awto, kotrež běše wón w měšćanskim dźělu Nadźanecach (Nadelwitz) na Delnjokinjanskej wotstajił, tam hižo njebě, jako chcyše z nim wotjěć. Paduši běchu je po wšěm zdaću tón dźeń w času wot 5 do 14.15 hodź. pokradnyli. Aktualna hódnota jězdźidła wučinja 21 000 eurow. SUV bě něhdźe lěto stary. Wosebita komisija z mjenom „Kfz“ nětko mjezynarodnje za Hyundaijom pyta.
Žłobik a pěstowarnja dróšej
Kulow (AK/SN). Za wopyt swojich dźěći w žłobiku a pěstowarni dyrbja Kulowscy starši wot přichodneho lěta wyši swójski přinošk płaćić. W horće so ničo njezměni. To wobzamknychu měšćanscy radźićeljo na swojim zašłym posedźenju. Přičina podróšenja su wjetše wobhospodarjenske a předewšěm personalne kóšty.
Poslednje zwyšenje bě w nowembru 2015. „Wot toho časa smy přidatne wudawki z měšćanskeje kasy wurunali“, rozłoži měšćanosta Markus Posch (CDU). Nětko je Budyski krajnoradny zarjad město na to skedźbnił, zo su staršiske popłatki pod zakonsce předpisanym podźělom. Tohodla zwyša nětko dźewjećhodźinske zastaranje w žłobiku wot 180 na 210 eurow wob měsac. Měsačny přinošk za dźewjećhodźinske zastaranje w pěstowarni podróša wot 108 na 120 eurow. W horće so měsačny přinošk 65 eurow za šěsć hodźin zastaranja njezměni. Za dwě lěće chcedźa staršiske přinoški znowa přepruwować, rěka we wobzamknjenju Kulowskich měšćanskich radźićelow.
Wustajeja pórclinowe ptački
Prěni dźeń hód so testować dać
Pančicy-Kukow. W Pančicach-Kukowje móža so zajimcy prěni hodowny swjaty dźeń na koronu testować dać, a to wot 9.30 do 12 hodź. w lěkarskim domje nad praksu knjenje dipl.-med. Schöbel na Halštrowskej 3. Sobu přinjesć maja woni personalny wupokaz a kartku chorobneje kasy. Testowanski centrum na tym městnje je hewak stajnje póndźelu wot 14 do 17 hodź. a srjedu wot 7 do 11 hodź., nimo swjatych dnjow, wotewrjeny.
Skrótšene wotewrjenske časy
Budyšin. Budyski krajnoradny zarjad informuje, zo změje 23. a 30. decembra skrótšene wotewrjenske časy. Hižo wot 16 hodź. budźe zarjad zawrjeny, a to na wšitkich stejnišćach. 24. a 31. decembra njebudźe scyła přistupny. Tuchwilu njeje tam regularny wopyt móžny. Jenož wuwzaćnje je wosobinski termin po dojednanju móžny. Wobkedźbować ma so prawidło 3G. Sobu přinjesć maja ludźo tuž dopokaz šćěpjenja, wustrowjenja abo spěšnotest, nic starši hač 24 hodźin. Tež PCR-test, nic starši hač 48 hodźin, je móžny. Samotesty njejsu płaćiwe.
