Wotrowska cyrkej dóstanje přewětrjensku připrawu, elektriku a barbu

Wotrow (SN/MWj). Z poslednjej Božej mšu je Wotrowska wosada minjeny štwórtk ze swojeho Božeho domu wućahnyła. Nazajtra započachu ławki wot­šrubować a sobotu su je pomocnicy z cyrkwje znosyli. To bě start wobšěr­ne­ho ponowjenja cyrkwje, kotrež ma hač do wosadneho swjedźenja w juniju składnostnje 250. róčnicy wobstaća wosady swj. Bena wotzamknjene być. „Nimo ławkow smy tež wšón dalši mobiliar, kiž je za liturgisku potrjebu trěbny a je transportabelny, wurumowali, mjez druhim tež wołtarne blido. Wone je chětro wobškodźene. Najwjetši dźěl dowjezu do Rjenčec firmy w Dobrošicach, hdźež wšitke drjewjane dźěle po pomnikoškitnych zasadach ponowja a zawěsća“, rozłožuje Chróšćanski farar Měrćin Deleńk, kiž je za Wotrowsku wosadu sobu zamołwity. Dźensa započachu róšty twarić, a to tak, zo je dale móžno w cyrkwi njedźelu kemše swjećić. Za to dyrbja sej wosadni stólc sobu přinjesć. Jeno za seniorow spřihotuja 20 stólcow, tak zo woni žane po wsy nosyć njetrjebaja.

Hdyž chcu swój bydlenski dom ponowić, njetrjebam so nikoho dale prašeć, hač směm tajku abo hinašu barbu wužiwać, z kotreho materiala maja wokna być, abo kotre lampy sej do jstwy pójsnu. W padźe 250 lět stareje cyrkwje kaž Wotrowskeje je to wězo hinak. Tam ma pomnikoškit wažne słowčko sobu rěčeć, zo by so Boži dom w swojej historiskej cyłkownosći přichod­nym generacijam zachować hodźał. To tež kóždy lajk rozumi. Hdyž pak pomnikoškitni fachowcy sobu rěča, što ma so kak činić a što ma so wobkedź­bować, potom směš tola tež wočakować, zo za přidatne wudawki tež přidatne pjenje­zy přewostajeja. W tym padźe pak Wotrowscy wosadni dotal do měsačka hladaja. Přetož ze stron pomnikoškita hišće­ ničo dóstali njejsu. Za twarskeho knjeza to zawěrno žana spomóžna situacija njeje, ćim bóle, dokelž su twaršćizny tak a tak dźeń a dróše. Nadźijomnje so přiwšěm derje poradźi cyrkej wotpowědnje ponowić. Marian Wjeńka

Dalši pacienća zemrěli

Budyšin. Incidenca je po Roberta Kochowym instituće dźensa w Budyskim wokrjesu 313,1 a w Zhorjelskim 271,8. Wokrjes Budyšin informowaše minjeny pjatk wo 161 natyknjenjach z koronawirusom a wo třoch smjertnych padach. Wokrjes Zhorjelc bě 96 infekcijow a 13 zemrětych w ziwsku z koronu zwěsćił.

Nowe rjadowanja na šulach

Drježdźany. Nowy korona-wukaz sakskeho knježerstwa předwidźi wobmjezowane regularne wotewrjenje dźěćacych dnjowych přebywanišćow a zakładnych šulow. Rjadownje a skupiny maja so kruće dźělić. W šulskich twarjenjach a stajnje potom, njehodźi-li so minimalny wotstawk połdra metra dodźeržeć, ma so nahubnik wužiwać. Za wuknjacych wot 5. lětnika wobsteji we wučbje za to winowatosć, w primarnym schodźenku nic. Wopyto­warjo mjenowanych zarjadnišćow maja aktualny negatiwny test předpołožić.

Wulkopósłanc wotwołany

Wuhódanje hodowneje křižowki a wozjewjenje dobyćerjow je hišće raz kaž mała dopomnjenka na minjene hody, ko­trež­ su bohužel hižo­ zaso cyły čas nimo.­

Tójšto dopisow z prawej wotmołwu „Měrny hodowny čas“ je zašłe dny z póštu a po elektroniskim puću do redakcije dóšło, tak zo měješe redakciska fortuna lubu nuzu, dobyćerjow zwěsćić. Su to Kristina Popowscyna z Budyšina, Stephanie Mje­tašec ze Sulšec pola Kulowa a Benedikt Rjeda z Prawoćic. Tući třo smědźa so wjeselić na rjane prezenty, kotrež je nam přewostajił wobchod klóštra Marijineje hwězdy w Pančicach-Kukowje. Myto dobyćerjam přichodne dny wosobinsce přepodamy.