Za předstajenje knihi so přizjewić
Budyšin. „Region njewěstoty? Podkarpatská Rus 1918-1938 a wěstotne diskursy w historiskim slědźenju wo mjeńšinach“ rěka hesło zarjadowanja Serbskeho instituta, kotrež přewjedu štwórtk, 21. oktobra, w 15 hodź. w Budyskim Kamjentnym domje. Ze załoženjom Čěskosłowakskeje 1918 bu region wokoło Užhoroda (dźensniša Ukraina) pod pomjenowanjom Podkarpatská Rus dźěl noweho nacionalneho stata. Wosebitosć regiona njebě jenož jeho periferne połoženje. Hladajo na zestawu ludnosće, słabu infrastrukturu a połoženje při hranicy płaćeše wón jako faktor njewěstoty. Statne jednanje w regionje přewodźachu mnohe diskursy wo wěstoće. Zarjadowanje poćahuje so na lětsa wušłu knihu „Fremde Peripherie – Peripherie der Unsicherheit? Sicherheitsdiskurse über die tschechoslowakische Provinz Podkarpatská Rus (1918–1938)“ a skići składnosć, wo wěstotnych diskursach w mjeńšinowym slědźenju rěčeć.
Policija (18.10.21)
Na wopačnej čarje jěł
Słona Boršć. Dokelž je při jězbje do Drježdźan na wopačnej čarje jěł, je 22lětny muž z Pólskeje dźensa rano na awtodróze A4 wjacore wobchadne njezboža zawinił. Prěnju informaciju wo nim dósta policija z tunla pod Limasom. Na to spytachu zastojnicy muža zadźeržeć, štož pak so jim njeporadźi. Šofer nakładneho awta staji swój Lkw prěki přez jězdnju, tež to pak njeje wodźerja awta zadźeržało. Hakle mjez Słonej Boršću a Hornim Wujězdom zrazy wón do srjedźneho wobhrodźenja a wosta stejo. Zranjeneho 22lětneho dowjezechu z helikopterom do chorownje. Kaž so při prěnim přepytowanju wukopa, steješe młody muž pod wliwom drogow.
Dalše naprawy předstajili
Njebjelčicy (SN/MWj). Za wudźeržowanje swojich wodźiznow 2. rjadu Njebjelčanska gmejna dalše pjenjezy wuda. Na swojim zašłym posedźenju radźićeljo wobzamknychu, za to 10 500 eurow nałožić. Je to mjeztym třeća wjetša suma, kotruž planowarjej Andreasej Stowasserej za poradźowanje a zdźěłanje planow přewostaja. Při tej składnosći je wón minjene dny radźićelam rozłožił, kajki je wokomiknity staw a kotre naprawy su přichodnje předwidźane.
Powšitkownje bě Stowasser zwěsćił, zo su wodźizny na teritoriju Njebjelčanskeje gmejny hladajo na jich wudźeržowanje w dobrym stawje. Tak fachowc měnješe, zo bu hižo wjele činjene a wodźizny intensiwnje hladane. Při tym njeńdźe wo to, rěčki a hrjebje po jich cyłkownej dołhosći dospołnje přirodźe přiměrić. Skerje dosaha, hdyž su wěste wotrězki přirodźe bliske. Tamne wotrězki móža potom bjez wosebitych naprawow wuńć.
Maja plany za wočerstwjenišćo
Brězowski jězor chcedźa z pjenjezami ze strukturneje změny wutwarić
Slepo/Trjebin (CK/SN). 25 000 přenocowanjow zličichu loni při Brězowskim jězoru, nimo toho 20 000 dnjowych wopytowarjow. Tejle ličbje wobkrućatej, kak woblubowane wočerstwjenišćo je. Wo jězor stara so lěta 2000 załoženy zaměrowy zwjazk, kotremuž přisłušatej Slepjanska a Dźěwinska gmejna. Třeća w zwjazku móhła Trjebinska być. Wo tym je tamniša gmejnska rada na wurjadnym posedźenju rěčała.
Brězowski jězor drje njesłuša k najwjetšim we łužiskej jězorinje, ma pak ze swojim FKK-brjohom wosebitosć. Třećinu hosći zličichu jeničce tam. Dalše wuwiće wočerstwjenišća je Slepjanski wjesnjanosta a předsyda zaměroweho zwjazka Jörg Funda (CDU) Trjebinskim radźićelam rozłožił. Podlěšić sezonu by 15 000 přidatnych přenocowanjow wuskutkowało, rěka w eksternym posudku.
Historiske drohoćinki zawěsćene
Budyšin (ES/SN). Na wuspěšne zmištrowanje njewšědneho nadawka móžeše tele dny Budyski archiwny zwjazk zhladować. Jedna so wo archiw wobšěrneho wobstatka wopismow zažnych měšćanskich a regionalnych stawiznow. K tomu słušeja 100 kejžorskich a 374 kralowskich wopismow kaž tež dwě bamžowskej, kotrež wšitke město Budyšin potrjechja.
Kermušne wjesela knježachu minjeny kónc tydźenja w ...
Krótkopowěsće (18.10.21)
Incidenca dale stupa
Budyšin/Zhorjelc. Ličba padow korony dla w Budyskim a Zhorjelskim wokrjesu dale přiběra. Za Budyski podawa RKI dźensa incidencnu hódnotu 157,4. W Zhorjelskim wučinja wona 125,3. Tež w serbskich gmejnach ličba chorych stupa. Najwyša je wona w Radworju ze 17 z koronawirusom natyknjenymi, Njebjelčicy mějachu sydom, Ralbicy-Róžant štyri, Pančicy-Kukow a Worklecy jednohoo.
Wo poměru k ludźom a Bohu
Schmiedeberg. Swoje prěnje kubłanske dny w ponowjenym Winfriedowym domje w Schmiedebergu je dekanatna młodźina kónc tydźenja přewjedła. Wot minjeneho pjatka do wčerawšeho zaběraše so 21 młodostnych z poměrom k ludźom a Bohu. Nawjedowałoj staj kubłanske dny zamołwity farar za serbsku młodźinu Gabriš Nawka a młodźinska referentka dekanata Lucija Škodźina.
Zhladuja na jubilej
„Fenki“ posledni raz
Budyšin. Němsko-Serbske ludowe dźiwadło pokaza jutře, sobotu, swoju kołwrótnu komediju „Dołhož fenki běža“ w 19.30 hodź. na hłownym jewišću Budyskeho NSLDź. Je to poslednje předstajenje a hrabnjenčko měsaca, kóždy lisćik płaći jenož wosom eurow. Dźiwadło poskića simultany přełožk do němčiny. W dźiwadle płaći incidency korony dla prawidło 3G. Testować dać móža so zajimcy do předstajenja w testowanskim centrumje na Burskej hasy. Wón je sobotu wot 17.30 hodź. wotewrjeny. Test płaći za wopytowarjow dźiwadła pjeć eurow. Termin móžeće hižo nětko přez internetnu stronu NSLDź skazać. Lubowarjo serbskeho dźiwadła njech lóštny kruch njeskomdźa.
Prózdniny z instrumentom
Policija (15.10.21)
63lětny zhubjeny
Rakecy. Hižo wot štwórtka minjeneho tydźenja je 63lětny muž z Rakec zhubjeny. Policiji bu tónle pad wutoru znaty. Muž je 7. oktobra swoje bydlenje w Rakečanskich bydlenskich blokach z módrym žonjacym kolesom wopušćił, dokelž chcyše hriby pytać jěć. Dotal je policija podarmo za nim pytała. Při tym zasadźichu nimo wjetšeje ličby zastojnikow tež trut a jěchansku staflu hotowostneje policije. Pytany je 1,75 metrow wulki, šwižneje postawy a ma krótke šědźiwe włosy. Štóž móže pokiwy dać, njech so pola policije přizjewi.
Starosće wuskeje jězdnje dla
Radwor (BB/SN). Što činić z traktorami abo wulkimi a mjeńšimi awtami, kotrež po Radworju smala? Warnowanske tafle nastajeć? Abo w ekstremnym padźe jim samo zakazać po wsy jězdźić? Štož započa so předwčerawšim wječor na zhromadźiznje gmejnskeje rady z jednorym naprašowanjom wobydlerki, wuwi so ke chětro wobšěrnej diskusiji. Problem, zo je hłowny puć prěki přez wjes na někotrych blakach za dźensniše poměry zawěrno chětro wuski, wšak njeje nowy.
Tež žadanje wobydlerki njebě nowe. Gmejna měła so wo porjadk starać, prjed hač snano něchtó žiwjenje přisadźi. Ale kak, hdyž jedna so při Dróze Alojsa Andrickeho tola wo wokrjesnu a nic wo komunalnu dróhu? K tomu přińdźe: Na próstwu gmejny su tam před wěstym časom hižo raz tempo měrili. Tola lědma štó je tehdy spěšnišo hač dowolenych 50 kilometrow na hodźinu jěł.
