Nowy nošer pěstowarnjow
VdK chce dale serbske nałožki w swojich zarjadnišćach pěstować
Łaz (AK/SN). Socialny zwjazk VdK Sakskeje je wot spočatka lěta nowy nošer štyrjoch pěstowarnjow Łazowskeje gmejny we Łazu, w Běłym Chołmcu, Šćeńcy a we Wulkich Ždźarach. Wjesnjanosta Thomas Leberecht (CDU) je nošerstwo jednaćelej VdK Ralphej Beckertej tele dny oficialnje přepodał. W štyrjoch zarjadnišćach hladaja dohromady 320 dźěći.
Dotalny nošer, wot lěta 2011 bě to Křesćansko-socialny kubłanski skutk, je nošerstwo sam wupowědźił. Na wupisanje gmejny Łaz je so wosom zajimcow přizjewiło. Z třomi wjedźechu konkretne rozmołwy, na kotrychž běchu tež zastupjerjo staršich a młodźinski zarjad wokrjesa wobdźěleni. Loni w septembru su so gmejnscy radźićeljo jednohłósnje za VdK rozsudźili.
Wjesny wobchod nětko jako tzwr
Njebjelčicy (SN/MWj). Po dlěšim času přihotow su Njebjelčanski wjesny wobchod, kotryž je sobu w gmejnskim centrumje při sportnišću zaměstnjeny, na towaršnosć z wobmjezowanym rukowanjom (tzwr) přetworili. Wón mjenuje so nětko Permagold Hornja Łužica tzwr. Wo tym informuje jednaćel a towaršnik Thomas Noack. Nimo toho přidruži so jemu a třom dalšim towaršnikam towarstwo Permagold jako pjaty towaršnik. Kaž z nowinskeje informacije wuchadźa, nowa tzwr wšitke dotalne zrěčenja a dorěčenja bjez změnow dale wjedźe. Jeje adresa je na Hłownej 9 w Njebjelčicach.
Samo kónc tydźenja testy móžne
Jeli dyrbja so wobydlerjo Slepoho a wokolnych wsow někajkeje přičiny dla testować dać, njetrjebaja hižo ekstra do Mužakowa abo Běłeje Wody. To je wulka lěpšina, wšitcy potrjecheni měnja.
Slepo (CK/SN). Darmotny spěšnotest na koronawirus móžeš nětko tež w Slepom přewjesć dać. Wjesnjanosta Jörg Funda (CDU) so nad tym wjeseli. Dotal je tajki poskitk we wsy pobrachował. Wobydlerjo Slepjanskeho regiona dyrbjachu ekstra do Mužakowa abo Běłeje Wody na testowanje jěć. Nimo toho Funda wita, zo je testowanski centrum tež njedźelu wočinjeny. Kónc tydźenja so testować dać je na přikład trjeba, hdyž chcedźa někoho w starowni wopytać abo hdyž so na nowy dźěłowy tydźeń přihotuješ.
Hižo srjedź februara směmy so na prěnje čerstwe kórki z ...
W Błótach cyłe lěto sezona
Wudawki za personal kritizowali
Hospodarski plan města Budyšina zdźěłać je lěto wob lěto ćeše. Tajki plan za lětsa nastajić je wosebite wužadanje, kaž bě wčera na posedźenju tudyšeje měšćanskeje rady słyšeć.
Budyšin (SN/MWj). Financny měšćanosta Budyšina dr. Robert Böhmer měješe na wčerawšim posedźenju měšćanskeje rady nadawk, hrubje rozłožić tuchwilne połoženje města a kak chce wone spagat mjez pobrachowacymi pjenjezami a swójskimi přećemi zmištrować. Radźićeljo rozjimachu w prěnim wuradźowanju hospodarski plan 2022. Tón drje budźe jutře tema na njezjawnym posedźenju radźićelow, někotre ličby pak je dr. Böhmer hižo wčera mjenował.
Krótkopowěsće (27.01.22)
Kat Austen předstaji album
Berlin. Wuslědki swojeho łužiskeho projekta předstaji zwukowa wuměłča Kat Austen dźensa w 20 hodź w Berlinje, ale tež online. Pod titulom „This Land is Not Mine“ wozjewi wona sydom spěwow na protestny album, kotrež wopřijimaja wubrane zwuki z regiona a powědaja wo zhubjenych wjeskach, wo mystiskich rěkach a wo měnjacej so kulturnej identiće.
Dźeń a wjace infekcijow
Budyšin. Budyski wokrjes je wčera 440 nowoinfekcijow z koronawirusom zwěsćił. Dwě dalšej wosobje stej zemrěłoj. Roberta Kochowy institut podawa tu dźensa incidencnu hódnotu 387,9. W Zhorjelskim wokrjesu je so wčera 435 wosobow natyknyło. Incidenca tam wučinja 445,8 po dźensnišej informaciji RKI. Štyrjo schorjeni su zemrěli.
Iniciatiwa přeproša
Radźićeljo so schadźuja
Njebjelčicy. Předstajenje koncepta kolesowanskeje šćežki podłu statneje dróhi S 100 wot Miłoćic do Kamjenca budźe jedna z temow zhromadźizny Njebjelčanskeje gmejnskeje rady jutře, štwórtk, w 19.30 hodź. w posedźenskej rumnosći Njebjelčanskeje gmejny. Dale zaběraja so z twarskim planom přemysłownišća Při Krabatowym kamjenju a z wobstaranjom drasty za młodźinsku wohnjowu woboru.
Chrósćicy. Tež radźićeljo gmejny Chrósćicy jutře wuradźuja, a to wot 19 hodź. w kulturnym a gmejnskim centrumje. Woni maja so rozestajeć z čestno- abo hłownohamtskej dźěławosću wjesnjanosty. Dalši dypk na jich dnjowym porjedźe budźe, rozjimać wustawki wosebiteho wužiwanja w Chróšćanskej gmejnje. Wobě posedźeni radźićelow stej zjawnej. Zajimcy su witani.
Policija (26.01.22)
Do hale so zadobyli
Nowa Łuka. Minjeny kónc tydźenja běchu so njeznaći do hale firmy w Nowej Łuce w gmejnje Halštrowska Hola zadobyli. Tam pokradnychu mjez druhim chłódźenskej agregataj w cyłkownej hódnoće něhdźe 1 300 eurow. Nimo toho načinichu 300 eurow wěcneje škody.
Wjetše wudawki zmištrowali
Dróhotwarski projekt na kóncu tola dróši był
Rakecy (JK/SN). Wjacore lěta je gmejna Rakecy wulki projekt, wobnowjenje Jitkowskeje dróhi, planowała a přihotowała. Loni móžachu dróhu po nimale jednym lěće twarjenja a wužadanjow za komunu a přemysłownikow podłu puća zaso swojemu zaměrej přepodać.
Na minjenym posedźenju gmejnskeje rady informowaše wjesnjanosta Swen Nowotny (CDU) radźićelow a přitomnych wo kóštach nastupajo wobnowjenje dróhi. Planowała bě gmejna z wudawkami 1,2 milionow eurow, kotrež buchu z 85 procentami spěchowali. Objektiwnych přičin dla je za čas wobnowjenja tójšto přidatnych wudawkow k tomu přišło. Na kóncu bě to 1,9 milionow eurow. Wulka bě nadźija, zo budu tež přidatne wudawki kaž kompleksne wotwodźowanje dešćikoweje wody abo kroma dróhi w połnym wobjimje spěchowane.
