Nowotwar na dotalnym městnje
Po nowej pěstowarni katolskeje wosady měri so město Kulow na dalšu wulku inwesticiju. Prěnjorjadnje profitować budu z njeje wohnjowi wobornicy, skónčnje pak wšitcy wobydlerjo.
Kulow (AK/SN). Město Kulow dóstanje nowu, praktisku a mnohostronsce wužiwajomnu wohnjowobornu gratownju. „Nalěto 2023 ma hruby twar hotowy być. Potom slěduje nutřkowne wuhotowanje“, rjekny twarski nawoda města Stephen Rachel wčera, jako su zakładny kamjeń połožili.
Za planowanje a twar wudadźa 1,5 milionow eurow. Wudawki dźěla sej po třećinje město Kulow, Swobodny stat Sakska a Zwjazk z měšćanskotwarskeho programa Socialne město. Wuhotowanje wohnjowoborneje gratownje a wonkowne připrawy w cyłkownej sumje hišće zapřijate njejsu. Za to su próstwu wokrjesej Budyšin zapodali a nadźijeja so wottam 500 000 eurow, Stephen Rachel rozłoži.
Składnostnje 750. róčnicy prěnjeho pisomneho naspomnjenja Slepoho ...
Krótkopowěsće (18.02.22)
Nowi čłonojo přirady
Berlin. Parlamentariska přirada Załožby za serbski lud ma wot wčerawšeho rjad nowych čłonow. Tak powołachu zapósłancy Němskeho zwjazkoweho sejma w Berlinje Simonu Koß za SPD a dr. Christianu Schenderlein za CDU do přirady. Jako jeju zastupjerjow pomjenowachu Silviju Lehmann a Knuta Abrahama. Parlamentariska přirada radu Załožby za serbski lud poradźuje.
Nowosć ze załožby
Budyšin. Wot wčerawšeho ma Załožba za serbski lud w swojim online-wobchodźe pod noty serbskich ludowych a popularnych spěwow za dujerjow. Poskitk wobsahuje partitury 14 pěsnjow we wobdźěłanju za wšelake dujerske instrumenty a bijadła. Zajimcy móža sej pak kompletny pakćik za 12,95 eurow pak kóždu pěseń jednotliwje za 2,95 eurow kupić.
Incidenca lochce zwyšena
Budyšin/Zhorjelc. Incidencne hódnoty za Budyski a Zhorjelski wokrjes dale, ale jeno snadnje, stupaja. Roberta Kochowy institut poda za dźensa hódnotu 1 261,4 za Budyski a 1 074,4 za Zhorjelski wokrjes. Jeničce wčera zwěsćichu w Budyskim wokrjesu 987 dalšich infekcijow z koronawirusom, w Zhorjelskim 612.
Reparuje časniki z wulkej zahoritosću
Wopyty pola nazhonitych časnikarjow Jakubej Zimmermannej a jeho hobbyjej chětro wjele wunjesli
„Najwjetši časnik, kotryž smědźach reparować, je časnik našeje něhdyšeje cyrkwineje wěže tu w Zdźěri.“
Jakub Zimmermann
Hižo w starobje dweju lět započa Jakub Zimmermann prěnje časniki zběrać. „Tak sym so w běhu časa z najwšelakorišimi družinami rozestajał. A we mni zbudźi so začuće, skóncowane časniki tež raz sam reparować móc“, powěda 18lětny Zdźěrjan. Časnikar w Budyšinje bě jemu swój čas rozłožił, kak maš baterije časnika wuměnjeć. Tónle wobraz wosta jemu hač do dźensnišeho w pomjatku.
Policija (17.02.22)
Spěšnosć kontrolowali
Bluń. Na zwjazkowej dróze B 156 blisko pěstowarnje w Blunju (Bluno), hdźež je 30 km/h dowolenych, su policisća předwčerawšim spěšnosć kontrolowali. Wot 1 290 měrjenych jězdźidłow bě 50 přespěšnych. 31 šoferow ma nětko warnowanski pjenjez zapłaćić, za 19 wodźerjow awta budźe pokuta trochu wjetša. Najspěšniši bě pólski Seat z 63 km/h.
Točenje sej wobhladać
Konjecy. Tele dny su w Delanach probowe točenja za móžny Němski centrum za astrofyziku zahajili. Po wšěm zdaću maja wone pjeć do šěsć tydźenjow trać. Zajimcy budu sej najskerje wot srjedź měrca točenske dźěła wobhladać a na městnje wjace wo móžnym wulkoprojekće a wo dźensnišich móžnosćach astrofyziki zhonić móc. Předwidźane je to za mjeńše skupiny a šulske rjadownje, kotrež su rady witane. Zajimcy měli so za to sčasom přizjewić, a to e-mailnje pod .
Pokazaja nowu wustajeńcu
Budyšin. Z tysaclětnymi stawiznami Hornjeje Łužicy zaběra so nowa wustajeńca, kotraž budźe wot soboty, 19. februara, w Muzeju Budyšin widźeć. W přehladce prezentuja wuslědki dwulětneho projekta Interreg, zaběraceho so ze slědami słowjanskeho wobsydlenja na terenje historiskeje Hornjeje Łužicy. Sakski krajny zarjad za archeologiju a antropologiski institut Wrócławskeje uniwersity stej na wjacorych městnach wokoło Budyšina a wuchodnje Nysy zemske přepytowanja přewjedłoj. Jich wuslědki budu we wustajeńcy do konteksta hižo znatych namakankow zarjadowane.
Saněruja nasyp Sprjewje
Busowe zastanišćo přetwarja
Gmejnska rada měła za spěšne rozsudy a zalutowany čas myto dóstać
Rakecy (JK/SN). Znowa zaso spěšnje je so zjawny dźěl posedźenja Rakečanskeje gmejnskeje rady wčera nawječor minył. Hačrunjež běchu radźićeljo na namjet wjesnjanosty Swena Nowotneho (CDU) jenički dypk z dnjoweho porjada wzali – rozprawa k hospodarskemu planej je dowola nawodnicy financneho zarjada dla gmejny na měrcowske posedźenje rady přestorčena –, běchu za dobre poł hodźinki z dnjowym porjadom hotowi. Tež přitomnaj zastupjerjej planowanskeho běrowa Panse njetrjebaštaj so słowa jimać, dokelž běchu radźićelam wšitke pozadki k wotwažowanskim wustawkam a wobtwarjenskemu planej ryćerkubła w Psowjach (Oppitz) jasne. Tohodla móžachu wustawki jednohłósnje wobzamknyć, a wone budu nětko na gmejnskim zarjedźe wupołožene. Tam maja wobydlerjo składnosć, sej je wobhladać a dodawki abo namjety naćisk wustawkow nastupajo zapodać, kaž su to tež z naćiskom plana za wužiwanje ležownosćow Rakečanskeje gmejny činili. Namjety a stejišća zastupjerjow zjawnych zajimow su w planje wobkedźbowane.
Wobnowja lětsa wokna cyrkwje
Bartska cyrkej je minjene lěta tajke a hinaše twarske dźěła dožiwiła. Lětsa chcedźa Boži dom dale saněrować. Spěchowanske towarstwo nadźija so znowa skutkowneje pomocy.
Bart (UM/SN). Při saněrowanju Bartskeje cyrkwje zahaja nětko takrjec nowe koło, kaž Friedrich Hesse ze spěchowanskeho towarstwa za Bartsku cyrkej informuje. Po tym zo běchu tam minjene lěta zwony a wěžu ponowili, ma nětko cyrkej sama na rjedźe być. Předewšěm měri so spěchowanske towarstwo na wokna. Zhromadnje z planowanskim běrowom přihotuja tuchwilu próstwy wo spěchowanske srědki, Friedrich Hesse pisa. Runočasnje nadźijeja so mnohich darićelow a sponsorow. Mjez druhim planuja, zo móža zajimcy kmótřistwo za jednotliwe wokno přewzać. Kaž trochuja, płaći saněrowanje jednoho wokna 2 000 do 3 000 eurow.
Za ponowjenje třěchi a fasady chce towarstwo próstwu wo spěchowanje přez Leaderowy region Hornjołužiska hola a haty zapodać. Firma Creaton je mjeztym hižo připrajiła, zo třěšne cyhele přewostaji.
Swjedźeń žiwjenskeje radosće
Ćisk (AK/SN). Lětuši, mjeztym 14. serbski ewangelski domizniski dźeń Wojerowskeho regiona wotměje so 10. julija w Ćisku. Wo tym informuje farar Wojerowskeje Janskeje wosady Heinrich Koch. Wón přisłuša 15 ludźi wopřijacemu dźěłowemu kruhej, kotryž domizniski dźeń přihotuje.
Podawk započnje so w 10 hodź. z němsko-serbskej Božej słužbu w Janskej cyrkwi. Swjećić budźe ju serbski superintendent na wuměnku Jan Malink. Wo hudźbne wobrubjenje postara so Židźinski chór pod nawodom Kerstin Lieder a kantora Johannesa Leue. Za najmłódšich wobdźělnikow planuja dźěćacu bohosłužbu. Konjace zapřahi jednotliwych wsow Wojerowskeje Janskeje wosady podadźa so po kemšach zhromadnje do Ćiska. Připrajiła je hižo Rakečanska dujerska kapała, kotraž domizniski dźeń ze swojimi zynkami wobrubi.
