Krótkopowěsće (22.03.22)
Serija nětko w mediatece
Drježdźany. Serija wo Serbach „Straight Outta Crostwitz“ je w mediatece ARD widźeć. Wobhladać móža sej ju zajimcy tež wot jutřišeho na MDR+. W srjedźišću serije, kotraž bu w Chrósćicach a Hornjej Hórce wjerćana, steji spěwarka ludowych pěsnjow Hanka (Jasna Fritzi Bauer), kotraž so jako rapperka na wubědźowanju wobdźěli. Wobdźěleny běše tež bubnar skupiny „Silbermond“ Andreas Nowak.
Incidenca zaso pod 2 000
Budyšin. Incidenca po Roberta Kochowym instituće je dźensa w Budyskim wokrjesu z 1 932,5 zaso pod hódnotu 2 000, we wokrjesu Zhorjelc je wona 1 418,8. Tam informowachu wčera wo 1 437 natyknjenjach wot minjeneho pjatka a wo dwěmaj smjertnymaj padomaj wot 11. měrca. Z Budyskeho wokrjesa porno wčerawšemu žane aktualniše ličby njepředleža.
Swobodne městna za poetryslam
Budyšin. Serbski ludowy ansambl a Ludowe nakładnistwo Domowina wuhotujetej 18. junija prěni serbski poetryslam „Lit|a|pop“. Za njón přihotowacu dźěłarničku, kotruž organizatoraj 26. a 27. měrca w Budyskej młodowni poskićatej, móža so zajimcy krótkodobnje hišće přizjewić, a to z mejlku na .
K jubilejej ze swójskej listowej znamku
Dźesać motiwow pokazuje, što je za Slepo z jeho 750lětnymi stawiznami bytostne. Listowe znamki su mjez zběrarjemi požadane. Na listy pak je lědma lěpja.
Slepo (CK/SN). Serbske motiwy běchu na listowych znamkach Němskeho pósta stajnje zaso raz widźeć, zwjetša narodna drasta. Nětko je dźesać tajkich znamkow w poskitku, na kotrychž je wjele wjace widźeć. Wušli su wone składnostnje 750. róčnicy prěnjeho naspomnjenja Slepoho. Prěnje łopjena běchu požadane kaž ćopłe całty.
Ideju měješe nawodnica Serbskeho kulturneho centruma (SKC) Silwija Panošina. Dokelž tam znamki listoweho serwisa RPV předawaja, su so rozsudźili, zhromadnje z nim wosebite znamki k Slepjanskemu jubilejej wudać. Mjeztym poskićeja łopjeno z dźesać motiwami po 80 centach. Sobudźěłaćerce SKC Stephanie Bierholdtec so znamki jako cyłk lubja. „Je wjele markantneho widźeć a tež serbskeho, štož je mi wosobinsce wažne. To je woprawdźe reprezentatiwne“, wona měni.
Policija (21.03.22)
Njezbožo zawinił a ćeknył
Žičeń. 58lětny wodźer nakładneho awta je sobotu w Žičenju (Seitschen) při dwórnišću do parkowanišća kolesow zrazył a ćeknył. Swědk informowaše policiju. Zastojnicy lepichu zawinowarja pozdźišo w Husce a zwěsćichu pola njeho 1,66 promilow alkohola w kreji.
Nowe tafle při wuhladnišću
Ma runostajenje za prawe
Solidnje hospodarili
Rozprawa k lońšemu hospodarskemu planej pozitiwnje překwapiła
Rakecy (JK/SN). K zahajenju minjeneho posedźenja Rakečanskeje gmejnskeje rady wupadaše tak, zo njebudźe gremij wobzamknjenjakmany, dokelž mnozy radźićeljo pobrachowachu. Na zbožo pak hišće jedyn ze zapozdźenjom přińdźe a tak móžachu swoje wobzamknjenja přewjesć. Te běchu trěbne, zo móhli nadawk za ponowjenje gmejnskich pućow přepodać.
Po tym zo bě gmejna Rakecy podłožki pjeć firmam připósłała, su štyri předewzaća poskitk zapodali. Nadawk přepodachu w gmejnje derje znatej firmje Kutter z Plaue. Wona ma nětko za 67 000 eurow tři komunalne dróhi ponowić, mjez druhim Lěsny puć w Rakecach.
Hospoda nětko lěpje wuhotowana
Kamjenc (BG/SN). W putniskej hospodźe při wuhladnej wěži na Kamjenskej Pastwinej horje su minjeny pjatk ponowjene sanitarne rumnosće přepodali. Zo móžachu tónle projekt zwoprawdźić, je hłownje zasłužba Kerstin Boden. Wona bě sama hižo po Jakubowym puću hač do Santiaga de Compostela putnikowała a wě, zo so při tym chětro poćiš. Tohodla su porjadne sanitarne wuměnjenja w putniskej hospodźe jara wažne. A runje to putnicy w Kamjencu w zašłosći časćišo porokowachu. Tohodla bě sej wona předewzała, to změnić.
Dokelž trjebachu za projekt něhdźe 15 000 eurow, zrodźi Kerstin Boden ideju, na njewšědne wašnje dary zběrać. Wona připowědźi, z dołhimi plećenymi šlebjerdami wuhladnu wěžu na Pastwinej horje zakryć, a namołwješe přećelow, znatych a zajimcow při tym pomhać. To měješe tajki wulkotny wothłós, zo sta so ideja loni z nadregionalnym podawkom. Ze wšěch kónčin Němskeje kaž tež z wukraja dochadźachu 20 króć 20 centimetrow wulke plećene lapki, kotrež su w Kamjencu do dołhich šlebjerdow zešili.
Tajke rjane hrajkanišćo kóžda wjes nima. Minjeny tydźeń ...
Krótkopowěsće (21.03.22)
Nowotny dale wjesnjanosta
Rakecy. Z 98,5 procentami wšěch hłosow bu Swen Nowotny wčera za Rakečanskeho wjesnjanostu wuzwoleny. Wot CDU namjetowany bě Nowotny jenički kandidat. Wolerjo pak mějachu składnosć, dalše mjeno na wólbny lisćik připisać, štož je jenož mało ludźi činiło. Před sydom lětami bě so Swen Nowotny prěni raz wo zastojnstwo wjesnjanosty w Rakecach prócował a so tehdy přećiwo třom dalšim kandidatam přesadźił.
Incidenca wyša hač 2 000
Budyšin. Přez kónc tydźenja je incidenca w Budyskim wokrjesu marku 2 000 překročiła. Dźensa podawa Roberta Kochowy institut hódnotu 2 082,8. Wokrjes informowaše dopołdnja wo 1 693 natyknjenjach z koronawirusom a wo dwěmaj smjertnymaj padomaj wot minjeneho pjatka. Wo 1 216 infekcijach rozprawješe wokrjes Zhorjelc minjeny pjatk, po RKI wučinja tam incidenca dźensa 1 609,6.
Sylnja wučbu informatiki
Policija (18.03.22)
Spěšnosć kontrolowali
Rakecy. Dlěje hač pjeć hodźin je policija předwčerawšim popołdnju a wječor spěšnosć na hłownej dróze w Rakecach kontrolowała. Do směra na Budyšin bě wot 600 jězdźidłow 28 přespěšnych. Rekord docpě pólski Opel z 82 km/h. Šofer dyrbi nětko měsac nóžkować a 260 eurow pokuty płaćić. Do napřećiwneho směra bě wuslědk moderatniši. Wot 660 měrjenych awtow bě pjeć přespěšnych, z toho tři we wobłuku pokuty. Najspěšniši z 71 km/h bě VW z Budyskim čisłom. Na wodźerja čakatej nětko dypk w Flensburgu a 115 eurow pokuty.
