Akcije na dobro Ukrainjanow
W Čornym Chołmcu pytaja za njedźelu zwólniwu abo zwólniweho, kiž by lóšt měł, w pjekarni Krabatoweho młyna sobu dźěłać. Wot 6.30 hač do 15.30 hodź. su pilne ruki trěbne, kotrež tykancy ze słódnymi wěcami pokładuja. Tón dźeń a tež hižo sobotu předawaja w pjekarni pječwo na dobro Ukrainy. Dochody z toho su za tam ćerpjacych.
We Wotrowje wuwiwaja tohorunja aktiwity. Wjacore serbske swójby su hižo ćěkancow z Ukrainy přiwzali. Nětko chcedźa so we wobłuku swójbneho swjedźenja zetkać. Wotměć chcedźa jón njedźelu, 27. měrca, we Wotrowje. Přeprošene su serbske swójby z ukrainskimi hosćimi. Iniciator Dominik Škoda a dalši proša wo to, zo bychu so zajimcy přizjewili. Wšako chcedźa wšitkich z kofejom a tykancom pohosćić. Tak je trjeba wědźeć, kelko ludźi by zhromadne popołdnjo we Wotrowje dožiwić chcyło. Za dźěći maja wšelku zaběru předwidźanu, kaž skakanski hrodźik; wohnjowa wobora chce pódla być; zhromadnje chcedźa za bulom honić a wolejbul hrać; tež na hrajkanišću budźe dosć móžnosćow so zabawjeć. W 15 hodź. chcedźa so wšitcy na sportnišću zetkać.
Wo wójnje rěčeć njewobeńć
Je trjeba z dźěćimi wo wójnje rěčeć? A kak to najlěpje zdokonjeć? Dźěćaca psychologowka dr. Kathrin Mikan, kotraž poskića na platformje SUPERHELDENKIDS wědomostnje wopodstatnjene poskitki za wuwiće wosobiny na sebjewědome, zbožowne wuspěšne a strowe dźěći, posrědkuje zajimcam wo tym informacije po livestreamje.
Wšojedne, kak derje so prócujemy škitać dźěći před hrózbu wójny, wone strachi dorosćenych začuwaja. A tajke zaso strachi w dźěćoch wuwabjeja. Hrózbne hižo je, hdyž dźěći jenož medialne informacije wo wójnje dožiwjeja. Wobrazy so jim takrjec do mozow „zapaleja“ a móža stres a strach wuskutkować. Dźěći to pokazuja, mjez druhim zadźeržo so kaž ćěšenk. Wone su emocionalnje njewurunane, maja ćeže spać a jěsć, so koncentrować a skorža bolosćow dla. „Tuž je wažne jim rozkłasć, zo njejsu na tym wina, hdyž so staršej strachujetaj. Cyle nawopak, trjeba je jim začuće sposrědkować, zo su škitane a schowane“, dr. Mikan rozjasnja.
Transporter pomha misionaram rjadu oblatow
Pomocne akcije z Łužicy na dobro Ukrainy su mnohostronske. Jedna tajka korjeni w lětadołhim přećelstwje Prawočana Benedikta Rjedy k rjadej oblatow w kraju, kotryž tuchwilu pod wójnu ćerpi.
Smjerdźaca (SN/MiR). Hakle njedawno bě Benedikt Rjeda wo pjenježnu podpěru prosył, zo móhli transporter za pomoc Ukrainje kupić. Zhromadnje z Towarstwom swjateje Filomeny a jeho předsydu Geratom Róblom je wón akciju nastorčił. Próstwa wo pomoc bu we wjacorych serbskich medijach wozjewjena, mjez druhim w Serbskich Nowinach, w Katolskim Posole a po žołmach Serbskeho rozhłosa MDR. A čitarjo kaž tež připosłucharjo njejsu so dołho prosyć dali, ale su pjenježne dary na wosebite konto přepokazali. Za to wuprajataj iniciatoraj wšěm darićelam wulki dźak.
Ćěkancy móža domoj telefonować
Wodarnje zawěsćeja zastaranje w regionje
Wojerecy (KD/SN). Dźeń wody 22. měrca bě před 70 lětami wosebity dźeń. Runje tón dźeń započa Ćišćanska wodarnja město Wojerecy z pitnej wodu zastarować. Na to dopomni jednaćel Wojerowskich zastaranskich zawodow (VBH) Wolf-Thomas Hendrich we wobłuku nowinarskeje rozmołwy na Wojerowskej dźěćacej a młodźinskej farmje, kotraž je w nošerstwje Křesćansko-socialneho kubłanskeho skutka (CSB). Lěta 1952 produkowachu w Ćisku wšědnje 6 500 kubiknych metrow wody. Po modernizaciji wodarnje je jich tuchwilu wšědnje 8 600 kubiknych metrow, a po přichodny měsac zahajenym rozšěrjenju kapacity ma to potom wšědnje 11 500 kubiknych metrow być. Za to nałoža 2,5 milionow eurow z hornca za strukturnu změnu.
Policija (24.03.22)
Hrajka strašna była
Běła Woda. Tuchwilna suchota a miłe nalětnje temperatury tomu polěkuja, zo strach lěsnych wohenjow jara přiběra. W tajkej situaciji móže kóždežkuli płomješko w lěsu katastrofalne sćěhi měć. Hólcaj w starobje dźewjeć a dźesać lět to předwčerawšim w Běłej Wodźe po wšěm zdaću wědźałoj njejstaj. W lěsku při Hamorskej dróze w Běłej Wodźe běštaj wonaj na pózdnim popołdnju ze zapalakom wjacore hałžki zapaliłoj. Na zbožo je wobsadka policajskeho awta jeju lepiła, tak zo njeje žadyn wulki woheń wudyrić móhł. Hólcow dowjezechu zastojnicy k jeju staršim.
Diskutuja wo koronje
Zběraja njerjad a wotpadki
Na prěnim akciskim dnju wokrjesa so pjeć komunow wobdźěli
Pančicy-Kukow (SN/MWj). Prózdne piwowe bleše na kromje pućow, kofejowe nopaški wosrjedź lěsa, prózdne cigaretowe tyzki na chódnikach, papjerjane tity w přirowach – tajke a podobne wobrazy drje kóždy widźi, kiž z wočinjenymaj wočomaj po kraju chodźi. Přećiwo přiběracemu zanjerodźenju wobswěta organizuja přirodowa centrala Budyskeho wokrjesa, Njeswačanska přirodoškitna stacija, přirodoškitny centrum „Hornjołužiski hórski kraj“ a wotpadkowy zarjad Budyskeho wokrjesa sobotu, 2. apryla, prěni wotpadkowy akciski dźeń wokrjesa.
W pjeć městach a gmejnach chcedźa tón dźeń při pućach a dróhach, na nawsach a naměstach kaž tež w přirodźe preč ćisnjene wotpadki zběrać. Hižo loni běchu w někotrych městach a gmejnach towarstwa a priwatne wosoby wotpadki zběrali a tak na přiběracy problem njerjada w přirodźe skedźbnili. Zo by so wuskutk tajkeho hibanja hišće zesylnił, su lětsa wosebity akciski dźeń do žiwjenja zwołali.
Z dobrej ideju móžeš z wěcow, kotrež pozdatnje hižo žanu ...
Za halu naraz zakładny kamjeń połožili a zběhanku swjećili
Bart (CS/SN). Nowotwar sportoweje hale w Barće je w hrubym hotowy. Wčera su tam zběhanku swjećili. Dokelž pak ma sportownja płonu třěchu, njemóžachu kaž hewak zwučene posledni hózdź do hrjady zabić. Město toho wjerćeše Budyski krajny rada Michael Harig (CDU) šruby do připrawy, přez kotruž móže w padźe wohenja kur přez třěchu wotćahnyć.
Koronapandemije dla njemóžachu dotal tež žadyn zakładny kamjeń połožić. To su wčera hnydom sobu nachwatali. Krajny rada Harig, jeho zastupjer Udo Wićaz a Malešanski wjesnjanosta Matthias Seidel (CDU) połožichu do špundowanja sportoweje hale koporowu tyzu, do kotrejež běchu twjerde pjenjezy, twarsku rysowanku, archeologiski přehlad wo twarnišću, aktualny dźenik a wjacore domiznowědne brošurki wo Barće a Malešanskej gmejny tyknyli.
