Radwor (SN/MkWj). Něhdźe dwaceći zajim­cow sćěhowaše wčera wječor pře­prošenje předsydy Domowiny Dawida Statnika na „serbski wječor“, kotryž wotmě so w Radworskim hosćencu „Zelena hałžka“ při sportnišću. Z nowej formu zjawnostneho dźěła chce třěšny zwjazk ludźom rozłožić, kak gremije kaž załožbowa rada, Domowina a Radźe za serbske naležnosće Sakskeje a Braniborskeje dźěłaja. Při tym bě wčera spěšnje spó­znajomne, zo je pobrachowacy dorost zamołwitym jedyn z hłownych problemow. Gmejnski radźićel Pětr Kliman namjetowaše, z wodźacymi ludźimi zaměrnje dźěłać a wjace młodych Serbow zdobyć. W tym zwisku rěčachu tež wo serbskim narodnym kubłanju w šuli. Bywši předsyda Domowiny Jan Nuk wospje­towaše swoje žadanje, předmjet „ludowědu“ zawjesć, zo by so narodne sebjewědomje młodych ludźi skrućiło.

Chcyjo nochcyjo zaběrachu so tež z bór­zomnymi wólbami Serbskeho sejma. Dawid Statnik argumentowaše, zo njeby tajki sejm ničo na tuchwilnym połoženju Serbow změnić móhł, chibazo k dalšemu pačenju našeho ludu přinošuje.

Pančicy-Kukow (SN/JaW). Kubłanje a šulstwo stej najwažnišej temje w Serbach. To wujewi prěni serbski wječor Domo­winy, Rady za serbske naležnosće Sak­skeje a Załožby za serbski lud wutoru w Pančicach-Kukowje. Něhdźe 30 zajimcow, mjez nimi tójšto młodostnych, zhoni tak rjec z prěnjeje ruki wo skutkowanju mjenowanych gremijow. Dawid Statnik předstaji jako předsyda Domowiny dźěławosć třěšneho zwjazka, předsydka sakskeje serbskeje rady Marja Michał­ko­wa poda nimo nadawkow rady tež historiski wid na strukturu gremijow, direktor Załožby za serbski lud Jan Budar rozłoži natwar, skutkowanje a ćeže zarjada załožby a jeje rady.

Wjacori přitomni přejachu sej konkretnu pomoc při zwoprawdźenju najwšelakorišich projektow, předewšěm ho­ber­skeje běrokratije dla. Matej Dźisławk skedźbni na to, produkciju serbskich zynkonošakow podpěrać. „Tak rěč na lóštne a zabawne wašnje dale dawamy“, wón měnješe. Jan Budar drje jemu přihłosowaše, skedźbni pak na to, zo spěchowanje hudźby zdźěla tež kreatiwnosć hudźbnikow potłóča.