250. serbsku namšu swjećili
Koncert do wody njepadnył
Worklecy (CRM/SN). Dešća dla wšak njemóžeše chór Lipa sobotu swój nócny koncert we wosebitej atmosferje cunjo woswětleneho parka za Worklečanskej hrodowej kapałku přewjesć. Ale jako dobra alternatiwa wopokaza so kapałka sama, do kotrejež wosebje rady tež Serbja z blišeje wokoliny na Bože mšě chodźa. Tak bu tam derje přihotowany koncert pod dirigatom Jadwigi Kaulfürstoweje tohorunja wot šwarneje ličby připosłucharjow dźakliwje přijaty.
Z pěsnju połnej lyriki „Nóc je k nam postupiła“ zahajichu Lipjenjo swoju nócnu hodźinu serbskeje wokalneje hudźby. Z někotrymi sadźbami našich słowjanskich susodow a tohorunja serbskimi literarnymi přinoškami ju hišće rozšěrichu a skulojćichu. Tak woni zdobom zwuraznichu, zo njeńdźe jim jenož wo někajkužkuli prostu, mjenje abo bóle připadnu zestawu woblubowanych serbskich spěwow, ale poskića ze swojeho staršeho a nowšeho repertoira to nócnemu koncertej so skerje hodźace. Na klawěrje přewodźeše Jan Brězan a sola spěwaštej Weronika Mětowa a Michaela Melcerowa, mjeztym zo přewza Andrea Henichowa moderaciju.
Pućowali, swjećili a rejwali
Swójbne popołdnjo ewangelskeho towarstwa zaso wulki wothłós žnjało
Wuježk (rm/SN). Mjeztym 14. raz poda so sobotu připołdnju nimale połsta Serbow, mjez nimi wjele dźěći, na swójbne pućowanje, organizowane wot Serbskeho ewangelskeho towarstwa a Krygarjec swójby. Z Wuježka nóžkowachu při lětnym wjedrje na Čornobóh. Na wjeršku móžachu so wšitcy ze swójskeho nachribjetnika zesylnić, sej wuhlad z wěže na Łužicu lubić dać a na hrajkanišću so počumpać. Wróćopuć po hinašej šćežce zahajichu ze zhromadnym spěwom „Što radosć rjeńšu dawa“.
Wšitcy rejwarjo strowi a čili
Arequipa (SN/JaW). Wšitcy čłonojo Serbskeje rejwanskeje skupiny Smjerdźaca, kotřiž přebywaja tuchwilu w peruskim měsće Arequipa na mjezynarodnym festiwalu Festidanza, kaž tež jich přewodźacy łužiscy hudźbnicy su strowi a čili. To zdźěli na naprašowanje našeho wječornika čłon rejwanskeje skupiny Stefan Cuška. „Nam so na zbožo derje dźe. Nimo někotrych wjetšich a mjeńšich módrych blakow a bolosćow je wšitko w porjadku“, zdźěli wón dźensa rano via WhatsApp.
Wuměłcam přihladować
Miłoćicy (SN/MiR). Wuměłske kubłanje na hinaše wašnje hač na šulskej ławce dožiwić móža wšitcy šulerjo wot 1. lětnika zaso w Miłočanskej skale Při Krabatowym kamjenju. Wot přichodneje póndźele móža woni tam přihladować, kak z hrubeho zornowca, ze železa abo drjewa zdźěla dosć filigrane wuměłske twórby nastawaja. 13 wuměłcow z Čěskeje, Ukrainy, Danskeje, Bołharskeje a Němskeje – mjez nimi budu tež serbscy wobdźělnicy – chce w Miłoćicach swoje duchowne ideje zmaterializować. Šule móža so na połdrahodźinske wodźenje „po ateljeju pod hołym njebjom“ hišće pod přizjewić. Witani su wězo tež dalši zajimcy. Na lětušej 12. mjezynarodnej wuměłskej dźěłarničce hraje nastawacy centrum za permakulturu tohorunja wulku rólu. Na wodźenju po dźěłanišću a wustajenišću zhonja šulerjo wo kołoběhu přirody a wo postupowacym projekće.
Přihoty na „hłownu“ běža
Budyšin (SN/JaW). Prezidij Zwjazkoweho předsydstwa Domowiny zaběraše so wčera z přihotami na přichodne posedźenje zwjazkoweho předsydstwa a na 19. hłownu zhromadźiznu třěšneho zwjazka, kotraž budźe 30. měrca 2019 w Chrósćicach. Wuwzaćnje je so gremij w Budyšinje schadźował. Kaž zdźěli předsyda Domowiny Dawid Statnik na naprašowanje, su hižo prěnje trěbne rozprawy wo dźěławosći třěšneho zwjazka za „hłownu“ rozjimali. „Předpołožimy je čłonam zwjazkoweho předsydstwa na přichodnym wuradźowanju 31. awgusta w Narću“, Statnik rozłoži.
Rěč bě tohorunja wo naćisku naprašnika čłonam serbskich towarstwow we a zwonka Domowiny, z kotrymž maja naprašowani skutkowanje třěšneho zwjazka posudźować. Zdźěłał je naprašnik wuběrk za zjawnostne a lobbyjowe dźěło pod nawodom Marki Cyžoweje. „Naćisk naprašnika zwjazkowemu předsydstwu na přichodnym wuradźowanju předstajimy. Čłonojo změja skónčnje rozsudźić, hač so z nim čłonow towarstwow woprašujemy abo nic“, wuswětli Dawid Statnik dalše postupowanje w naležnosći.
Jednora holca Hanka Šěrcec w srjedźišću stała
Hórki (SN/bn). „Wopominanje je w židowstwje wěc wěčnosće. Tohodla su naše rowy tež na wšě časy zapołožene. Stawizny wšak nam pokazuja, zo běchu je přiwšěm wonječesćeli a ničili. Njewěm, hač bě sej Hanka Šěrcec swojich korjenjow wědoma. Wona pak je z přikładom za to, zo bě jeje pochad, byrnjež serbsce a katolsce wotrostła, nacionalsocialistam přičiny dosć ju zamordować.“ To rjekny Drježdźanski rabiner Alexander Nachama wčera w Hórkach na wopominanskim a narodninskim zarjadowanju za tež jako „židowku Hanu“ znatu holcu, kotruž běštaj Šěrcec Jurij a Marja – bratr a sotra – jako dźowku přiwzałoj. Z hebrejskorěčnym za židow kaž za křesćanow wažnym psalmom 23 Nachama swoje krótke spomnjeće wotzamkny.
Na Elic statoku je něhdźe 140 wobdźělnikow Hanku Šěrcec składnostnje jeje 100. posmjertnych narodnin wopominało. Hosćićelka Jěwa-Marija Elic přitomnych witaše a wuzběhny: „Wobdźiwam Hanku tež, dokelž wopokazowaše stajnje kruty rjap. Štó měješe w lěće 1934 chrobłosć, wuzwolić sej Esther jako firmowanske mjeno. Myslu sej, zo bě sej swojeho pochada wědoma a zdobom bohudowěrna křesćanka.“
Přichod Muzeja Ćišinskeho rozjimali
Chrósćicy (SN/JaW). Přichod Muzeja Ćišinskeho w Pančicach-Kukowje steješe w srjedźišću wčerawšeho wuradźowanja předsydstwa Kamjenskeje župy „Michał Hórnik“ w Chrósćicach. Zo móhli muzej zachować a dale wobhospodarjeć, trjebaja dlěšodobne koncepty a plany, běchu sej čłonojo přezjedni. Zdobom je přechodne rozrisanje trěbne.
Dwurěčne kubłanje w fokusu stało
Podstupim (SN). Prašenja dwurěčneho kubłanja stejachu w srjedźišću něhdźe hodźinskeje rozmołwy braniborskeho ministerskeho prezidenta Braniborskeje Dietmara Woidki (SPD) a społnomócnjeneje braniborskeho knježerstwa za naležnosće Serbow Ulriki Gutheil ze zastupnikami Domowiny minjeny pjatk w Podstupimje. Serbow zastupowachu nimo předsydy Domowiny Dawida Statnika zastupowacy jednaćel třěšneho zwjazka Marcus Kóńcaŕ, předsyda Rady za naležnosće Serbow Braniborskeje Torsten Mak a direktor Załožby za serbski lud Jan Budar.
Za wólby sejma so njeangažuja
Budyšin (SN/at). Poměr k wólbam Serbskeho sejma su čłonojo předsydstwa Domowinskeje župy „Jan Arnošt Smoler“ na swojim posedźenju zawčerawšim w Budyšinje rozjimali. Kaž županka Jana Pětrowa rjekny, su měnjenja k tomu wšelake. Někotři w předsydstwje wotpokazuja, so registrować a so na wólbach serbskeho parlamenta wobdźělić. Tući maja Domowinu za legitimowanu zastupjerku našeho ludu. Tamni měnja, zo budu sobu wothłosować. Zawěsće měrja so tež měnjenja w Domowinskich skupinach a towarstwach pod župnej třěchu do tuteju směrow. „Kóždy čłon našeje župy njech tohodla za sebje rozsudźi, hač chce Serbski sejm sobu wolić, abo nic. To je priwatna naležnosć jednotliwca“, županka podšmórny. Wuchadźejo z tuteje diskusije Budyska župa žanoho kandidata a tež žanu kandidatku njenamjetuje.
Předsydstwo dorozumi so dale wo wopomjatnym zarjadowanju na česć wučerja a přirodospytnika Korle Bohuwěra Šěcy 25. awgusta w Rachlowje pod Čornobohom. Tute přihotuja tamniša wohnjowa wobora, Domowinska skupina Rachlow/Mješicy a gmejna Kubšicy.
