Najstarše towarstwo dale čiłe

póndźela, 19. měrca 2018 spisane wot:

Budyšin (SN/bn). Na hłownej zhromadźiznje Maćicy Serbskeje sobotu na žurli Budyskeho Serbskeho muzeja je něhdźe 40 čłonow wědomostneho towarstwa rozprawje předsydy a pokładnika jednohłósnje schwaliło. Po mjeńšinje ćišiny za loni zemrěteju wjelelětneju sobustawow dr. Siegmunda Musiata a dr. Zbigniewa Gajewskeho wupraji so předsyda Jurij Łušćanski k dźěławosći towarstwa. „Jubilej ‚500 lět reformacija‘ je tež nas Serbow zaběrał. Na iniciatiwu serbskeho superintendenta Jana Malinka nasta kedźbyhódna kniha ‚Pjeć lětstotkow – Serbja a reformacija‘, ke kotrejž su nimo předsydki wuběrka za serbske pomniki Trudle Malinkoweje tež dalši čłonojo ze zajimawymi nastawkami přinošowali. Zawěsće njepřehnawam, hdyž mam wudaće za wusahowacy podawk lěta“, předsyda rjekny. Nimo toho wuzběhny wón prócowanja Maćicy wo wutworjenje pomnika za dekana Johanna Leisentritta w Budyšinje. Maćica Serbska ma „tuchwilu 106 sobustawow, mjez nimi dwanaće wukrajnych. Z towarstwa wustupiła je jedna wosoba, přistupili su tři.“

Spektrum skutkowanja sej zbližili

póndźela, 19. měrca 2018 spisane wot:

Radwor (SN/MkWj). „Tajkich prócowarjow bychmy dźensa nuznje trjebali.“ ­Facit Ludmile Budarjoweje drje měješe něchtóžkuli we hłowje, jako po wopominanskim zarjadowanju składnostnje 50. posmjertnin Michała Nawki minjeny pjatk w Radworju zaso domoj dźěše. Wjace hač połsta zajimcow bě na zarjadowanje na wosadnu žurlu přichwatało, na kotrež běštej Towarstwo Cyrila a Metoda a Maćica Serbska přeprosyłoj.

W krótkopřednoškach zhonichu wopytowarjo wo hoberskim spektrumje skutkowanja Radworčana, kiž bě 16. měrca 1968 zemrěł. Ludmila Budarjowa rozprawješe, kajke problemy mě­ješe „pilny a chrobły serbski prócowar“ z nacionalsocialistami a pozdźišo ze socialistiskej wyšnosću, dokelž nochcyše so statnej liniji podwolić. Tak bě Nawka jedyn z prěnich, kiž dyrbješe 1937 na ćišć nacijow swoju serbsku domiznu wopušćić. Nacionalsocialisća přesadźichu jeho do Kamjenicy.

Na Michała Nawku spominali

pjatk, 16. měrca 2018 spisane wot:
Čłonojo Maćicy Serbskeje a mnozy dalši su dźensa dopołdnja na Budyskim Mikławšku Michała Nawku wopominali. Wučer, kěrlušer a basnik, kiž bě tohorunja redaktor Katolskeho Posoła, je před 50 lětami zemrěł. Dźensa wječor přewjedźe Towarstwo Cyrila a Metoda z Radworskej wosadu a Maćicu Serbskej w Radworju za njeho spominanske zarjadowanje, kotrež započnje so we 18.30 hodź. z Božej mšu. Po kemšach zhladuja na tamnišej farje z wjacorymi přednoškami na žiwjenje a skutkowanje prócowarja, kiž je serbskim wěriwym, katolskim kaž ewangelskim, tójšto kěrlušow zawostajił. Foto: SN/Maćij Bulank

Młodych ludźi do chóra wabić

pjatk, 16. měrca 2018 spisane wot:

Radwor (SN/MkWj). Runja druhim spěwnym ćělesam chce tež Radworski chór Meja zaměrnje za dorostom pytać a młodych ludźi za sobuspěwanje zdobyć. To předewzachu sej na swojej wčerawšej hłownej zhromadźiznje w Radworskim „Słodeńku“, domicilu chóra. Činić chcedźa to mjez druhim z wosebitej probu, na kotrejž maja zajimcy składnosć, do chóroweho žiwjenja „ponuchać“.

Hewak móžachu na dosć wuspěšne minjene lěto zhladować. Tak su Mejenjo w oratoriju „Serbske jutry“ sobu skut­kowali a jón w meji tež w Drježdźanskej katedrali přednjesli. Tradicionalne zarjadowanja, kaž koncert před Starej cyrkwičku, loni zhromadnje z chórom towarstwa Bratrowstwo, abo hodowny koncert z Měćinom Weclichom a młodymi wuměłcami, běchu tohorunja jara radźene, kaž městopředsydka Diana Wowčerjowa w rozprawje zwěsći. Tež sportowcy Meje su někotryžkuli wuspěch wuwojowali. Dźak wuprajichu Pětrej Cyžej, kiž jich mjeztym dźesać lět diriguje.

Z chórom Lipa chcedźa dale na klětu planowanym oratoriju ­„Israelowa zrudoba a tróšt“ hromadźe dźěłać.

Kulturne towarstwo dwaceći lět

štwórtk, 15. měrca 2018 spisane wot:

Bukečanske kulturne spěchowanske ­towarstwo swjeći zajutřišim, sobotu, 20lětne wobstaće. Wone so we wsy ­tohorunja wo někotrežkuli serbske ­zarjadowanje stara.

Bukecy (CS/SN). Po swojej lětnej hłownej zhromadźiznje sobotu w 15 hodź. zhladuje Bukečanske kulturne spěchowanske towarstwo na 20. róčnicu załoženja. ­Wu­tworili su je w aprylu 1998. Wone wuńdźe tehdy z přihotowanskeje skupiny za 775. jubilej Bukec, kotryž su 1997 wo­swjećili. Po tym zo běchu jubilejny swjedźeń wuspěšnje přewjedli, wob­dźěleni měnjachu, zo je wažne, wuprudźenje, kotrež bě swjedźeń na wjes a region měł, do přichoda wjesć. Tuž wobzamknychu towarstwo załožić. 18 rjadnych a dwaj spěchowanskaj čłonaj jemu spočatnje přisłušachu. Mjeztym je ličba na 30 rozrostła.

Wjesny swjedźeń budźe wjeršk

srjeda, 14. měrca 2018 spisane wot:

Jaseńca (LZ/SN). Swoju hłownu a wólbnu zhromadźiznu je Jasčanske towarstwo Bjesada minjeny pjatk wotměło. Předsyda Guido Zahrodnik móžeše w swojej rozprawje na wjacore derje wopytane zarjadowanja w lěće 2017 pokazać. Na póstničce bě wjele ludźi, wosebje tež młodych, lětsa tomu bohužel tak njebě. Derje wopytany bě tež swětłowobrazowy přednošk bywšeho Jasčana Marka Nowaka, kiž je z přećelku Anju z kolesom w Americe po puću był. Na mały wjesny swjedźeń je so mjeztym tež Jasčanske chodojtypalenje wuwiło. Wjeršk běše bjezdwěla zaso adwentnička, na kotrejž su wjesnjenjo nowu hru wo hobru Sprjewniku předstajili. W pózdnim nalěću poswjećichu nowe małe sportnišćo-volleyballnišćo. Po tym je Radijo Satkula móžnosć wužiło a w Jaseńcy jednu staciju swojeje turneje po Łužicy zapołožiło. Tež Viktoria Worklecy je swój koparski turněr na sportnišću w Jaseńcy přewjedła. Kulturnu rumnosć Bjesady je tež Serbska murja za swoje spěwne wječorki wužiwała.

Skupiny po nowych pućach kroča

wutora, 13. měrca 2018 spisane wot:

Depsk (HA/SN). „Najsylniši motor w serbskim žiwjenju je Domowina. Wona je tohodla tež naša najwažniša partnerka w komunalnej politice na tym polu.“ To rjekny Harald Altekrüger (CDU), krajny rada wokrjesa Sprjewja-Nysa ­a zdobom čłon Domowiny, na hłownej zhromadźiznje župy Delnja Łužica minjeny pjatk w Depsku, měšćanskim dźělu Choćebuza. Tele zwěsćenje je so tež w rozprawje župneho předsydstwa, kotruž poda prěni raz župan Wylem Janhoefer, a w diskusiji wotbłyšćowało.

Dobre wuwiće Domowiny w Delnjej Łužicy a jeje přiběraca akceptanca w serbskej a němskej ludnosći pokazuje so mjez druhim w tym, zo župa a młode skupiny a towarstwa w swojim dźěle po nowych pućach kroča a zo su fasety w Domowinskim skutkowanju dale a wobšěrniše. To płaći wosebje za rewitalizaciju a pěstowanje delnjoserbšćiny w młodej a młódšej generaciji. Tak su dalše mjeńše skupiny załožili, hdźež zhromadnje serbšćinu rěča abo ju wuknu. Štóž chce w Delnjej Łužicy serbsce powědać, tón přeco jednoho za to namaka, župan zwěsći.

Minjeny kónc tydźenja je chór Budyšin swoje kóždolětne zwučowanske lěhwo přewjedł. Lětsa podachu so spěwarki a spěwarjo ze swojim dirigentom Michałom Jancu do Ochranowa, zo bychu tam nowy program nazwučowali. Sobotu do jutrow chcedźa w Budyskim Serbskim muzeju nalětni koncert wuhotować. Časej wotpowědnje budu to nalětnje spěwy a wurězki z oratorija „Nalěćo“. Proby běchu wuspěšne, a wuhlady na rjany koncert nětko tež maja. Foto: Jurij Helgest

Za młode swójby

štwórtk, 08. měrca 2018 spisane wot:

Budyšin (SN/at). Dźeń wotewrjenych duri 9. junija w Njechornju je jedne pře­dewzaće z dźěłoweho plana Budyskeje župy „Jan Arnošt Smoler“, kotryž je jeje předsydstwo na wčerawšim posedźenju w Serbskim domje konkretizowało. Kaž tudyša regionalna rěčnica Domowiny Sonja Hrjehorjowa zdźěla, su lětsa młode swójby přeprošene. Za nje planuja zajimawe, nimale hodźinske pućowanje wot Hrodźišća do Njechornja. Na ležownosći Domu Měrćina Nowaka-Njechorńskeho spřihotuja wšelake zaběry a poskitki za młodych a staršich hosći.

Swoju lětušu hłownu zhromadźiznu zwjazachu čłonojo Towarstwa přećelow Serbow (SPL) minjenu sobotu w Praze ze 111. róčnicu załoženja SPL. Tež Domowina je gratulowała.

Praha (Łu/SN). Towarstwo přećelow ­Ser­bow (SPL) – při Serbskim seminarje w Praze – je w zwisku z lětušej hłownej zhromadźiznu minjenu sobotu w čěskej stolicy na 111 lět spomóžneho skutkowanja zhladowała. Mjez gratulantami sposrědkowa referent Domowiny za kulturu a wukraj Clemens Škoda zbožopřeća předsydy Domowiny Dawida Statnika. Tam mjez druhim rěkaše: „Přez wjele generacijow mějachmy čěskich přećelow, kotřiž starosćachu so wo dóńt serbskeho ludu. Tež hdyž je so pomjenowanje towarstwa měnjało, wostachu čłonojo nam w dobrych a ćežkich časach přez lětstotk swěrni.“ Zdobom wupraji Clemens Škoda jako čłon SPL předsydstwu towarstwa swój dźak a připóznaće za zdokonjane čestnohamtske dźěło.

Serbska debata

nowostki LND