Dźěćacu literaturu rozjimali

wutora, 27. oktobera 2015 spisane wot:

Budyšin (AW/SN). Na mjeztym pjatu literarnu diskusiju je wčera spočatk lěta znowa załožene Koło serbskich spisowaćelow we wobłuku Zwjazka serbskich wuměłcow přeprosyło. Pod nawodom swojeho předsydy Benedikta Dyrlicha chce koło wobsahi nowych knihow intensiwnišo wobjednawać a jich maćiznu literarnje předźěłać.

Kermušku z nowej app woswjećili

pjatk, 23. oktobera 2015 spisane wot:

W Lipsku wotmě so wčera kermuška studentskeho towarstwa Sorabija. Tuta zwjaza so hnydom z přiwzaćom sydom nowych studentow a z předstajenjom noweje app LND.

Jasne žadanja na wokrjesnu reformu

štwórtk, 15. oktobera 2015 spisane wot:

Planowanja braniborskeho knježerstwa, přewjesć w zwjazkowym kraju wokrjesnu reformu, bě ćežišćo wčera­wšeho zhromadneho zetkanja před­sydstwa župy Delnja Łužica a serbskeje rady Braniborskeje w Choćebuzu.

Choćebuz (HA/SN). Župa Delnja Łužica a Rada za serbske naležnosće Braniborskeje chcetej žadanja Delnich Serbow nastupajo planowanu wokrjesnu reformu w Kraju Braniborskej znosyć. Nazběrane měnjenja chcedźa w zhromadnym lis­će serbskeju gremijow braniborskemu ministrej­ za nutřkowne a komunalne naležnos­će Karlej-Heinzej Schröterej (SPD) a bra­niborskemu financnemu ministrej Christianej Görkej (Lěwica) sformulować. Na to su so čłonojo župneho předsydstwa braniborskeje serbskeje rady na swojim wčerawšim wuradźowanju w Choćebuzu dojednali.

Zjawnostne dźěło polěpšić

štwórtk, 15. oktobera 2015 spisane wot:

Daruvar (SN). Seminar słowjanskich mjeńšin Federalistiskeje unije europskich narodnych mjeńšin (FUEN) wot­měwa so wot dźensnišeho do soboty w chorwatskim měsće Daruvaru. Serbow zastupuja předsyda Domowiny Dawid Statnik, jednaćel třěšneho zwjazka a wiceprezident FUEN Bjarnat Cyž, zastupowacy jednaćel Domowiny Marcus Kóńcaŕ, referent zwjazka Łu­žiskich Serbow za kulturu a wukraj Clemens­ Škoda a Madlenka Kowarjec.

Dorozumić chcedźa so na přebytku wo zhromadnym dźěle słowjanskich narodnych mjeń­šin pod třěchu FUEN, zdźěla Domowina. „Přihotować mamy wólbnu zhromadźiznu kaž tež kongres FUEN klětu we Wrócławju, chcemy rozjimać dalše zhromadne aktiwity na polu projektoweho dźěła kaž tež móžnosće jich spěchowanja ze srědkow Europskeje unije a dalše ćežišćo je, polěpšić internetnu­ stronu dźěłoweje skupiny słowjanskich mjeńšin FUEN a tak zdobom polěpšić zjawnostne dźěło“, rjekny wiceprezident FUEN Bjarnat Cyž.

Serbšćina słyšeć a widźeć była

póndźela, 12. oktobera 2015 spisane wot:

Stróža (kl/SN). Dohromady 50 staršich a młódšich ludźi wopyta sobotu swójbne popołdnjo župy „Jan Arnošt Smoler“ w Stróži pola Hućiny. W Domje tysac hatow bě župa třeći raz na tajki dźeń přeprosyła. Přišli běchu přewažnje dźěći předšulskeje staroby a jich starši.

Županka Jana Pětrowa hosći witaše a wuzběhny, zo je zaměr župy, z tymle zarjadowanjom zajim za wjacerěčnosć budźić. „Chcemy ze staršimi, kubłarjemi a wučerjemi do rozmołwy přińć a so zdobom za jich nałožowanu prócu při ku­błanju dźakować. Je wažne, wo regio­nalnych wužadanjach při dwurěčnym kubłanju zhonić. Tak móžemy proces kubłanja w pěstowarni a w šuli lěpje sobu přewodźeć.“

Žadaja sej krute městno managera

srjeda, 07. oktobera 2015 spisane wot:

Budyšin (AW/SN). Předsydstwo Zwjazka serbskich wuměłcow (ZSW) žada sej za dalše skutkowanje na dobro serbskeje kultury skónčnje zawěsćene krute městno projektoweho/je managera/ki. Wo­spjetne žadanje Załožbje za serbski lud steješe w srjedźišću pose­dźenja pod nawodom předsydy ZSW Istvána Kobjele wčera w Budyšinje.

Serbja na zlěće w Praze byli

wutora, 06. oktobera 2015 spisane wot:
Praha (CŠ/SN). Delegacija Serbow je so minjenu sobotu w Praze na zlěće němskich mjeńšinowych skupin Čěskeje wobdźěliła. Přeprošenje běchu Domowinje w nalěću posrědkowali. Na zarjadowanju přitomni běchu tež zastupjerjo němskeho wulkopósłanstwa a druhich mjeńšin w Čěskej, něhdyši zapósłanc europskeho­ parlamenta Bernd Posselt a minister Čěskeje republiki za čłowjeske prawo, runoprawosć a legislatiwu Jiří Dienstbier­. Čłon Mjeńšinoweje rady Němskeje Kito Ela a referent Domowiny Clemens Škoda nawjazaštaj kontakty k mjeńšinowej radźe Čěskeje republiki. Tak je planowane sej přichodnje mjez­sobu dźěło FUEN a mjeńšinowych radow a mjeńšinowe politiske mechanizmy we woběmaj­ krajomaj předstajić. Smjer­dźečanska rejwanska skupina přewodźeše delegaciju a bě atrakcija kulturneho programa, štož dopokaza intensiwny aplaws. Njedźelu wobdźělichu so na Božej mši w cyrkwi swj. Jana Nepomuckeho, na kotruž bě prezident němskich mjeńšin Martin­ Dzingel Serbow přeprosył.

Radworčenjo najsylniši Serbja

póndźela, 05. oktobera 2015 spisane wot:

Pěskecy (jh/SN). Čłonojo za integraciju ludoweje akordeonoweje kultury (Čilak), dobyćerjo 10. sportoweho wubědźowanja Powerserb loni w Nuknicy, běchu sobotu w Pěskecach zakitowarjo pokala a z tym wuhotowar a zarjadowar wurisanja 2015. Zhromadnje z dobrowólnej wohnjowej woboru Pěskecy, tamnišej sportowej jednotku a młodźinu spřihotowachu hólcy wokoło sportoweho wučerja Křesćana Bejmaka šěsć stacijow, na kotrychž běše zwjetša móc prašana.

Na prěnjej dyrbješe so mustwo, wobstejace z pjeć młodostnych, na łatu wrotow powěsnyć, na druhej granaty do cila mjetać, na třećej 150 kg ćežki zdónk nosyć, na štwórtej Barkas B 1000 ćišćeć, na pja­tej zranjeneho njesć a na šestej dźesać tonow ćežke woborne awto TLF 16/24 ćahnyć.

Něhdźe 60 zajimcow sćěhowaše wčera přeprošenje Budyskeje župy „Jan Arnošt Smoler“, Rakečanskeho stawizniskeho towarstwa RAK a Domowinskeje skupiny Komorow/Trupin/Rakecy na stawizniske popołdnjo w Rakečanskej Pawołskej šuli.

Rakecy (SN/CoR). „Runje za našu gmejnu ma tajke zarjadowanje wosebity wu- znam, dokelž wuwědomja nam zhromadne korjenje němskich a serbskich wobydlerjow. Bych so wjeselił, hdyž dalše slěduja“, podšmórny Rakečanski wjesnjanosta Swen Nowotny (CDU) na kóncu stawizniskeho popołdnja. Na nim přednošowachu předsydka stawizniskeho towarstw­ RAK Annemarie Rentsch, dr. Edmund Pjech a dr. Susanne Hozyna ze Serbskeho­ instituta přitomnym w kopatej połnej awli ewangelskeje šule.

Pjećo so požadali

štwórtk, 01. oktobera 2015 spisane wot:

Budyšin (SN/JaW). Pjeć wosobow prócuje so wo městno direktora Załožby za serbski lud. Mjez požadarjemi je tež žona, wobkrući naměstnica direktora Załožby za serbski lud Michaela Mošowa.

Załožbowy zarjad pyta tuchwilu pora­dźowansku firmu, kotraž ma kmanosće požadarjow za direktorske městno pruwować. „Hač k přichodnemu wura­dźo­wanju załožboweje rady 24. nowembra w Podstupimje ma poručenje předležeć, kotry kandidat, kotra kandidatka abo kotři­ kandidaća su za poziciju wosebje kmani“, praji Mošowa. K tomu pře­wjedu tež wosobinske rozmołwy. „Jako wupisar móžemy so na nich wobdźělić, štož chcemy wužić. Zastupjerka Zwjazka a zastupjer Braniborskeje w załožbowej radźe kaž tež předsyda rady Jan Budar su hižo signalizowali so wob­dźělić chcyć“, Michaela Mošowa potwjerdźi. Hač so załožbowa rada hižo na nowemberskim posedźenju na noweho direktora abo direktorku dojedna, njeje dotal jasne.

Městno direktora załožby dyrbjachu znowa wupisać, dokelž njebě so jeje rada w prěnim přeběhu w aprylu na žanoho­ kandidata dojednała.

nawěšk

SERBSKE NOWINY podpěruja:

Novi Sad – kulturna stolica Europy

nowostki LND